–محمد سليمان من قصاير قضاء حيفا

ف:  عرفنا عن اسمك حاج؟

م: انا اسمي محمد سليمان

ف: اي سنة خلقت؟

م: سنة 34

ف: من اي بلد بفلسطين؟

م: من قصاير  قضاء حيفا

ف: خبرنا عن فلسطين؟

م: بالنسبة لفلسطين انا بعرف عن منطقتي عن حيفا، عن القصاير، هي منطقة هيك وحيطها قدامها وكنا فلاحين بلد زراعية

ف: شو كانت تشتهر؟

م: بالزراعة والقمح وحصيدي شو كانت تزرع تفاح سكري مثلا ههههه

ف: اديه كان عمرك لما خطبت؟

م: كان عمري 16 سنة

ف: احكيلنا عن الخطبة؟

م:  لما طلعنا من فلسطين كانت العالم هرباني، كل 8 عيال ساكنين ببراكس، كل 8 عيال معن مترين ب 3 متار. اول ما اجينا كانت حياتنا غريبة الشكل بالذل والاهانة والفقر والجوع، كنا نتشتغل بربع ليرة ونص ليرة لما ننزل على زحلة، كانوا اللبنانية يضربنا ويذلونا وما يعطونا الليرة لولا شعبنا زي ما قال الله يرحموا ابو عمار غير هاد الشعب كان بدوب بس احنا شعب الجبارين، احنا شعب ضل محفاظ على عاداتنا وتقاليدنا، البنت ما طلعت وما انهانت، خلينا محافظين على حالنا وعملنا ثورات وضلينا صامدين.

انا اخدت قرابتي بالخطبة طبعا ما فيكي تروحي تشوفيها بس لتجبيلها هدية او خاتم بس تشوف العريس بتهرب وما كنا نشوف بعض مع كل الفقر والشحار كانت الناس يحبوا بعض وكانت العادات والتقاليد، ضلينا محافظين عليها وعلى الرغم من الفقر الا ضلت العالم تحب بعضها البعض وتطبخ بالعرس.

ف: كيف طلعت فكرة الخطبة؟

م: لما انا صرت ابن ال 16 سنة، ابوي بدو يجوزني، راح حكالي فيها وحد الفيد وكل شي واجا قلي انا خطبتلك فلاني وهو خلص كل شي

ف: ما اخذوا رأي العروس؟

م: طبعا اخدوا رأيها بس هي ما رح تقول لا اه ولا لأ، هاي العادات والتقاليد بفلسطين ما بطلب الشاب متل اليوم، بشنكلها وبروح هون وهون، انت بدك تخطب وحدة الاهل بخلصوا كل شي.

ف: ما كان في اعتراض من اي حدا؟

م: بالنسبة الي ما كان في اي اعتراض، الاعتراض كان يصير، اذا واحد خطب وحدة والها ابن عم، ابن العم بنحرها, انو هو أولا ما  فيها.

ف: شو بتقربك العروس؟

م: بنت خال ابوي، وامها قالت ما بعطيها لحدا غيرك.

ف: اديه فترة الخطبة؟

م: 3 شهور

ف: شو عملت بفترة الخطبة؟

م: ولا شين الحصيرة والتكَاي والشحار وان شاء الله اتشنكل انا واياها واروح معها، ما شفت حالنا الا مجوزين

ف: كانت ساكنة معك بالمخيم؟

م: اه

ف: كنت تشوفها قبل الخطبة؟

م: اه كنت اشوفها بس ما كنا نحكي مع بعض.

ف: كان في اعجاب؟

م: اكيد لا

ف: اديه كان عمرها؟

م: اصغر مني ب 3 سنين

ف: بس خطبتها مين راح وجاهة؟

م: هاي الشغلة مش عند كل العالم لما يكون في وحدة وقرابي، بروح الاب او بتروح الام وبمشي الحال وبينتهي الموضوع العريس بوكل بطيخ وبسكت والاهل بحددوا كل شي، الاهل بحددوا ونتا العرس بعد شهر او شهرين، العادات يلي بفلسطين هي ذاتها بس بتختلف انو ما كان في دبايح ولا كان في شي هون، بس يكون في عرس بفلسطين كانو يدبحوا ويجييبوا هدايا ودبايح وقهوة وخيال ودق واغاني لانتهاء العرس ويركَبو العريس على الخيل ودق واغاني وبعد ما يخلص العرس بقعدوا العريس بتصير العالم بتنقطوا وبعدين بروح على البيت,

ف: هلأ بالنسية الك شو صار؟

م:  انا كنا عرسي اجو الشباب وغنوا وقَعدوا الزلم لحال والنسوان لحال، كل شي لحال، ما كان في اختلاطات, بالرغم من انو المعيشة صعبة كان يطبخوا العالم ويطعموا

ف: يوم الخطبة شو حضرتوا، شو كانت الزينة؟

م: ولك احنا لاقينا الزينة ولك احنا ما ملاقين اللقمة، ما كان في زينة ولا شحار

ف: اديه كان المهر؟

م: كان المهر على زماني 700 ليرة لبناني، هاد الفيد و 200 ليرة مأخرة, واحلى وحدة كان مهرها 100 ليرة.

ف: مين حدد كتب الكتاب؟

م:  اهلي حددوا، اجا الشيخ كتب الكتاب قبل بجمعة من العرس.

ف: بس كتبت الكتاب رحت شفتها؟

م: ممنوع ممنوع ولك ممنوع، ما كنت اشوفها، احنا من البيت للبيت.

ف: جهاز العروس على مين؟

م: الجهاز هي بتجهزو من الفيد، بتفقوا اديه الفيد وبتجيب الغراض من الفيد.

ف: كيف كان وضعك الاقتصادي؟

م: مش نافع بالمرة.

ف: كيف قبلت فيك؟

م: ما هي وضعها متل وضعي.

ف: ما كان في اعتراض على وضعك؟

م: يا عمي مين بدو يعترض علي، انا كنت نمر شو بدن بوضعي, انا جبت 6 ولاد و4 بنات

ف: كان في طقم دهب؟

م: كان في 5 ليرات دهب، بالنسبة للفيد

ف: ما رحتوا مع بعض وقت الدهب؟

م: لا لا هي راحت لحالها، وبعد ما تجوزنا صرفناهن كلهن

ف: احكيلي عن العرس

م: يوم العرس ما بزل عليكي، كنت بالبركسات، كنا نقعد بالبركسات كل 8 عيل، يقعدوا مترين ب 3 متار، كنت احط بطانية بيني وبين جاري هيك صار فلما طلعنا تشحرنا وتعذبنا وشقينا كتير، كنا نشتغل شغل بالباطون والعتالي، ننزل على زحلة اشتغلنا شغل الحمير والبغال والجمال ما بتحملوا، شقينا وتعذبنا كتير لحد ما اجت الثورة، دخلنا بالثورة كنت متجوز وعندي ولاد، كان عمري بالاربعينات

ف: ما حكتلي عن يوم العرس

م: العرس شو يا عمي لما الواحد لاجئ ,بهل شوية رز وشوية لحمة هيك كانو يطبخوا، حياة لاجئ مشحر، شو بدو يطبخ، يوم الغدا يتغدوا هل الناس

ف: كان في حدا من برا البلد؟

م: اه كانوا يجو الجيران؟

ف: كيف عزمتوا للعرسظ

م: العزومي كانت شفهي

ف: مين عزملك؟

م: انا عزمت الشباب

ف: كان في حفلة حلاقة؟

م: عملنا حفلة حلاقة، بيجوا النسوان بحطوا اواعي العريس على صدر وبيرقصوا فيه، وبتيجي الشباب يحدّوا ويرقصوا وبدبكوا، لما كان يصير عرس بالمخيم كان يعملوا بالساحة

ف: وين سكنت لما تجوزت؟

م: سكنت بالبركسات مع اهلي 25 سنة، طلعت اشتريت(خشي ) بيت صغيروبلشت اظبط فيها

ف: لاي صف تعلمت؟

م: لصف 2، كنا ميتين من الجوع. والحمدالله تجوزنا وجبنا ولاد وانا فتت على الثورة، يلعن ابو الثورة، لما اجت الثورة اعتقلوا ولادي تنين، اجا الدرك واتخانقت انا وياهن وضربت تنين واخدوني على السرايا، لما اخدوني على السرايا كل شي في دركي كلياتن طوقوني واخر النهار حطو الكلبش بإيديّ وجابو عصاي، علقوني فروج وجابو قضيب وصاروا يضربوا فيني وانا اسب عليهن، بعد ما خلصوا مني، مسكوني اربعة وغطسوني بالبركة واخدوني على المحكمة العسكرية، لما فتت على المحكمة العسكرية قالولي قاعدين يحطونا ويتفقو علينا، كنت انا اشتغل عند واحد من زحلة مسيحي، راح ابوي عندو وقلو محمد محبوس، راح هل الزلمة عملي واسطة وبقيت شهر محبوس. بكل شحار الفقر والجوع والتعتير اجت الثورة, وشو قبضنا من الثورة، ابني استشهد، ابني بسوى الثورة وفلسطين عندي، شو فادتني الثورة، هلأ حطوا كلاب على الثورة، واجو الفدائية وفتت على الفدائية بس كنت تقولي فدائي كانت كل الناس بدا تتفرج وتعرف مين الفدائي ما كان حدا يقَرب على الفدائي.

ف: بعد ما تجوزت كنت توخد الحجة معك؟

م: على السينما؟ لا ممنوع وحتى بعد ما تجوزنا، اه ممنوع تطلع المراة من البيت

ف: بس كنت ساكن مع اهلك ما كان في مشاكل؟

م: انا كان عقلي صعب بس كنت اجي وعيوني تقدح نار، ما كان حدا يحكي شي وما كانوا يسترجوا يتخانقوا مع بعض

ف: انو شو جابكوا لهون؟

م: بقصاير صار في معركة وقتل ومجازر وطلعنا علىشفا عمر لما صار القصف على شفا عمر ، احنا رحنا على دير للمسيحية قعدنا شهر بشفا عمر وابوي راجع يجيب مصاري، ضلينا شهر احنا بمطرح وهو بمطرح. اللبناني ما الو صاحب، بس يكون بدو مصلحة منك بصير صاحبك وبس تخلص المصلحة بعدش يقولك مرحبا والحياة صعبة، صاروا الاخوة يقتلوا بعض

ف: بتحب تسألني شي او تقولي شي؟

م: بدي اسألك احنا شو طلعلنا من هل البلد لبنان؟ اذا بدك تسجلي بالبلدية ممنوع.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: