عليا راجي

ف: طيب يا حجة بتعرفينا عن حالك؟ شو اسمك؟

ع: اسمي عليا

ف: عليا شو؟

ع: عليا راجي

ف: من اي بلد من فلسطين؟

ع: من صفد

ف: اديه كان عمرك لما طلعتي من فلسطين؟

ع: سنتين

ف: يعني ما كنتي واعية لشي بالمرا؟

ع: ولا شي بالمرا، بعرفش اشي

ف: لما اجو اهلك لهون وين سكنو؟ بس طلعو من فلسطين، اول ما طلعو؟

ع: هون سكنو، بصور

ف: اه وضلن هون بصور؟

ع: لاء اخدوهن عالقرعون ما عجبتنش السكنة هناك قام رجعوا.

ف: وبعدكو محلكو؟

ع: اه بعدنا محلنا

ف: طيب هلاء بدك تحكيلي انتي بس وعيتي هون شو كانو اهلك يحكولك عن فلسطين، مثلا كيف كانت عاداتن وتقاليدن، كيف كانت حياتن شو كانو يعملو؟

ع: يزرعو ويفلحو وكان عندن غنم وخيل وهيك عايشين يزرعو، يزرعو حمص، يزرعو فول، هيك على حسب ما كانوا يحكولنا يعني  يزرعو ويقلعو، عايشين مبسوطين

ف: اه كانو مبسوطين؟

ع: اه وعندن بقر وغنم ويحلبو وهيك.

ف: وانتي كيف كانت طفولتك هون؟ بس كبرتي ووعيتي يعني؟

ع: ما كان عنا طفولي، شو طفولتنا.

ف: ما رحتي على المدرسة؟

ع: لاء ابوي ما خلانا الله يرحمو.

ف: ليه ما خلاكو؟

ع: ال انتو البنات بس تكبرو وتروحو على المدرسة بتروحو بترافقو الشباب.

ف: طيب انتي وصلتي لمرحلة انو صار لازم تتزوجي، اديه كان عمرك لما تجوزتي؟

ع: 16 سنة

ف: طيب هلاء كيف قالولك اهلك انو بدك تتجوزي؟ انو كيف فاتاحوكي بالموضوع؟

ع: ما فاتاحوني، ما في اختيار، اجو قالولي انتي بدك تتجوزي ابن عمك.

ف: طيب شو اجو حكو اول شي؟

ع: اجو قرأو الفاتحة هني العمام ببعضن عمامي.

ف: ما كان معك خبر انتي انو جايين ليقرأو الفاتحة؟

ع: دريت آخر شي، قالولي قرأو فاتحتك على ابن عمك وشو بدي اقول، فييّش احكي

ف: يعني ما اجو قالولك مثلا ابن عمك بدو ياكي؟

ع: لاء ما فيش منها هاي يشاوروني.

ف: طيب حتى ابن عمك ما معو خبر انو هني جايين يقرأو الفاتحة؟

ع: امبلا ابن عمي معو خبر.

ف: اه يعني بيقولولو للعريس وهو فيّو يقول اه او لأ؟

ع: اه فيو يقول لأ، العريس اه بس البنت لأ ، ممنوع.

ف: طيب لما اجو يحكو فيكي مين اجا معو؟

ع: عمامو.

ف: يعني ما جابو كمان حدا؟

ع: لاء بس ابوه وعمامو.

ف: اه

ع: هون اجو العيلة كلها وطلبوا وحددو والبيت والمهر؟

ف: اديه حددو المهر؟

ع: المقدم 600 والمأخر 200 كنّو.

ف: وهو شو كان يشتغل؟

ع: معلّم عمار وطوب.

ف: اغلبية الي طلعوا من فلسطين حتى الي ترّبو هون الجيل كانو يعمرو؟

ع: اه بيعمرو، بيتعلمو يعمرو، طلع من المدرسة، مادية اهلو ما سمحتلو، قعد شوي فيها وبطل، لو ماديتو كانت منيحة كان توظف بهديك الايامات، لانو كان بدن أساتذة.

ف: والبيت كان الو لحالو؟

ع: لأ غرفة، ومطبخ انو عايشين مع بيت عمي، كنت أكل واشرب مع بيت عمي.

ف: طيب هلأ مثلا بفترة الخطبة بيجي العريس بيقعد مع خطيبتو، انتي كان يقعد معك او ما كان في منها؟

ع: لأما كنش في منها هاي.

ف: انتي ما كنتي تقبلي او هي انو كانت ممنوعة؟

ع: انا بقعدش معو، هوي بغرفة وانا بغرفة.

ف: اه يعني ما كنتي تحكي معو؟

ع: لا ما كنت احكي معو، بالمرّا.

ف: يعني ما قعدتو تعرفتو على بعض؟

ع: ما هو من الاول كان يضل يروح ويجي لعنا. يعني مع اخواتي، اصحابو اخواتي، كانو يضلن يلعبو فوتبول ويجو لعنا، ابن عمي اللزم.

ف: طيب هلأ مين حدد موعد العرس؟

ع: اهل العريس.

ف: اه اهل العريس بيحددو، يعني مش بيتفقو اهل العروس مع اهل العريس؟

ع: لأ هني بيجو بيحددو موعد العرس، بيقولولهن طيب متل ما بدكو وهيك.

ف: طيب شو جهزتي لعرسك؟

ع: جهاز اواعي وخزانة بس تخوت ما جبنا، بس خزانة فصلناها.

ف: طيب وجهازك خيّطيه كلو او جبتي جاهز؟

ع: لا خيّطو كله حتى البدلة البيضة خياطة.

لأ ما في حفلات على الخطب، كانوا يذبحوا، يذبحوا خواريف ويعملو الحلو، ويتجمعوا العيلة

ف: اه يعني ما كان يصير في دق وهيك؟

ع: لأ ما كان في دق.

ف: اه يعني كانت من العادات والتقاليد يعملو اكل؟

ع: اه بس أكل.

ف: ووقت العرس؟

ع: ووقت العرس؟

ف: طيب وشو عملولك قبل العرس وليلة العرس، انو ضلت 3، 4 أيام وهيك؟

ع: اه ضلن 3 ، 4 أيام بس عند العريس.

ف: اه يعني عند العروس ما كان في هيك؟

ع: لا

ف: وما عملولك حفلة حنّا؟

ع: امبلا حنّوني.

ف: اه طيب حكيلي كيف هيك اجو وهيك يعني، مين اجا وشو عملولك؟

ع: قرايب العريس وقرايب العروس ما هني كلن ولاد العم، كانو يقولولها ليلة اليدّ يعني بكرا بدا تتجوز واليوم حنوها وبكرا بتتجوزها.

ف: وحنوكي؟

ع: اه جابو حنّا، ودق ورقص وكل شي وزغلطو.

ف: ما كان في هيك اشيا، اغاني كانو يقولوها وقت االحنا؟

ع: ايه مبلا

ف: طيب شو كانو يغنو؟

ع: كانو يغنو : “عالحنا عالحنا يا سيدي والله الحنا”

ف: ما حافظة غيرها انتي؟

ع: راحت تحت النفنوف وصارو يغنو؟

ف: شو النفنوف؟

ع: النفنفو يعني السجرة،” والحنا يمينا بيضة وسمينة تحت عرق التينا فيه البحر يعني” كانو يغنوها هاي ويرقصوا.

ف: طيب تاني يوم صار وقت العرس، شو عملتو من الصبح، كيف كانت العروس تجهز حالها، فستانك خيّطيه او جبتي خالص؟

ع: لا خيّطتو خياطة.

ف: طيب وبدلتي فساتينك؟ يعني كانو زمان الصبح تلبس فستان والضهر فستان..

ع: لا بس الفستان الابيض، في فستان كان كمان عالصبيحية، كان في صبحيات زمان والفستان الابيض وبس.

ف: ورحتي عند كوفيرة ولا ما كان في كوفيرات؟

ع: ولا كوافيرات ولا شي، كان في وحدة زمان إجت عملتلي وجي وشعري

ف: طيب وعملتو حفلة؟ ومين اجا؟ وعملتو غدا

ع: اه عملنا غدا

ف: شو كان الغدا؟

ع: مغربية

ف: طيب المغربية بدا وقت لتنعمل؟

ع: كانو يفتلوها قبل بيوم.

ف: مين الي كانو يفتلوها؟

ع: امي ونسوان عمامي والجيران يساعدو حتى كانو يزلغطوا ويغنو عالطبخ.

ف: طيب شو كانو يغنوا؟

ع: شو بيعرفني يغنو، يقولو لمين هل المنسف ومدري شو وهيك.

ف: يعني ما حافظة شو كانو يقولو؟

ع: لا شو بعرفني، شو كانو يقولون العريس واهل العريس ومدري شو.

ف: طيب مثلا بيجو بيوخدو العروس من بيت اهلها وبيوخدوها على بيت العريس، انتي اجو أخدوكي؟

ع: اه الاّ اجا اخدوني بسيارة من هون طلعنا بالسيارة من هون من المخيم.

ف: اه بقيتي ساكنة هون بالمخيم؟

ع: اه عند بيت عمي، كانو ييجوا ياخدونا بالسيارات

ف: اه يعني ما كان في احصنة؟

ع: لا الاحصنة كانت عأيام فلسطين، عأيامنا بالسيارات

ف: طيب وبليلة العرس رحتي عند بيت عمك، ما عملتي حفلة وهيك؟

ع: مبلا

ف: وما بتتذكري شو غنيتو بليلة العرس؟

ع: والله هني غنوا، الا مالن بس ما بعرف شو كانو يقولو.

ف: حتى بليلة العرس ما بيجمعو العريس مع العروس مثلا هلاء انو التنين مع بعض مثلا بصالة

ع:لأ لأ.

ف: بيعملو حفلة للعريس وحفلة للعروس؟

ع: بيجي امو وابوه واخواته وعمامو وهيك يجو ياخدوني، ابوي الي طلعني من البيت وهني اخدوني.

ف: طيب وبس خلص العرس وين سكنتي؟ دغري سكنتي عند بيت عمك؟

ع: بغرفة عند بيت عمي.

ف: وبقيتي مع بيت عمك؟

ع: ضليت معن سنة كاملة ما طلعتش وبالاخر هي مرت عمي طلعتني، كنا مع بعض نوكل ونشرب يعني وكل شي.

ف: ليه زمان كان يلبسو من الصبح فستان زهر؟

ع: أبصر هيك يلبسوا زهر.

ف: ما كانو يلبسوا غير زهر، مثلا ازرق وهيك؟

ع: لأ بس زهر، حتى انو هو زهر معرق.

ف: هاي كانت عادات وتقاليد عندكو بس او بكل فلسطين؟

ع: احنا كنا هون بلبنان.

ف: اه بس انو هني من زمان.

ع: هني هناك زمان، ما كانو يلبسوا هيك، يلبسوا اواعي عادي مش متل هون فساتين وفستان ابيض وما كانو يلبسوا بدلة بيضا هناك بفلسطين، بدلة عادية يعني عليه هيك برق وما برق وهيك شغلات

ف: طيب واكم ولد خلفتي هون؟

ع: خلفت 4 ولاد وخمس بنات

ف: الله يخليلك اياهن، ورجعتي نقلتي على هاد البيت

ع: اه اشتريناه

ف: هوي كان هيك ولا انتو زبطتو فيه؟

ع: لأ ما كان هيك، كان بالمرّا.

ف: كان اصغر ولا اكبر؟

ع: لاء هوي هيك اشتريناه خالص.

ف: طيب شو بعد بتحبي تحكيلنا عن العادات والتقاليد؟ او مثلا انو اذا رجع الزمن فيكي لورا بتتجوزي ابن عمك او مثلا كنتي تحبّي يكون الك رأي انو تقولي لأ ، انا ما بدي هل الشخص؟

ع: لأ ما في الكلمة بتضل للأهل.

ف: مثلا اذا كانو اهلك بيسمحو تقولي لأ ما بدي اياه، كنتي بتقولي لأ  ما بدي اياه؟

ع: ما كنش فيكي تقولي.

ف: واذا حكيتي وقلتي ما بدي شو بيصير؟

ع: ما بيصير شي بس انو هوي الاختيار للأهل، للأب والام حتى انو الابو اكتر شي، الام مش كل هل القد.

ف: طيب شو حابة بعد تخبرينا عن العادات والتقاليد او شي كنتي حابة يصير وما صار انو بيوم عرسك مثلا كنتي حابة يصير اكتر مثلا حفلة وهيك؟

ع: بهديك الايامات ما كان في حفلات.

ف: مثلا على ايام فلسطين كان العرس يضلو 7 ايام، كنتي تحبي هيك او عادي؟

ع: لا عادي، ما شي، ما شرط.

ف: بتتذكري شو عملولو للعريس انو حفلة وزفة؟

ع: اه الاّ زفوه وقرايبو وهيك.

ف: اه انتي شفتيه؟

ع:لأ  ممنوع اشوفه، انا قاعدة بالغرفة وين بدي اشوفه، ممنوع اشوفه لليلة العرس، ليلة الدخلة يعني، ممنوع امشي معه كمان، مرة كنا نتحكم بالبص هو وراكب على البسكليتة قلي يلا بدي امشي معك قلتله شو تمشي معي، انا بعرف انك خطيبي بس الناس ما بتعرف انك خطيبي، قال انو بدن يقولو اخوها؟؟لأ  ما رح يقولو اخوها هادا واحد ابصر مين ماشية معو، قلتله لأ يا عيني روح الله يسهلّك، اما اليوم بتشوفها ماشية معه دغري

ف: هلق هي بتقله امشي معي.

ع: لأ احنا منرفض، منرفض يمشي معها لانه البرّاني ما بيعرفو انو خطيبي، بيعرفو شي؟ لا ما بيعرفوا، اه فمنخاف من حكي العالم، لحتا نستحي كتير قبل مش متل هل الجيل، هل الجيل هيك عينها، بتوقف مع ابوها واخوها وهو ولا معن خبر ولا شي، بس احنالأ  منستحي، هوي بغرفة واحنا بغرفة

ف: طيب بتحبي تقوليلي شي هيك؟

ع: شو حابة تعرفي؟

ف: اي شي عن العادات والتقاليد؟

ع: لما بدا تنخطب الوحدة بيروحوا ببعتو وحدة، يعني ان شا الله هي كمان تروح تنقي محبسها؟ ممنوع تروح.

 ف: طيب انتي وقت خطبتك مين راح جبلك محبس خطبتك؟

ع: هني جابو المحبس وبسرعة.

ف: اه يعني انتي ما رحتي جبتيه؟

ع: لاء اجو اخدو مقاس اصبعي، كنت لابسة خاتم اخدو وجابو على قياسو، ما منروح احنا، حتى المكياج وكل شي هني بيجيبوه، اه انتي ما الك خصة.

ف: وحتى جهازك ما بتجيبه انتي؟

ع: لأ بتروح وحدة صبية بتساعد العروس يعني، هي بتجبلها كل شي.

ف: ولا امك كانت مثلا تروح؟

ع: لأ ، ولا امي. بيروح العريس واهل العريس وبينقو، وحدة بتروح معن، هيك صبية متجوزة وبتعرف بهيك اشياء، قمصان نوم وما قمصان نوم، شلحات وما شلحات واواعي داخلية.

ف: انتي برايك مين أحلى، عادات هلق او عادات قبل؟

ع: لأ عادات قبل احلى والله، مثلا يعني وقت العرس كانت الشباب لحال والبنات لحال، ما كان مختلط ولا مشاكل ولا من يحزنون، فش مشاكل، البنات لحال تدبك وترقص والشباب لحال، ان شاء الله بيجي بيرقص معها للعروس، ممنوع، نهار العرس ممنوع يرقص معها، بيضل عند الشباب.

ف: طيب كنتي حابة انتي تغيري بدلاتك يوم عرسك، انو بدلة زرقة وبدلة زهر وهيك؟

ع: ولا بدلة زرقة ولا حمرة، هني راحو وجهزو وخيّطو يعني، احنا من المصاري يعني من المقدم جبت ذهب وجبت حلق وكل اشي، زمان كان رخص مش متل هلق، كنتي تجيبي الي بدك اياه، هل الايامات ما فيكي تجيبي شي، الله يساعدنا. وهاي هي قصتنا، بفلسطين كانوا يحبّوا، في وحدة حبتو هي الي بدا اياه، حبّتو وحبّا وهي مخطوبة توّفت، حلف يمين والله ما يتجوز ومات وما تجوز وما اخد غيرها، من كتر ما كان يحبها، ما اخد غيرها، كان يضل حاطت صورتها، حزنان عليها. اه والله وما تجوز وما تجوز، ويحاكو اخواتو انو اتجوز وهيك وانو بيجيك ولاد ما قبل.

ف: واهلها كانو عارفين انو بيحبو بعض ولا بالسر؟

ع: اه بيعرفو لكان.

ف: وطب واذا الاهل عرفو شو كان يصير؟

ع: ما كان يصير اشي.

ف: ما كانو يضربوها؟

ع: لا ما كانو يضربوها، كيف بدن يضربوها! ان كترت ما بيعطوها اياه، اما يضربوها لأ ، شو بالقوة، الحب كان بالاخلاص.

ف: هههه هون ما في حب.

ع: هناك الحب بالاخلاص يعني حب من القلب من جوا من القلب مش متل اليوم، يا يضحك عليها يا تضحك عليه.

ف:  او هني يضحكو على بعض؟

ع: الحب زمان غير اليوم، حب من القلب مش متل اليوم عاملها تسلية للبنت، يعني بيتسلى فيها، واذا عرفوا اهلها ما بيعطوها اياه، اذا كان يحبها بالسر واجا طلبها بالسر بيقبلو، انو اذا كانو ما بيعرفوا انهن بيحبو بعض، اه بيعطوها اياه.

ف: طب وانتي ما كنتي تحبي تتعلمي؟ انو ما كنتي تحبي الدراسة؟

ع: انا كنت قاتلة حالي على الدراسة، بس ابوي الله يرحمو حرمني، اخواتي اتعلمو، اخوتي الاثنين الشباب بس انا واختي ما تعلمنا، اختي قولي اتجوزت بفلسطين، بس انا قتلت حالي بدي اتعلم، بس الله يرحمه ما رضي يخليني، شو بدنا نعمل، لا حول ولا قوة الا بالله.

ف: طب امك ما كان الها رأي انو خليها تتعلم وهيك؟

ع: مبلا، بس ما قبل ابوي، الكلمة كلمتو، كان كل شي الابو، الام ما الها شي، الابو كل شي.

ف: يعني مش متل هلق ؟

ع: لأ، اسا الام الحاكمة، اه اليوم الحاكمة والي بدا تتعلم بدا تتعلم غصبن عنك مش بخاطرك، اه والله انا قتلت حالي لأتعلم، بس بناتي ما حبيت انو يتركو المدرسة لاني انا ما تعلمت والله ما حبيتن يطلعو، بس غصبن عني طلعوا، بحب البنت تتعلم لاني انا انحرمت من العلم، الله يرحمهن شو بدنا نعمل.

ف: احنا اخدنا ناس من فلسطين انو كيف كانت العادات والتقاليد زمان، ولما طلعوا كيف اتغيرت وهيك حتى الجيل الي هلق  الي عمرو مثلا 70 او 80 سنة كيف اتغيرت العادات لانو معش في العرس متل قبل، فا احنا بدنا نشوف شو الفرق وشو الي ضل من العادات والتقاليد

ع: ايام زمان واعراس زمان احلى بكتير من هلق، يعني اليوم الكنّة ما بتقعد مع بيت عمها، انا والله ما كان بدي اطلع من عند بيت عمي بس مرت عمي طلعتني، كنا متل الولاد الصغار انا وجوزي والله. ما بدنا نطلع، قلنالا ما بدنا نطلع، انو ليه بدنا نطلع، قلتلنا امبلا، لو بدكو توكلو خبزة وبصلة، كلو الي بدكو اياه، بلكي أكلي ما عجبكو،لأ  توكلو وتطبخو لحالكو، وانا كنت اغسلهن الغسيل واجلي الجليات، بيجو من الشغل يلاقو كل شي خالص، الطبخة مطبوخة ونوكل سوا، حتى لما نقلت على بيتي كنت اضل عند بيت عمي، نطبخ ونوكل سوا، مش متل اليوم، لو بتشوف بيت العم مشنوقين، الكنّة ما بتتطلع فيهن، لأ كنا غير احنا، نشفق عليهن يعني، نخبزلهن ونطبخلن والي بدن اياه يصير كله، كانت مرت عمي وبنت عمي يشتغلوا اي ساعة، يجو الساعة 3، شو بدن يعملو الساعة 3، ما فيهن يطبخو ولا يعملو شي، يلاقو كل شي خالص، احنا جيلنا بيتحمل، هاد الجيل ما بيتحمل يقعد يوم مع بيت عمو، انا عندي 3 كناين، الله يخليلي اياهن، مرت عمي هي اختارتني، يعني هي اجت واختارتني الي، كانت تقاتل ابنها عشاني، كنت بس ازعل، ازعل عند بيت عمي، ما اروح عند بيت اهلي، تقلي تعي اقعدي معي، وممنوع تطبخيلو شي، خليه يوكل خبز حاف، مين لي كانت تيجي مع كنتها وتترك ابنها، مين؟

ف: وهلق حتى نفسية العالم صارت غير، يعني حتى الحما ( مرت العم) انو الام لما تجوز ابنها قال ما ترضى الشغلة على بنتها، بس ترضاها على كنتها وهيك.

ع: انا الحمدالله لاء، انا مجوزة بنتين بالرشيدية والله صهورتي، جواز بناتي بحبوني اكتر من امهم لانه ما بتحشر لا ببنتي ولا بجوزها، بقلهن بيت عمكن بدكن تعاملوهنن كانهن اهلك، اهلك هني الي اشتروكي مش اهلك يلي باعوكي، بس الكنة بهل الايام صايرة كتير مزنتعة، وفي حموات ما بينطاقو، مش كلن زييّ وزيّ غيري، هياها كنتي كل يوم بتيجي الصبح بتجيبهن لعندي، بتيجي من الروضة هي وولادها، بتيجي بتنطر ساعة ساعتين ليجي جوزها، ولا شي متل بنتي بعاملها وما بحشر حالي، ان شاء الله بدها اتكب البيت كلو، انا ما دخلني فيهن.

ف: طب شكرا يا حجة.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: