رسمية محمد اليوسف

شو اسمك يا حجة ؟

ر:  رسمية  محمد اليوسف

م: اي سنة خلقت ؟

ر : ما متذكري.

م: من وين انت من فلسطين ؟

ر: من حطين.

م: خلقت بفلسطين ؟

ر:  اه

م: خبريني شو بتتذكري عن فلسطين ؟

ر: كنا ولاد صغار ,عنا بساتين كنا نقولها حواكير . كنا نروح على الحواكير نقطف تفاح , نقطف مشمش , و توت و نعمل بيوت و نزرع و كنا نزرع كل اشي مثل القمح و الشعيرة , عدس , حمص , فول , كستنا , هاي للدواب و شمام و بطيخ و زيتون و كنا نكتَو عن الشجر  و نعصر و كان المكبس قريب علينا ,كنت اروح انا و اخواتي و جيرانا نساعد بعضنا اه نحمل هل زتون و نروح على المكبس انحطو الصبح و نروح نجيب الزيت و نوخد تنك و حلل و سطولة

م: ادي كان عمرك لما طلعت من فلسطين ؟

ر: كنت صبية يعني 14 و كنت اعرف كل اشي و اشتغل و انزل على الحقلة

م: بتتذكر ادي كان عمرك لما انخطبت ؟

ر: كنت كبيرة , ما كان حدا يدَور على العمر لما . انا طلعت واعية كنت بعرفها شبر شبر يعني شي 15 سنة انخطبت بلبنان .

م: كيف تعرفت على خطيبك ؟

ر:  ليش انا بايدي هو ابن عمي خي بيي كنا عيلة واحدة .

م: انتي وافقت عليه لما اجا طلبك ؟

ر: لا قلولي و لا قلتلن , انا قاعدة و لّا بنت عمي جاي بتقلي تعالي عند امك قلتلا ليش شو بدا قلتلي شو بعرفني , قلتلي روحي نديلي رسمية روحت و قعدنا ,  قلولي انتي عيني هاي بدي اخدك لصالح ابني اه و انا ساكتة و الاهل اعطو يعني احنا كنا سوى بالبيت نوكل بالبيت سوى , كنا عيلة واحدة .

م: حدا عارض على الخطبة ؟

ر: لا ليش لحدا يعارض يعني ابن عمي قولى منو ما في حدا.

م: مين جاب معو بس اجا طلبك ؟

ر: اجت الختايرة الكبار.

م: مين هني ؟

ر: عمامي و القرايب  اجو على البيت و صبو قهوة و شربت هل ناس و خطبوني قلولو لابوي انو صالح بدو رسمية و ابوي وافق قلن اهلا و سهلا بدو بنت عمو اهلا و سهلا  .قرو الفاتحة  و طلعو.

 م: يعني ما اخدو رايك ؟

ر: لا ما اخدو شي بس اجو خطبوني و ما قالولي شي.

م: شو كان يشتغل ؟

ر: كان ابوه بمدينة طبريا كان عندو بسطة خضرة مثل البسطات الي بالمخيم . و كان بالمدرسة بس كانو يفورصو ينزل عند ابو يساعدو و مستاجرين اوضة من عند الجيران و قاعدين فيها.

م: لما اجو على لبنان شو اشتغل  ؟

ر: هو اشتغل كتير اشيا  بس اخر اشي صار اذن مدرسي.

م: كان وضعو المادي منيح ؟

ر: كان  فقير

م: بتتذكري ادي كان المهر ؟

ر: 500 اعطوني 250 و ال 250 التاني ال العريس ما معو انطرو عليهم . جبولي كندرة من الرخاص و فستان تحتو شلحة الصبح اخدوني عند الجيران و حمموني قالو بدن يبيضولي وجي بس مش جايبين بودرة .

م: ادي ضليتك مخطوبة ؟

ر: يعني يا دوب سنة .

م: شو شترولك دهب ؟

ر: ما جبولي شي , بس محبس المهم شحدولي الذهب شحدي من بنات عمي كل وحدة لبستني اشي و اخدونا بدن يبودرونا وين الحمرة و وين  البودرة . قال ما في ما جبناش فش مصاري . قال اه من اكم يوم تزوجت جارتنا روحو شوفوها بلكى اعطتكو اشي . و راحو و قالولا هيك هيك و اعطتن و قعدو يحطولي بودرة و ضلت ال 250 . سلفي كان يروح على الشام . قال انا بكرة ان شاء الله بيعطينا  و منزدلك عليهن خليهن اسا 250 ؟؟؟ يصرفو فيهن ما اعطوني ياهن . انشاء الله بكرا بفتحا و منحط فوقيهن و بشتري الي بدك ياه و خلصنا و تجوزنا  و خلصنا , شو بدي اسوي شلحت الحلقات و ودتلن ياهن قلتلا خيتا هاي دهباتك بس هيي ما قبلت بالاول و قلتلي خدوهن و بلشت و تحلف بس ما قبلت و قلتلا لازم توخديهن و ازا الله اعطاني بشتري و ازا ما اعطاني ما بشتري . كل واحد اخذ الي الو و احنا صفينا من هل بيت

م:شو كانت عادات و تقاليد الخطبة ؟

ر: يساوو قهوة , يجيبو حلو ( اهل العروس ) , و يعزمو القرايب عمامها و خوالها و الكل على بيت اهل العروس , و يصبو قهوة و يقدموا  الحلو و يقولو فلان رايد فلانة شو بتقول . بنت عمو مبروكي عليه المهر كذا و كذا و يكتبوا .
م: انتي كتبتي كتابك دغري او طولتي ؟

ر: لا والله ما قعدت شهرين مخطوبة . في شيخ بجيبوه و بيكتبو الكتاب و يسالو البنت و يكتبو الكتاب و يحطو المهر قديه .

م: وين عملت العرس ؟

ر: عرس ؟ ما في عرس ولا اشي. ما عملنا اشي . و ابوي كان فلاح و ما في مصاري يعني يا دوب كنا نوكل.

م: بتتذكري شو صار معك بيوم العرس ؟

ر: ما صار اشي عزمو العريس بدن يحممو . حنو العريس و حنوني و زفو العريس بالدار  مرتين  الظهر ووقت ما تحمم. و كان ييجي عالم من قرى ثانية يعني مثل قرايب ام العروس و يجيبو الخيل و يرقصو.

م: كيف كانت العزيمة ؟ بالكروت او شفهي ؟

ر: شفهي , يروح واحد من العيلة يدعي لكل الضيعة 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: