ف: اهلا وسهلا فيكي يا حجة بتعرفينا عن حالك شو اسمك ؟
ن: ايوة اسمي ندى حسن عنتباوي
ف: بأي سنة خلقتي اذا متزكري؟
ن: انا مش متزكري.
ف: من موليد فلسطين؟
ن: ايه.
ف: منوين من فلسطين؟
ن: انا من شفه عمر.
ف: خبريني شو بتعرفي عن فلسطين لما كنتي بفلسطين واعية او صغيرة لحد ما طلعتو من فلسطين
ن: كان عمري 10 سنين او 12
ف: كيف كانت حياتكو بفلسطين؟ كيف قضيتي طفولتك قبل النكبة وهيك؟
ن: كنا مبسوطين عنا اخوتنا وامنا وقرايبنا وكل واحد عندوشغلوبشتغل فيه ، بدو يروح على المدرسة ولادهن بيروحو وبدن يروحو بناتن, صبيانن متوظفين بإنن بيروحو يعني فش حدا بقدر يمنعنا من اشي, كنا قاعدين بوطنا.
ف: كنتي تروحي على المدرسة او ما رحتي ؟
ن: انا كنت اروح.
ف: لأي صف وصلتي؟
ن: وصلت للصف الثامن.
ف: وشو عملتي بس خلصتي يعني كنتي تساعدي امك او اشتغلتي او اتعلمتي شي مهنة ؟
ن: انا ما اشتغلت طلعت من المدرسة وانخطبت وتجوزت.
ف: وكيف انخطبتي انو كيف شافك العريس , كان بيقربك او حدا دلو عليكي ؟
ن: كان بيجي مع اهلو مع الشباب اللي عنا وشافني ونكتب هل النصيب.
ف: كيف تعرفتي على خطيبك ؟ انو هو ما كان بيقربك بس صحبة هو واخواتك ؟
ن: اه
ف: كنتو بنفس المخيم عايشين او هو من مخيم تاني او من منطقة تانية ؟
ن: لا هو كان من نفس المنطقة اللي احنا فيها .
ف: اه وافقتي دغري لما اجا قلك ابوكي انه في عريس او هو اجبرك كان عندكو البنت ممنوع تعطي رأيها خلص اذا اجا عريس لازم تقبل فيه؟
ن: الابو بجبر الوحدة لمن بيشوف الشب ادمي وكويس ومنيح بيقولو انو الابو بيعرف مصلحة البنت و بيعرف يبارك امرها يعني على المستقبل لؤدام , عشان هيك بيخطبهاوبيجوزها .
ف: اه يعني مش هوي بيخطبها حتى لو ما كان منيح .
ن: في حدا بيعطي بنتو اذا ما كان منيح ؟
ف: وفي ناس ممكن .
ن: هادا بيصير غباء
ف: اه هلق كيف اجا ابوكي قلك انو في عريس وبدك تنخطبي انو كيف فاتحك بالموضوع ؟ انو كنتي صغيرة عمرك 12 سنة ؟
ن: لمن اجا الي اجا عندي كنت قاعدي انا وامي واخواتي اجا صار يحكي لامي وانا سامعة ,قلها هدول الجماعة اجو حكو بالبنت ورايدين البنت وكتب هالنصيب وتجوزنا .
ف: ولما اجا حكا فيكي اول مرة وطلب ايدك وقلو انو انا طالب القرب مين اجا معو من اهلو او اجا لحالو؟
ن: اعوذ بالله اجا معاه بيجي 20 شب من اهليتو ومن هل الاصدقاء الكبار ويقولو احنا بدنا نجيب اكتر من هيك ناس يا اما الواحد بيحب يلتزم ويكونو ناس اوادم وكويسينز
ف:واجت امو شافتك هيي لحالا انو في ناس بتيجي بيطلبو العروس الام بتيجي بتعمل زيارة للعروس؟
ن:اجت امو وخواتو واهل دار عمها لبنتن هيي متجوزة , اجو معاهن وقالوا بدكن نسب احسن من هيك هدول اوادم وكويسين فش عندن وجع راس .
ف: كان في حدا معارض من العيلة انو عموميتك او خوالك مثلا او هني ما بدن العريس او مثلا اخواتك الشباب انو لأنو رفيقن؟
ن: لأ , لأ , عارفين انو منيح ومطيع لاهلو وللكل اكيد بيكون منيح مع اللي بياخدها.
ف: شو كان بيشتغل العريس؟
ن: كان يشتغل بالوكالة .
ف: وكالة الأنروا ؟
ن: اه
ف: وكيف كانت حالتو ؟ انو منيح معو مصاري او فقير؟
ن: اهلو عندن ارض وبيزرعواوبيشتغلو ومبسوطين وبس اجا وكتب هالنصيب ضل بالضيعة الي احنا فيها .
ف: هوي من أي ضيعة ؟ كمان من شفى عمر ؟
ن: اه
ف: كيف كان الوضع الاقتصادي بشفى عمر كانت الناس غنايا ومعن مصاري او فقراء؟
ن: كانت الناس تشتغل يعني يقضوحاجتن وفي منن متوفرين.
ف: اه يعني كل واحد عندو ارض وبيطلع من ارضو .
ن: ويالي ما عندو ارض يكون كسبان علم ويتوظف .
ف: هلق لما اجو وحددو الخطبة , كمان اجو وحددو المهر ؟ والمقدم والمأخر واذا عندو بيت وهيك فأديه كان المهر بوقتها ؟
ن: طلبو 70 متقدم والمتأخر 100
ف: كان في حدا معارض على انو هلقد مبلغ المهر ؟
ن: لأ, ما هني متفقين من لما قرو الفاتحة .
ف: اه , ومين راح يشتري الذهب وقت حددتو الخطبة ؟
ن: راح العريس وراح من اهلو شوي واحنا , وشروا , وهلي الها نصيب فيه الوحدة .
ف: وشواشتريتي كمان للخطبة غير الذهب انو في ناس بتجيب فستان وبيعملوا شعرن ؟
ن: انو اكيد ما بيخلاش, كل الصبايا وقت الخطبة بيجيبو بدلات .
ف: انتي شو جبتي وقتها ؟
ن: احنا جبنا فساتين , كانت قليلة انو إلي يعملوا طقومةويلبسو على الموديل
ف: اه احكيلي كيف كانت خطبتك انو من الصبح , فقتي عملتو حفلة للمسا ؟
ن: احنا لمن كتبو الكتاب وقعدو شوي وبعدين راحو على بيتن عملو السهرة والحفلة ببيتن , ببيت العريس
ف: هيي كانت السهرة لازم تنعمل ببيت العريس ؟ مش سهرة العرس , الخطبة !
ن: الخطبة هني ببعضن.
ف: انتي ما عملتي خطبة الك , ولاكنتي معهن؟
ن: لأ
ف: ليه؟
ن: ما كانت عادة انها تعمل , وكانت تعمل عرس , وبيجي يوم لحد العصر يوخدوها .
ف: طب هوي شوعملولو وقت خطبتو انو عملو غدا وعزمو العالم وعملو الحفلة ؟
ن: الي يا بنيتي بيعملو سهرات بيبقوا الشباب عند العريس وأهليتو كلها بيبقو مبسوطين مع بعضهن . ويوم الي بدو يتجوز متل ما قلنالك انو بيعملو الواجب بيوخدو العريس وبيحلقولو وبيغنولو وكل اشي والعروس كمان بيجو ….
ف: هلق قديه ضلت فترة الخطبة ؟
ن: ما كانو يتأخرو بالخطبة .
ف: يعني تقريبا قديه؟
ن: يعني تقريبا شي شهر او 20 يوم .
ف: وكنتي تلحقي تجيبي جهازك وهوي انو اذا عم بيعمر بيت ؟
ن: هني الهن بيت , هني يعني وضعهن يعني متل هالناس.
ف: هلق ابوكي كان معارض انو على فترة الخطبة او مثلا لو طولت اكتر او كان عندو مثلا البنت ممنوع تنخطب لوقت طويل ؟
ن: ابوي مات .
ف: تعيشي , هوي مات قبل ماتتجوزي يعني ؟
ن: اه
ف: طب لما اجو طلبوكي من مين طلبوكي؟
ن: من اخواتي
ف: وشو كانت العادات والتقاليد بيوم الخطبة , الظاهر انو انتي ماعملتي فهني شو عملوا ؟
ن: بيجو بيحكو بالبنت ويكونوا متفقين وناويين يكتبو الكتاب وكل اشي بيعملوا سهرة الشباب عند اهل العريس .
ف: هلئ كان مسموح انك تطلعي انتي وخطيبك انو هلق البنت بتطلع مشاوير وهيي وخطيبها وهيك ولا كان ممنوع؟
ن: اعوذ بالله , هههههه, لأ أعوذ بالله .
ف: وحتى لو اجا لعندكو على البيت كان ممنوع تقعدي معو ولا كنتوتقعدو ضمن البيت؟
ن: ضمن البيت .
ف: ومش لحالكو ؟ ممنوع ؟
ن: لأ اعوذ بالله .
ف: وكتبتو الكتاب قبل العرس او بنفس يوم العرس او كيف ؟
ن: لأ قبل العرس
ف: ووين كتبتو الكتاب ؟
ن: نادو لهاد ياللي بيكتب الكتاب للعرايس عنا, كان منقدم الوراق للمركز إلي فيو تبع الجوازات .
ف: ومين حدد يوم العرس , انت او هوي او اهلك او اهلوا حددو اليوم الي بدكو تتجوزو فيه ؟
ن: لأ أهلو هوي.
ف: و أهلك ما كانوا الهن رأي مثلا انو يقولون لأ بدنا بهل اليوم؟
ن: لأ ما هني خطبووكتبو الكتاب ويقولو هادي اسا صارت بحساب خطيبتو وبدو يوخدها يعني جوزها.
ف: هلق كيف كانت تحضيراتك للعرس يعني شو رحتي جبتي شو حضرتي جهازك , هوي كان الو بيت لإلو ولا كنتي ببيت اهلو يعني بيت عمك بدك تعيشي معاهن؟
ن: قعدت انا ودار عمي.
ف: اه طب هيك بتختلف التحضيرات انو انتي ما جبتي عفش وهيك كان العفش جاهز وما جبتي اشيا خاصة إلك كان هوي مجهز البيت؟
ن: هوي سيد بيتو.
ف: اه وشو جبتي شو حضرتي بجهازك ؟
ن: تياب ؟
ف: اه تياب
ن: التياب العادي
ف: اه يعني كل شي
ن: اه كل شي يلزم للعروس تطلعو.
ف: هلق احكيلي عن وقت عرسك كيف كان عرسك؟
ن: عرس عادي يطبلو ويزمرو
ف: لأ في ناس مثلا على ايام فلسطين كانوا يعملوا العرس سبع ايام ويعزموا العالم كلها وكل يوم يعملو غدا ويعزمو الجيران وهيك .
ن: هاي بالعهد القديم , بس على زماننا كانو بيجو يقولو يعني يوم السبت بتحضرو البنت بدنا نجوزها لابنا.
ف: شو عملتو يعني ؟ عملتو حفلة وهيك وغدا للعالم؟
ن: اه إلا واهل العريس يعملو اكل ويعزموهالعالم كلها ويحلقو للعريس ويعملولو زفة ويكيفو .
ف: وانت شو عملولك؟
ن: أنا !!!مثل ما بيعملو لهل بنات.
ف: اه احكيلي مثلا, مثل الصبح شو بعملو؟
ن: وينتا ؟
ف: يوم العرس
ن: يعني لما اخدوني وتجوزت ؟
ف: اه من الصبح يعني انو فقتي واجو البنات , مش بيعملوا حفلة حنا للبنات والعروس , اه , احكيلي هالأشيا وهيك؟
ن: إلا حبيبتي حنوني وحنو رفايقي إلي كانو حوالاي وكانو يحنو شعرها
ف: ليه ؟
ن: شو بعرفني , يشقروها.
ف: اه يعني كانو يحبو الشقر ؟
ن: شوبعرفني هيك كانو يعملو
ف: اه وشو لبستي يوم العرس ؟
ن: بدلات !
ف: اه غيرتي البدلات ؟
ن: اه
ف: اه هني مثلا كانو يلبسو الصبح بدلة زرقاء و بعدين يغيرو , انت شو كانت الوانهن ؟
ن: هاي العادة , كلياتن , وإلي يلبسوه اي بدلة سهرة زهر , وأزرق , إلي بدهن إياه والصبحية تلبس تياب بيج .
ف: اه ما لبستي فستان ابيض
ن: مبلا , يي
ف: فستانك خيطي عند حدا ؟
ن: لا جبولي اياه جديد يعني مخيط خالص.
ف: اه كيف كان فستانك اوصفيلي إياه .
ن: كان على طولي وكم طويل ومثل هل بدلات .
ف: ووين كانت حفلة العرس , وين عملتو العرس ؟
ن: انا كنت عند اهلي وهوي كان عند اهلو؟
ف: اه يعني ما عملتو حفلة مع بعض يعني بساحة الضيعة وهيك .
ن: لأ
ف: ليه
ن: ما كانت دارجة.
ف: اه كانت عاداتكو وتقاليدكو غير؟
ن: اه
ف: ومين ساعد وقت العرس بتحضير الاكل ؟
ن: اهل العريس .
ف: والجيران ؟
ن: الجيران بيجو كلن , اهل العريس والعروس بيعزمو وهني بيجو لعند اهل العريس والعروس .
ف: وين سكنتي بس تجوزتي ببيت لحالك ؟
ن: انا لما تجوزت لانه كل سلافي متجوزين وانا لحالي
ف: اه مش مع بيت عمك ؟
ن: لأ , كل واحد ببيته .
ف: وعمك ومرت عمك الن بيت لحالن ؟
ن: عمي توفى , مات
ف: ومرت عمك ؟
ن: مرت عمي ما طولتش فش شهرين وماتت.
ف: طيب وبفترة هل شهرين , انو انتي جديدة , ما تخانقتي انتي ومرت عمك ؟
ن: اعوذ بالله .
ف: كانت تعاملك منيح ؟
ن: اه وكانت تعمل كل اشي وتسترجي الكنة تعمل زعبرات وصياح وتخانق وتعمل حالا عنتر.
ف: وكم ولد خلفتي
ن: انا ما خلفت ولاد بفلسطين
ف: خلفتي هون ؟
ن: اه
ف: اه كم ولد خلفتي ؟
ن: انا خلفت 6 ولاد , 5 صبيان وبنت
ف: الله يخليلك إياهن
ن: البنت تجوزت وولادي تنين شهداء واربعة متجوزين , كل واحد قاعد ببيت
ف: وشوبتحبي بعد تحكيلنا عن فلسطين وايام فلسطين , شو بتتذكري ؟
ن: ايام فلسطين في ناس كانت تعلم ولادن الصبيان والبنات يتعلموا انو لتقدر تعرف تكتب اسمها يعني عهوى ما بتستوعب ام انن يعلموها وتصير معلمة ولمستقبلها القرارات ترجع إلها,اذا ما كان عندها مجال مال او جوزها فقير , اه فكانت تعلم ولاد او بنات بالمدرسة وهاي هالعيشة هيك .
ف: وطفولتك ما كنتو ترحو تلعبو , تطلعو على التلة , بالعيد مثلا تروحو على المراجيح ؟ او انو لإنو كنتو بنات ممنوع البنت تطلع من البيت وتروح على المراجيح وهيك؟
ن: ازا بدها تروح مثلا بالعيد تبقى تروح هيي وخواتها يروحويعيًدو وينبسطو اول يوم وتاني يوم وتالت يوم والسلام عليكم .
ف: هلأ انتي تجوزتي هون مش بفلسطين ؟
ن: انا , اه
ف: وين سكنتي هون بس اجيتي؟
ن: احنا قعدنا ببعلبك .
ف: يعني بس طلعتي من فلسطين اجيتي دغري على بعلبك ؟
ن: اه ؟ قعدنا ببعلبك بيجي سنة او اكتر.
ف: وبس تجوزتي وين سكنتي ضليتي ببعلبك او نقلتي ؟
ن: اه مانا بقولك ضليت ببعلبك وقعدنا ببعلبك , بعلبك منيحة هيي وما احلى العيشة فيها وبالصيف ما احلاها كنا مرتاحين بس بالشتا اوف اوف اوف.
ف: كتيير برد ؟
ن: شوفي ما اهونها وما اصعبها كانت بالشتا بس يجي الشتا تمطر شتا ,أي والله يعني هوي مش شتا .
ف: تلج ؟
ن: اه كانت تمطر تلج .
ف: وكيف نقلتو لهون , كيف اجيتي لهون ؟
ن: احنا كنا يعني إلي من ضيعتنا من شفى عمر كتار . قالو ياعمي سقعة هون وبدنا نضل هيك القرش اللي بنشتغل فيه ما بنلحق فيه بالشتا وروحنا لهون, لهون على طرابلس وشفنا انو هون بطرابلس فيو الواحد يشتغل بالشتا والصيف , أل مين بيحب ييجي , يعني بيجي شي 200 او اكتر عيال , سجلونا وجابونا بالبوصتات لهون هني يعني جماعتنا حبوييجو ألو الي بدو ييجي , بيجي معنا وحبينا هون انو ما فش تلج وما في اشيا صعبة .
ف: مبسوطة هون او مش مبسوطة ؟
ن: لحمدلله انا وولادي مبسوطين ومرتاحين بدار وحدة . ماشيين وين ما يسرلهن يقعدو يتأو ويقعدوا . لمن وصلنا هاي يمكن ما تعرفيها هاي البلد على حدود من داخل فلسطين كانوا يقولو احنا منحب الافلام واحنا منريدن واحنا واحنا , مين … ؟! الدروز عرفتي , , الدروز كان الن يد مع اليهود ومع دولة كمان مش عارفة شو اسمها كمان تابعة مع اليهود , اه كنا ماشيين ومعنا ولاد بيقولو لإمهن بدنا نشرب وبدنا نوكل طيب جيبيلنا بدنا نوكل وكان وضعن صعب , اجينا على طريق كانت بيادر …
ف: على طريق بعلبك ؟
ن: لا صرنا على حدود اللي بتجي هون على طرابلس .
ف: اه على ضهر البيدر .
ن: اه لمن صرنا هيك لادام شوي يعني لجاي صارو يبكو هل ولاد بدن يوكلو وما بيعرفو كانو لا دكاكين ولا اشي , اجت وحدة مرة كبيرة بالسن معانا قالتلو يا ولدي هاي إياها هون روح خدي ولادي اسقيهن وازا عندن شي يشتروه اشتريلن وطعمي ولادك , دوبن الي وصلو الا بيقولو للمرة الدرزية بدنا نشرب اسقينا يا خالتي , انتو منين , احنا كرتونا اليهود وبيطخو علينا , احتلوها امشو ا مشو ان ضليتو هون بدي اقبركو امشو يلعن ابوكو .
ف: يعني ما كانو مناح معاكو بس طلعتو؟
ن: الدروز
ف: بس الدروز ؟
3:6ن: قالولهن يعني الولاد والبنات طيب ليش هيك يا خالتي تعملو فينا , قالو ايش نعمل فيكو , بعتو فلسطين وقبضتو حقها وجايين هون تعملو حالكو فقرا وولادكو تبكي جوعانة يلا يلا ولا بدنا حدا يقرب يفوت على ضيعتنا , على ضيعة الدروز .
ف: وانتو لما كنتو بشفى عمر ما كانو جيرانكو يهود ؟
ن: يهود لأ , في دروز قاعدين بناحة واحنا بناحة .
ف: ما كنتو صحبي انتو واياهن ؟
ن: لأ صحبي وكل شي , هني بحالن واحنا بحالنا .
ف: اه يعني ما كنتو تفوتوعبيوت بعض؟
ن: لأ , يعني ان صارت مناسبة يعني ازا حدا ميت او اشي يروحو يقضو الواجب وازا عرس كمان هيك اما انهن يفوتو ويطلعو على بعضهن , لأ
ف: وما كان في عندكو جيران يهود ؟
ن: لأ , اعوذ بالله ولا كنا نعرف اليهود إلا هاي الي كانت حاكمة فلسطين الانكليز
ف: اه بريطانيا
ن: ايوه , كانو يعني حاكمين ويحكمو بالعدل ما يخلو درزي يتطاول على مسلم ولا احنا جماعتنا بتدخلو بالدروز يعني متل هاد المخيم الي يبقى هون بالمخيم احنا لحالنا وهني بحالهن , عرفتي كيف , وعشنا وقعدنا هناك واجينا من هناك ونزلنا من التلج والسقعة واجينا لهون وكبرنا, اه وفتك بالحكي لما كانت الدرزية تضرب بهل ولاد وتوز الولاد الي حدا تقلهن اضربوهن اقتلوهن هدول عكاريت ما بحبونا وزتو عليهن حجار يزتو علينا حجار وعلى الولاد وبيجي على النسوان وكان في واحد عسكري بيقولولو ابو محمود اسا اشوفو بعرفوحاطط تلت شرايط هون
ف: شو كان يعمل هوي؟
ن: كان هوي مسؤول على فرع , يعني مسلم ما درزي , رحلها قالها ايه ليش قاعدي بتزتي حجار عليهن بيقولولك بدنا نشرب اعملي معروف انطينا مي ليش ما بتقبلي تخليهن يشربو وليش ما بتخليهن يشربو مي من النبعة الي حدك , ما قبلت ترد عليه , مابدنا نشوف حدا , قلهن ياشباب ضربو الضيعة جايب يجي عشرين , ثلاثين شب كلهن مسلحين اجو , هوي هاد ابو محمود المسؤول قلهن هاي يروح قدهن على مرتين ولا ينجرح منهن من الحجار الي بتزتوها او البنات , البنات عرضنا وهدول ولادنا احنا ما منقبل تعملو علينا عناتر قلتلو احنا بدناش تيجو لعنا ولا نسقي ولادكو ونسقيكو , اجا قال وين بدكو تروحو؟ قلنالو بدنا ننزل عالضيعة هاي بلد مسيحية الرميش.
ف: اه , بالجنوب
ن: اه هون بالجنوب بس قلنالو هيك قال عشنو هادولا العكاريت الدروز لفو من الطرف بعتهن هيك ونزلو بالنزلة الرميش ومن هاي الناحة كمان بعت اكم شب , البنت الي تتأخر يركض يمسك ايدها يقلها تعالي ياعمو , انتو عرضنا اما الدرزية بالحجار تخبطنا هيي والي عندها وتوز الولاد ونزل معانا بيجي شي عشرين شب من هدول الي مع ابو محمود المسؤول تنن وصلون للرميش , يقولو المسيحية شو بتريدو , ايش بتريدو شو بيلزمكوقولولنا ؟ هلي بيلزمكو قولولنا عليه قلولن الدروز هيك هيك قالولنا وما خلونا نضل هناك صارو يقولو لبعضهن فضو اكم محل خلو هل الحريم تقعد ناس مسيحية .
ف: يعني المسيحية احسن من الدروز؟
ن: طلعو المسيحية عندن عاطفة وحنية على المسلم اكتر من الدروز , والله هاد ابو محمود يقلهن اليوم يومكو بس يحرك ايدو هيك تشوفي الي بيمدا يدو بهوا على الاسلام لاورجيه كان زلمة يعني مش حيلًا , لما كان يصرخ بصوتو كان يخوف بس احنا الله يساعدنا الكل بيحكمنا والكل بيعمل مسؤول .
ف: واحنا ما طالع بإيدنا شي.
ن: ها شفتي
ف: شكرا إلك يا حجة .