نوح قاسم

ا: عرفنا عن حالك

ن: نوح قاسم

ا: اي سنة خلقت؟

ن: سنة 1940

ا: من وين من فلسطين؟

ن: انا من الصالحية

ا: اه، انت خلقت بفلسطين في فلسطين خبرني شوي شو بتعرف عن الصالحية؟

ن: انو الصالحية بلد غريبة ما إالها مثيل، بلد كبيرة كتير وهي البلد الوحيدة التي تحيط بين سوريا شرقا وغربا وشمال لبنان.

ا: طيب، خبرني انتو وشباب شو كنتو تعملوا، كيف تقضوا الوقت؟

ن: كل شي بالذاكرة موجود، مثلا في ولاد تلعب كرة ويعملوا لعب.

ا: بس خطبت اديه كان عمرك؟

ن: كان عمري 20 سنة

ا: كيف تعرفت عليها؟

ن: انا مجوز اثنين، اول وحدة انا ما بعرفا بس خالتي شافتها واجت حكتلي عنها، شفتا انا وصار النصيب.

ا: اه، يعني عن طريق خالتك، طيب بس رحت حتى تخطبا، تطلب ايدا يعني، مين راح معك؟

ن: رحت انا وابوي وخالي، انو الكلام للكبار هني بيحكوا وبتفقو مع بعض على كل شي.

ا: اه بيتفقوا على المهر، اديه كان المهر الي حطوه؟

ن: المهر كان 1600 ليرة.

ا: عملت حفلة خطبة؟

ن: اه عملت بس يعني الواحد ما بيعمل شي اكبر من طاقته.

ا: طيب بس شوفت العروس وشافتك، قبلت فيك دغري؟

ن: اه قبلت.

ا: جبت دهب وقت الخطبة؟

ن: اه كيف لكان، 8 ليرات دهب

ا: اديه كانت فترة الخطبة؟

ن: الخطبة شي 6 اشهر.

ا: كنت تشوفا وتقعدوا مع بعض؟

ن: لا هادي العادي عيب، ما كنا نقعد لحالنا، ما كان في خلاء بيناتنا، مش متل اليوم، الشاب بدو يطلع وينزل كأنو هو مالك العادات، هلأ ما حدا بعرف الاصول، زمان كان في عادات وتقاليد واصول للبيت بدو يحترمها، ايامنا كان الواحد ما في يحكي كلمة عليها للبنت، بس بدو يجي يزورها كان يخبَر انو جاي.

ا: قبل العرس، عملت سهرة؟

ن: اه عملنا بنات وشباب والجيرة يعني.

ا: طيب العرس كيف حضَرتلو؟

ن: العرس كان يوم الجمعة، يوم واحد كان، اهلي والجيران عملوا أكل وعزمنا هالشباب والجيرة الي بعزّو علينا.

ا: اه، كيف كنتو تعزموا ومين عزملك، يعني كان في كرت عرس؟

ن: لا ما كان في ايام زمان، كان في بس تفضل يا فلان معزوم على العرس وبس.

ا: كنتوا تعزموا حدا من برا البلد؟

ن: لا بس الجيران ولاد البلد والقرايب واهل العروس والعريس والشباب الي يتعز علينا.

ا: شو لبست يوم عرسك انت والعروس؟

ن: بنطلون وجاكيت انو ابوي فصّلي بدلة الي. العروس شو بدا تلبس هي فصلتن عند الخياطة، ما في فستان ابيض بس لبست طرحة بيضة.

ا: شو الاكل الذي حضروها الاهل؟

ن: شو الاكل رز ولحمة وشوربة ههههههه

ا: كيف كان وضعك الاقتصادي؟

ن: كان منيح.

ا: يوم العرس كان في زينة العرس؟

ن: ما في شي لا زينة ولا شي.

ا: وين سكنت بس اتجوزت؟

ن: سكنت في بيت لحالي بس بالايجار.

ا: اديه كان اجار البيت؟

ن: كان 25 ليرة

ا: كيف كانت علاقة مرتك مع اهلك؟

ن: اول شي ما عندي عيلة كبيرة، في ابوي واخوي كان عندو بيت لحالو يعني كانت كتير منيحة.

ا: وانت كيف كانت علافتك ببيت عمك؟

ن: انا كنت كتير منيح معن يعني هو في مسؤولية صار وكنت كل يوم خميس نروح زيارة.

ا: كم غرفة كانت البيت؟

ن: والله، كان 4، 5، 6 غرف وحوش كبير لحالو.

ا: طيب بس كان يصير خلاف بينك وبين مرتك، كيف كنت تحلّو؟ مين كان يحل الخلاف؟

ن: عمي، كان يحل اذا صار شي.

ا: هلأ نيجي للحجة كيف تعرفت عليها؟ واديه كان عمرك بس تزوجت مرة تانية

ن: كان عمري 25 سنة وهي كانت 18 سنة. انا كنت عسكري وكنت اروح على القاهرة، وفي ناس فلسطينية جيران، يعني قالوا بركي بتتجوز، قلتلن انا اه. قال في فلانة، رحنا زيارة انا وجارنا حكينا مع ابوها بالموضوع، قال بدو يتشاور وبعد اسبوع بردوا علينا خبر.

ا: ردّوا عليك خبر؟

ن: اه، ردّوا علينا خبر. بعد اسبوع  وصار نصيب.

ا: يعني صار نصيب وقرأتو الفاتحة. اديه حدّدوا المهر؟

ن: المقدم كان 400 ليرة والمأخر كان 600 ليرة.

ا: جبتلا دهب؟

ن: اه جبت خاتم وبلاك

ا: اديه فترة الخطبة؟

ن: 6 اشهر كمان وبعد 4 اشهر حددنا موعد العرس انا وابوها

ا: كنت لحالك بمصر؟

ن: اه بس في رفقاتي وفي ابن خالي، كان ساكن هناك

ا: كيف حضرت للعرس؟

ن: اول شي حددنا المكان، بعدين اهل العروس وجيرانها عملو الاكل، عملو فراريج ولحمة

ا: شو لبست يوم العرس؟

ن: لبست بدلة، والعروس لبست فستان ابيض.

ا: البدلة كانت خياطة او أجار؟

ن: لا البدلة كانت خياطة والفستان كان خياطة كمان.

ا: سكنت في بيت لحالك؟

ن: اه، وبس رجعت من مصر قعدنا في بيت واحد.

ا: سكنو مع بعض نسوانك؟

ن: اه، الاولى والتانية في بيت واحد

ا: ما كان في خلاف؟

ن: لا ما كان في خلاف ولا شي لانو ما كان في غيرة بيناتن وعندي 6 اولاد.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: