رندة محمد حميد.

بتعرفينا عن حالك، شو اسمك؟

ر: رندة محمد حميد.

م: اي سنة خلقتي؟

ر: 1960

م: من وين من فلسطين؟

ر: من يافا، من فلسطين

م: شو بتعرفي عن فلسطين؟

ر: كانو عايشين مبسوطين واهلي كان عندن اراضي وقهوة واحلى عيشة ومبسوطين، ابوي كان يحكيلي لان امي لبنانية.

م: اديه كان عمرك بس انخطبتي؟

ر: 28 سنة

م: كيف كانت الخطبة؟

ر: انا من النوع الخجوليين كتير، يعني ما كنت افهم شي لإن انا ما من الي بروح وباجي ولا احكي حدا ولا اشوف حدا .. لان ما بعرف شي كنت غشيمة وما بعرف شي.

م: كيف تعرفتي عليه؟

ر: هو ما من هون، من شاتيلا… راح بيتن وهني الن اخت هون، اجو قعدوا عندا وبيت اهلي قبال البيت ويمكن شافني او شي وقال لامو بدي هالبنت وانا ما كنت مفكرة بالموضوع المهم بعت امو واخواتو وطلبوني.

م: وانت وافقتي دغري؟

ر: لا … لا لا … طوّلت لوافقت ييي شي 3، 4 مرات بعتلي عالم وانا ما كان بدي…

م: كيف وافقتي حدا جبرك؟

ر: امي ومرت اخوي، قالتلي امي يا امي انا خايفة اغمض عيني وما اكون مأمنة عليكي، بدي اياكي تنستري هون قبالي، وامي كانت لحالها ما عندا حدا ومتولعة فيها كتير لامي، ما بدي اتركها لحالها وبدي اياها تكون قريبة علي عشان هيك وافقت انو اذا بدا شي بجبلا اياه وهيك بضل حدها.

م: يعني ما حدا جبرك؟

ر: لا ما نجبرت لأ.

م: يعني ما كنت تعرفيه من قبل؟

ر: لا لا لا ، هو من بلد وانا من بلد.

م: هلاء اذا اجا عريس من مخيم تاني، بدو وحدة من عندكو من البداوي، كانو يقبلو يعطوه؟ او يبّدو عليه حدا؟

ر: والله ما بعرف، انا عندي بنات صبايا وبيجيلا كتير وبتقولي ما بدي ليه لان بنتي ما بدا، قديم انا ما بعرف لإن ما معاشرة,, في ناس كانوا يجيلن من برا وكانو يوافقو لان وضعنا ما كان منيح ويقولون انو هادا يقدر يعيّشك برا وهيك عشان هيك كانو يقبلو… كانو يبدّو الغريب اكتر من اهل المخيم.

م: العريس كيف كانو وضعو الاقتصادي؟

ر: كان فقير… ما كان عندو شي، كان عامل، ما كان وضعو منيح… لإن اشتروا بيت بالمصاري الي معن فما ضل معن شي,, صار يشتغل مع فاعل ليطلّع مصروفو ومصروف امو.

م: اديه كان مهرك؟

ر: انا 300 ليرة

م: كان في خلاف عالمهر؟

ر:لأ.. كان وقتا هالقد المهر، قالوا انو متلا متل باقي البنات ما بدنا اكتر ولا ناقص متلا متل هالبنات، 300 ليرة اعطونا هني…

م: وقت الخطبة مين راح يشترلي الذهب؟

ر: امي ومرت اخوي وامو هو.

م: شو اشتريتي؟

ر: محبس وليرة الي كان متفاهمين عليها ( العلامة)

م: وقت الخطبة البدلة اشترتيها؟

ر: اه ب 100 ليرة كان لونا زهري.

م: وقت العرس اشتريتي بدلة؟

ر: لأ.. مرت اخوي استعارتلي بدلة من عند جارتا وجابتلي هي.. بالعرس لبست كزا فستان

م: قديه قعدتي مخطوبة؟

ر: 3 اشهر

م: وكتب الكتاب؟

ر: اه كان خطبة وكتب كتاب بنفس النهار.

م: عملتي سهرة؟

ر: لأ كانو كلن فرد نهار.

م: وقت الخطبة كيف كانت ,شو عملتو؟

ر: اهلي متشددين كانو ما كانو يخلونا نطلع، مرة وحدة رحنا وكان مكتوب كتابنا، اشترينا اكل وشربنا عصير وقهوة، وما ضل معنا مصاري اجار طريق، روّحنا من زغرتا لهون مشي، قمت اكلت  اتلة يومتا.

م: وين كتبتي الكتاب؟

ر: هون بالبيت اجو لهون…

م: وقت العرس مين الي حددو؟

ر: هني بدن اياني قبل رمضان… كان صرلي شهرين وانا بعدني ما بعرفو قلتلن ما بدي، انا بدي بعد رمضان، رجعنا حكينا، عملناه رابع يوم العيد..

م: للعرس شو حضرتو؟

ر: ايامي ما كان في صالات وهيك وبيتنا كان ضيق، قامو عملولي اياه بقاعة نادي الهلال، اخوي الو معارف هناك…

م: كان في خلاف عالمكان؟

ر:لأ ولا شي وكان رايق العرس، ما في عجقة…

م: مين اجا عالعرس؟

ر: اهلي واهلو، ما في حدا غريب ابدا.

م: هلاء بعد العرس قعدتي مع اهلو؟

ر: اه، انا وياه وامو.

م: كيف كانت علاقتك مع حماتك؟

ر: كتير منيحة، كنات هي باوضة وانا باوضة ومطبخ مشترك.

م: ما كان في مشاكل؟

ر: بالعكس كتير منيحة كانت معي، كانت هي تعلمني وتقولي اعملي هيك وساوي هيك.

م: كيف عزمتو للعرس؟

ر: عملنا كروت وراحت امو ومرت اخوي وزعوهن.

م: العرس كان يضل اكتر من نهار ؟

ر: لاء انا ليلة…

م: عملتو اكل؟

ر: لأ مرت عملي كانت بس عاملين بقجة فيها ملبس، قعدنا نشتغلن بالبيت… هني جابو الملبس وكل شي .

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: