فتحية صلاح الخالدي ( ام حسن)

م: عرفينا عن حالك

ف: اسمي فتحية صلاح الخالدي ( ام حسن)

م: اي سنة خلقتي؟

ف: 1948

م: من وين من فلسطين؟

ف: من حيفا المدينة … يعني خلقت وطلعت.

م: شو بتعرفي عن فلسطين؟ ابوكي شي قالك؟

ف: الخير والخيرات وكانو.. فلسطين ام الخير وكتير حلوة ويوصفولي اياها.

م: لما نخطبتي قديه كان عمرك؟

ف: 12 سنة

م: كيف كانت الخطبة؟

ف: عادية

م: شو عملتو؟

ف: ما كان في شي اهلي متعصبين وممنوع العروس تطلع مع العريس.. ممنوع واذا بالبيت اهلي يفوت.

م: كيف تعرفني عليه؟

ف: اختو كانت تشتغل بمستشفى واخوي كان يشتغل بالمستشفى بيوم عزمها اخوي تيجي تتغدى عنا وتعرفت عاختو وعجبتا ومرة رحنا نجيب غراض للخياطة من عند صاحبو وهو كان، عم بحكي انا والزلمة شو بدنا غراض قام هو تدخل، حكيتو كلمتين ناشفين وطلعت من المحل، بعد بيومين اجت اختو هي واياه لعنا، انا شفتو عنا ما فتت وهلق بيحكي لاهلي، خفت كيف بدي افوت واما مبهدليتو للزلمة، قالتلي امي اعملي قهوة، الله يرحمو ابوي كان يضرب، كيف اعمل؟ عملت القهوة وفوّتا وقدمتا وطلعت، قالتلو اختو بعد ما طلعت شفتها، قالا لا ما شفتا وما عرفتا، انا شو بعد ما طلعت قلت الحمدالله ما في شي… تاني مرة اجا اتأكد فيني وصار النصيب…

م: هو من المخيم؟

ف: لا هو من برا، هو من هون من طرابلس بس احنا كنا ببيروت بمخيم شاتيلا.. وهو بيشتغل ببيروت والو اخت ببيروت كمان..

م:وافقتي دغري لمّا حكو؟

ف: انا شو الي اوافق.. ممنوع احكي.. خلص اجاها واحد خلص,, ما متل هلق.. اذا وافقو الاهل خلص مع انو هادا غلط سبحان الله.

م: مين اجا معو وقت اجا يخطبك؟

ف: اخو، مرت اخو، اختو، صهرو والعيلة.

م: كان في حدا معارض من اهلك؟

ف: اه كان ابوي شوي متردد.

م: شو السبب؟

ف: هو كان خايف من شغلة… اخو كان يمثل، فكان ابوي يخاف انو بكرا يوخدوني امثل..

م: مين اتدخل لغيّر ابوكي رأيو؟

ف: اجا واحد اتصلو فيه يحكي معو واجا الزلمة وحكا مع ابوي وصار النصيب.

م: كيف كان وضعو المادي؟

ف: ما كتير.

م: اذا كان العريس فقير، كان الاهل يقبلو يعطو؟

ف: ما كانو يقولولأ, ما كانو يتطلعو على المادية.

م: اديه كان مهرك؟

ف: اتفقوا هو واهلي الف ليرة مقدم، لما رحنا عكتب الكتاب، قالوا اخوي قديه المقدم قالو 1500 ليرة، زاد المقدم 500 و المتأخر 2000 ليرة، هلق  ما حدا بحكي فيها لل 1000، لما اجيت وعرفو انو زادوني 500، عصّب ابوي شو هي أحسن من البنات.. انو احنا اتفقنا على 1000 ليرة، ليه يزيدو 400 قال اخوي هيك مهر اختي.

م: وقت الخطبة؟ عملتو قراية الفاتحة بالبيت؟

ف: اه بالبيت وما عملنا شين قعدة عادية واختو لبستني المحبس بس.

م: لما اشتريتي ذهب مين راح ؟

ف: راحت اختو واهلو … اجت اختو لبستني خاتما وراحو جابولي.

م: شو جابولك؟

ف: جابولي محبس و6 اساور وما كان في ليرة ذهب.

م: وقت جهازك شو جبتي؟

ف: اهلو حابو خزانة وتخت وكنبايات.

م: بعد قراية الفاتحة ما قعدتو سوا؟

ف: مبلا قعدنا وبس تأخر الوقت راحو… لما كان يجي وما يلاقي اهلي، ما كان يفوت

م: وقت كتب الكتاب قديه كان بعد خطبتك؟

ف: كان قبل عرسي ب 15 يوم.

م: اديه ضليتك مخطوبة؟

ف: سنة وشوية.

م: ما قعدتي معو؟

ف: لأ اهلي ما كان يهون عليهن.

م: وين كتبتي الكتاب؟

ف: ببيروت بالمحكمة، والشهود من المحكمة.

م: مين حدد العرس؟

ف: ابوي، انا قعدت مع اهلو بالبيت.

م: شو حضرتو للعرس؟

ف: امي حضرت الاكل وهني كمان ورتبو الغرفة وامي عادي يعني.

م: مين عزمتو على العرس؟

ف: الجيران والقرايب واهليتو واخواتو وامو وهيك.

م: وقت العزيمة مين راح عزملك؟

ف: اختي راحت عزمتلي.

م: كانت تدق على الباب ولاّ كان في مكتوب؟

ف:لأ كانت تقول بكرا عرس اختي، تفضلو وهيك.

م: ما عملتي سهرة قبل العرس؟

ف: اه

م: احكيلنا على السهرة.

ف: قبل بيوم عملولي سهرة وصرت ابكي وهيك، كزا مرة يزبطولي الكحلة وهيك، ويقولولي خلص.

م: شو لبستي بالسهرة؟

ف: كزا بدلة

م: كم وحدة؟

ف: 3

م: شو الوانن؟

ف: زهر واسود وموف واحمر

م: اشترتيهن؟

ف: لاء خيّطتلي هني بنت عمي ( اختو)، هي خيّطتن.

م: احكيلنا عن العرس؟ الزينة والاكل وهيك.

ف: امي عملت الاكل، جابولي سلق ومتبل الضلوع وما بعرف شو اكلو المعازيم.

م: البدلة اشترتيها؟

ف: لأ أجار.

م: طلعتي من شاتيلا على طرابلس بالبدلة؟

ف: لاااا، قعدت 3 ايام عند صهري وبعدين اجيت بالطقم لهون.

م: حفلة العرس وين كانت؟

ف: بالبيت عنا ما متل هلق في صالات، يا عالسطح يا بالبيت..

م: لمّا اجيتي عطرابلس وين قعدتي؟

ف: عند بيت عمي.

م: شو طلّعتي معك؟

ف: تيابي يالي خيّطتن.

م: كيف كانت العلاقة مع بيت عمك؟

ف: كتيرة حنونة وقلبا طيب،قعدت معا 13 سنة معها بالبيت حياة سعيدة، ما كان في مشاكل ولا شي

م: اذا صار في مشاكل بينك وبين جوزك مين يحلها؟

ف: مرت عمي هي تحكي معو وتخانقو لو كل الحق عليّ تيجي معي بس لمّا يطلع من البيت تحكي معي وتقولي انت الحق عليكي، ليه عملتي هيك وهيك بالهدواة وبس الحمدالله الله يرحما…

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: