عزيزة حسن

م: شو اسمك يا حجة؟

ع: عزيزة حسن

م: اديه عمرك؟

ع: يمكن مواليد ال 26، معي وراق قديمة.

م: من وين من فلسطين؟

ع: قضاء صفد

م:  شوبتعرفي عن فلسطين؟

ع: كل شي، عنا ذرة وقمح وسمسم ولوبيا وشعير من جميع الحبوب، عنا جاموس وبقر وغنم وجمال وبيوت…

م: كيف كانت طفولتك بفلسطين؟

ع: كنا نعمل حصر مع ابوي، نعمل بيادر وكنا نروح عند ابوي نحصد بطيخ نوخدلو اكل ونطعمي العصافير ذرة ويشويلنا ذرة ابوي.. وبيجو رفقات ابوي يقعدو نوكل بطيخ

م: اديه كان عمرك لما نخطبتي؟

ع: 15 سنة.

م: كنتي تعرفيه؟

ع: ما كانت الوحدة تعرفو الواحد لتفوت عبيتو… هو ابن عم ابوي.. كنت اشوفو بالارض، حد ابوي بس ما في حكي..

م: مين اجا طلبك؟

ع: جاب جاهة وشيخ.. مختار البلد واهلو كلهن.

م: اخدو رأيك؟

ع: اه اخدو رأيي بس ما كان في عنا بنت تخالف رأي أبوها. قلي بدك اياه قلتلو اه وهو اختارني وشافني وقال بدو ياني.

م: كان في حدا معارض؟

ع: لاء العيلة كان الها خاطر لأنو طيّب.

م: اذا اجا حدا من بلد تانية كانو يعطوه؟

ع: اه كان يعطو… ويجو الدبكة 3 ايام بس الوحدة بدا تنخطب.

م: كان معو مصاري؟

ع: اه كان عندو اراضي وبغال وكل شي.. وبيت.

م: لو كان فقير كانو ما قبلو؟

ع: ما كان في حدا فقير، كلو كان عندو ارض وبيت وجاموس وهيك.

م: اديه كان مهرك؟

ع: انا بدل.. اخدنا 900 ليرة لبناني مقدم

م: لمّا اشتريتي ذهب مين راح معك؟

ع: كانت الام تروح تجيب خواتم واساور وفضة.

م: شو العلامة لخطبتك؟ شو جبلك؟

ع: ما جبلي شي… بجيب خروف ومندبحو ومنطعمي العالم… بس ما منجيب محبس

م: شو جبتي جهاز للعروس؟

ع: هو جبلي جهاز، جبلي فستانين وكنا نلبس حطّة وشمبر.

م: شو الشمبر؟

ع: الشيلة ونحطلها حطّة.

م: شو جبلك العريس؟

ع: امي جابتلي شوكة و 6 اساور فضة، كانو يجيبو للعروس أساور يهودية، جبلي العريس فستانين وتياب داخلية وحطة وشمبر وامي طلعتلي فرشتين ولحافين و 4 مخدات

م: ما جبتي طناجر وهيك؟

ع: ما في تجيبين بتيجي على البيت مجهّز خالص

م: شو العادات والتقاليد بالخطبة؟

ع: كنا ندبح خروف او اتنين وكل الناس تيجي وتفرح وتاكل..

م: ما قعدتي معو؟

ع: لاء والله ما شفتو غير لما فتت عبيتو، كان يجي يقعد مع اهلي واخواتي وانا لأ. كانت الوحدة تسترجي تحب واحد.. او يقعد هو واياها..لأ.. لو اجا زارني تضل الوحدة مقبورة قاعدة بالغرفة

م: وينتا كتبتي الكتاب؟

ع: قبل العرس رحنا على صفد المدينة كتبنا الكتاب انا وهو وابوي.

م: موعد العرس مين حددو؟

ع: العريس كانو متفقين.

م: شو حضرتو للعرس؟

ع: جابو تمر وراحة ويعملو الفرحة ويدبحو غنم ويعملو لبن وكانو يعملو رز للعريس وبرغل ونعمل مناسف ولبنية يعملو القرايب واهل الضيعة ييجو.

م: كانو يعملو حفلى للعريس والعروس لحال؟

ع: كانو بعد الغدا يعملو دبكة، كلن البنات والصبايا.. الكل كان اخوات.

م: اشتريتي فستان عرس؟

ع: اه لون بيج وحطّة حمرا على راسي، ما حدا يشوفني.. ما حدا يفوت عالعروس غير البنات

م: اكم يوم احتفتلي؟

ع: هني كانو يصلو الجمعة و 10 ايام وانا لإن عندو مرا احتفلنا يوم.

م: شو يعني عندو مرة؟

ع: يعني متجوز قبلي.

م: كيف قبلتي؟

ع: لان قرايبنا واهلي بدن والبنت بس تكبر تتجوز.

م: مين عزمتو؟

ع: كل الضيعة والقرايب والاهل.

م: مين الي عزملك؟ وعزملو؟

ع: اختو راحت عزمت وهو راح عزم بالمكاتيب كل العيلة والضيعة.

م: شو لبس العريس وقت العرس؟

ع: قمباز مخيّط خياطة كنا كلو نخيّطو ما نشتري شي.

م: شو لبستي بالسهرة؟

ع: فستان العرس، كنا نهلل وغنا وعود.

م: حفلة العرس وين كانت؟

ع: يعملوها وين مكان, بالساحة قدام البيت.

م: كيف كانت العادات؟؟ بيجو يوخدوكي من البيت؟

ع: ما الو حدا اجت اختو طلعتني.

م: وين قعدتي؟

ع: ببيت لحالي هي ببيت ( مرتو التانية) وانا ببيت واهلو ببيت.

م: صار في مشاكل عشان ما قبل اخوكي يوخد اختو؟

ع: لأ ما صار شي اصلا تجوزو  ورجعو اتطلقو

م: شو كان عندك فرش بالبيت؟

ع: كنا نجيب صندوق وغراض المطبخ وطناجر وشلحات وشنبرين وامها تشتريلا طناجر ومعالق ونحاس وصحون فخار ويعملو كبتة ( خزانة) على العرزال يحطوها من فوق متل النملية يحطو فيها اكل ويحطو اللبن والطنجرة الي فيها أكل.

م: كنتي تعرفي تطبخي بس تجوزتي؟

ع: كنت اعرف، كل العالم تيجي تتفرج على خبزي.

م: كنتي متفقة انت واياها لمرتو التانية؟

ع: كنت صحبة انا واياهان كنت اغسل الي والها واحممها، كانت اكبر مني، كانت ساكنة حدي.

م: خبرينا عن مرت جوزك؟

ع: ما كنت احكي مع مرة كبيرة، هي كانت متجوزة قبلو.

م: اديه كان عمرو بس تجوزتيه؟

ع: 50 سنة

م: كان عمرك 15 سنة وهو 50؟؟؟

ع: ممنوع تطلع البنت من العيلة وتوخد على خاطرها.

م: مرتو اديه كانت مخلفيتلو؟

ع: صبيين وبنتين ماتو.

م: ما شفتي بيتك قبل ما تتجوزي؟

ع:لأ ممنوع، انا اجيت يوم العرس، جبت معي الصندوق وفرشتين و4 مخدات.

م: كنتو تعملو قص زمان؟

ع:لأ.

م: اديه اعدو يطبخولك؟

ع: اول يوم بس وباقي الايام ايدي وايدها.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: