فاطمة من الزوق.

ح: عرفينا عن حالك شو اسمك؟

ف: اسمي فاطمة  

ح: اي سنة خلقتي؟

ف: 1981

ح: من وين من فلسطين؟

ف: انا من الزوق

ح: شو بتعرفي عن فلسطين؟

ف: ما بعرف شي، غير انو بلد عادي وكانوا يزرعوا ويشتغلو بالارض.

ح: اديه كان عمرك لما نخطبتي؟

ف: كان عمري 14 سنة

ح: كيف تعرفتي على خطيبك؟

ف: جاري الباب بالباب.

ح: يعني كنتي تعرفيه من قبل؟

ف: لا، هو جاري بس ما كنت اعرفو وهني اصلن من بيروت، اجو لهون وقت الاحداث

ح: كان في علاقة؟

ف: آه، نظرات وضحكات يعني هيك شي.

ح: كان في حدا من العيلة بعرف؟

ف: اه اخوي

ح: على زمانكو اذا اجا شاب من برا المخيم بدو يطلب وحدة من المخيم كانو يعطوه؟

ف: اه كانو يعطو عادي.

ح: انتي وافقتي عليه او حدا اجبرك؟

ف: انا وافقت عليه، هني ما اخدو رأي بس انا كنت موافقة عليه.

ح: مين اجا من اهلو كرمال يشوفك؟

ف: ابوه

ح: مين جاب معو جاهة لحتى يخطبوكي؟

ف: ابوه واخوه، ما جابو كتير عالم

ح: كان في حدا معارض؟

ف: اه، امو واخوه وستي كانو معارضين، انو انا كنت صغيرة بالسن وهو مأضي ومصدي وعايش ببيروت وكانو خايفين عليّ، وبعدو مش مأمن حالو.

ح: كيف حليتو الخلاف؟

ف: هو ما كان في خلاف كتير، وما حدا إتدخل ليحلّوا هل الخلاف.

ح: كيف كان وضعو الاقتصادي؟

ف: معتر.

ح: وكيف كان وضع الناس الاقتصادي؟

ف: نفس الشي

ح: كانو يهتموا  بوضع العريس الاقتصادي اذا بدو يخطب؟

ف: في ناس بتهتم وناس حسب، يعني اخواني كانوا متشددسن وما كان عنا اختلاط مع الناس يعني ما بعرف

ح: اديه كان مهرك؟

ف: مقدم 10000 ليرة والمأخر 15000 ليرة

ح: كان في خلاف على المهر؟

ف: اه ابوي كان بدو 25000 وعمي ما قبل غير 15000 واختلف ابوي وعمي.

ح: كيف حلّوا الخلاف؟

ف: كان جوزي بدو ياني وبدو يوخدني وقال لابوه اعطيهم زي ما بدهم ، بس ابوه ما قبل غير 15000 وامي غمزت ابوي انو يوافق ومشي الحال.

ح: مين راجح جاب دهب الخطبة؟

ف: ما كان في دهب زي اسا، كانت الوحدة تجيب حلق وساعة وخاتم واذا معو مصاري بجيب سنسال واسوارة.

ح: انتي شو جبتي؟

ف: حلق وساعة وخاتم.

ح: مين راح جابن؟

ف: انا وياه وامي جابت الخاتم مش هوي.

ح: شو لبس هوي وقت الخطبة؟

ف: لبس عادي، قميص وبنطلون.

ح: وانتي شو لبستي؟

ف: بدلة لون اصفر.

ح: شو كان جهازك؟

ف: جابولي كل شي يعني اواعي وفي ناس بتطلع ادوات مطبخ حسب بس احنا هون ربيانين بحارة، امي فلاحين يعني العروس ما بتطلع معا شي، كل شي على العريس، هو بجيب كل شي.

ح: شو كانت العادات والتقاليد على ايامكو وقت الخطبة؟

ف: ما كان عنا قراية فاتحة زي اسا، دغري كتب كتاب.

ح: خبرينا عن حفلة الخطبة؟

ف: حفلة عادية، مش زي اسا في صالة وقاعة يعني بالبيت، كانت عادية يعني سوينا اكل ورقصنا بس.

ح: كنتو تضهرو سوا لحالكوا؟

ف: اه وكان يصير مشاكل.

ح: وين كتبتو الكتاب؟

ف: بالبيت

ح: مين حدد موعد العرس؟

ف: جوزي لانو كترت المشاكل يعني كل ما نطلع سوا  يساووا مشكلة.

ح: كان في اختلاف؟

ف: لأ هني كانو حابين انو نتزوج.

ح: مين عزمتو على العرس؟

ف: الاهل والقرايب والجيران.

ح: كيف كانت طريقة العزيمة؟

ف: ما كان في كروتة، يعني نبرم وندق على الباب ونعزم العالم.

ح: مين راح من جهتك عزم؟

ف: خواني واخوتي واهلي.

ح: وهو مين عزملو؟

ف: أهليتو, اصلن ما كان في حدا، اهلية بمحلية.

ح: عملتي سهرة قبل العرس؟

ف: لا

ح: فستان العرس خيّطتيه او استاجرتي، وجوزك؟

ف: استأجرتوا، لأ هوي اشتراها.

ح: وين سويتو العرس؟

ف: هون بالبيت، كان في حكورة وسوينا العرس.

ح: شو كانت تحضيرات العرس؟

ف: ولا شي، انا بروح على الكوفيرة وهوي عند الحلاق، ما في زينة ولا شي، امي ساوت اكل.

ح: سكنتو بهادا البيت؟ وكنتي عارفي انو بدك تسكني بهالبيت؟

ف: اه

ح: كيف كانت علاقتك مع بيت عمك؟

ف:الحمدالله كتير منيحة ولحد اسا وبرغم انو حماتي نكدة بس احنا مناح معا.

ح: وعلاقة جوزك مع حماتو؟

ف: منيحة وهوي زي ابنها وبتحبو كتير.

ح: اذا صار خلاف مين كان يتدخل؟

ف: اهلي من النوع الي ما بحبو البنت تتطلق او شي، ودايما بيجو مع جوزها عليها، يعني ما حدا بدخل.

ح: أكم ولد عندك؟

ف: عندي خمسة.

ح: الله يخليلك هني, شكرا الك .

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: