قاسم محمد خدوج من الزوء التحتة قضاء صفد

ف: عرفنا عن حالك حاج؟

  ق:انا اسمي قاسم محمد خدوج

ف: ابو؟

ق: ابو علي

 ف: من اي مواليد؟

ق: 1939

ف: من اي بلد؟

ق: من الزوء التحتة

ف: هي قضاء شو؟

ق: قضاء صفد

ف: شو بتعرف عن صفد وعن الزوء؟

ق: والله بعرف عن الزوء وعن الخالصة.

ف: احكيلي شوي

ق: اول مابلشت بحدود لبنان المطلة، الخالصة، الزوء، البوزية، الناعمة، الخصاص، الزوفة، العبساية، بحرية طبارية، هاي الي بتنزل الماي كلها،عيلة جرب يلي كنت اقعد عندها، بعدها السجرة عليها متل ما هي، السجرة انا كنت واعي بفلسطين.

ف: اديه كان عمرك؟

ق: 10-12 سنة. وياللي هناك كانوا يوكلو مش متل هون الاكل يلي بالمخيم من يوم طلع الاكل يلي بالمخيم موّت العالم كلها. روح يا يوم، تعا يا يوم، قعدنا اربع خمس سنين هيك وتعرفنا على هل المستورة.

ف: اديه كان عمرك؟

ق: 15- 16 سنة.

ف: كيف تعرفت عليها؟

ق: هي بنت خالتي، اخت امي، تعرفنا عليها وصار النصيب

ف: بس كنت بفلسطين كنت تعرفها؟

ق: مبلا كنت اعرفا.

ف: وين تجوزتوا؟

ق: تجوزنا هون بلبنان

ف: كيف اجت فكرة الخطبة؟

ق: والله فكرة الخطبة اجت عمتي من الشام، اخت ابوي، قالت بدنا نخطبلك بنت خالتك على نية الله ورسوله.

ف: يعني مش امك وابوك يلي حكيو؟

ق: مبلا امي وابوي قالو بس جابوها هي تحكي والله صار النصيب، رحنا على الشام نجبلها حطة وثياب و جوخ، هيك كانت عاداتنا

ف: كان في اي اعتراض  منك او منها؟

ق: لا، ما كان في اي اعتراض

ف: كان حدا حاكي فيها قبل؟

ق: لا. هي بنت خالتي، اخت امي، اد ما يكون بنضل لبعضنا البعض وين منروح منضل لبعضنا البعض. رحنا على الشام جبنالها جهازها وصار النصيب.

ف: اديه فترة الخطبة؟

ق: ما طولنا، شهر شهرين

ف: دغري تمت الموافقة؟

ق: اه طبعا، كتبنا الكتاب وحددنا المهر.

ف: اديه كان المهر بوقتها؟

ق: كان بسيط 500 المهر ومأخر500 . كتبنا الكتاب وعملنا العرس. عملنا العرس وعاداتنا احنا منطبخ، رحنا جبنا دبحتين، طبخنا ” شوربا وطبخ، وصف الزلام وصف الدبكة، عقب ما اكلت العالم بلشت الدبكة، كان عندنا واحد ظالم شيخ الشباب، انا بوقف على فرشة بنص الدبكة، قال اثبت، ثبتت ولما تحركت صمطني قطب من هون لهون ما استرجيت احكي معو، ما بحكي معو انا، وبعدين قعدنا، صار نقوط ما نقوط، يلي بنقط ربع ليرة، نص ليرة بهداك الوقت وهداك الوقت النص ليرة كان الها قيمتها.

ف: مين كان يوخد النقوط؟

ق: للبيت، نوكل ونشرب

ف: وقت الخطبة جبتولها طقم ذهب؟

ق: لا ما كان في طقم ذهب

ف: شو كانت العلامة؟

ق: كنا نجيب صندوق وعليه صورة ( مرايا) ومد عرزال للهدوم ومنحط عليه الفراش.

ف: وين كان مطرح السكن؟

ق: اخدت بيت لحالي مش مع اهلي، قعدت كم يوم مع اهلي، بعدين رحت على بيتي لهون.

ف: مين ساعدك بفرش البيت؟

ق: فرش البيت هو يا عمي فرش البيت، انا فرشتو بإيدي، عملت فرشتين وعملت لحافين من تعبي لانو ما كان في ، طلعت بقميصين وبنطلون من عند اهلي، لا لحاف ولا حرام، جينا على البيت كان في واحد عندو شادر، رحت عندو وقلتلو بدك تبعيني شادر، قالي والله انا اشتريتو ب 25  ليرة بس انت خدو ب 20 ليرة، ونزلت على البساتين وجبت ثلاث عودات، واحد مسكتا من هون ووحدة من هون ووحدي بالنص ورفعنا الشادر وكنا نجبل الطين ونحط على الشادر طين ليمكن، هي تحط من حارة طين وانا حط من حارة طين وقعدنا بهل الشادر والله عطانا اولاد وصار العالم تجيب زينكو محروق من بيروت، والله رحنا جبنا 20 لوح زينكو وحطينا داير 10 لواح زينكو من فوق وبالاخر اجانا اول ولد سمينا علي عطاكي عمرو، وعمرنا بيت بتعبنا وشقانا… وكل العيلة كانت قاعدي بجنب بعضها البعض قاعدين بشوادر وبعدين صارو يعمرو بالحجارة..

ف: بفترة الخطبة كان مسموح تقعد مع العروس وتروح مشاوير مع بعض؟

ق: لا ما كان يشوف العروس الا ليوم العرس.

ف: كنت تقعدو مع بعض بوجود اهلها؟

ق: احنا قبل ما نخطب كنت اشوفها واقعد معها وبعد ما خطبنا كمان كنت اقعد معها بس ما كان في شمات هوا، كان في تعب بال، بتشتغلي بليرتين ونص توكلي، ما تشتغلي بتقعدي بلا اكل.

ف: كيف كان الوضع الاقتصادي؟

ق: والله كانت مشاقي بمشاقي اول ما طلعنا. كنا ساكنين بالجنوب عرس ابو زبلي، صرنا نيجي من جسر ابو زبلي نشتغل بالدامور، كانت امي تخبز 50 رغيف ونخودهن انا وابوي واخوي، اجا ابوي اشترى 100 مكنة رمل عحساب 5 ليرات، احنا و5 بنات، البنات لمن يصحلن يشتغلو برا كانو يروحوا يشتغلوا ويجيبو مصاري ويعطوهن لابوي. كانت فكرة شغل البنات عادي كانو يشتغلوا برا ويجو يعطو الاجرة لابوي. كانوا يشتغلوا بزراعة البصل ويعبوه. ولما ما يلاقو شغل يشتغلو معنا بالرمل.

ف: اديه كان المهر بهداك الوقت؟

ق: كان بحالتنا احنا 500 المهر. في واحد تجوز بشوالين طحين وبعدين لهلأ مع بعض، ما كان يهم المهر، المهم العيشة المنيحة والعشرة المنيحة.

ف: شو كان جهازها للعروس؟

ق: كان 500 ليرة كانت تجيب فيهن تياب وانا بجيب غراض البيت كل شي منجيبوا.

ف: مين كان كبير العيلة؟

ق: كان حياة ابوي كان يقولنا جيبو اعملو هيك، عمر بيوت الي ولإخواتي.

ف: انت ما كنت حاطط عينك عا شي وحدة؟

ق: لا على الخيرة ( هههههههههههههههه) كنت مقتنع بوجه الله

ف: شو كان ابرز العادات والتقاليد للعراس؟

ق: كان العرس يتم ب 7 تيام ( ايام) كان يغنوا ويطبلوا ويزفوا

ف: شو عملتو يوم الخطبة؟

ق: ما عملنا شي اجينا وقعدنا  ببيت واحد، كنا جبنا حلو وقرينا الفاتحة.

ف: مين كان من المعازيم؟

ق: اخواتي واخوتها وحياة ابوها

ف: كان في حدا من كبار البلد؟

ق: لا مفيش عنا منو هادا عشان كنا عيلي ببعضنا مكنش في هيك بس كان في واحد كبير العيلة من ايام فلسطين.

ف: مين كتبلكو الكتاب؟

ق: كتبنا بصور، اجا واحد اسمو المعاري كتبلنا الكتاب وبعدين حطينا بإيدها الخاتم والمحبس وانا حطيت خاتم بإيدي، دهب ما دهب ما كان في، كان على قد القدرة.

ف: احكيلي عن وقت العرس، مين كان يحدد وقت العرس؟

ق: الاهل اجو قالو يوم الفلاني  يوم العرس.

ف: بوقتها جابت كام بدلة للعرس؟

ق: ما كان في بوقتنا هيك، كان في اللباس الفلسطيني، العباية والحطة وحلة جوخ

ف: ما لبست فستان عرس؟

ق: طبعا شو لكن، اهلي هني  يلي جبولها ياها، كل جهازها شترينا من سوريا.

ف: احكيلي عن يوم العرس؟

ق: عملنا سهرة، عقب مطلع الغدا جابو هل العالم، حطو بهل كوم صدورة اكل والصواني، حطو الاكل بصواني واللحم على وجو. كانو يحطو الشوربا ,بجيبو  شوربة صفرة، كانو يعملوها بلبن وعصفر، كان يضخو اللبن ويحطوا عصفر عشان صير لونو اصفر، وحطوا الاكل ويصفو الزلم ، ببلشو هل الزلم يتغدوا وينزلو على الدبكة. كان العرس يبلش على ال 12 ويخلص على المغرب. مش متل اليوم

ف: كان في مكان مخصص للعرس؟

ق: من وين مكان ييجو المعازيم، كلها العالم تيجي بتجامل بعضها البعض، كانت العالم تيجي بلا عزومة.

ف: مين عزملك؟

ق: انا واخواتي.

ف: مين كانت الجاهة؟

ق: ابوي وحياة عمي، كان في ناس معروفين بالمخيم.

ف: كان في زفة؟

ق: اه عملنا زفة.

ف: ما عملت حفلة للحلاقة؟

ق: لا ما عملت، تحممت وتميت ( ضليت) رايح على العرس.

ف: العروس عملت حفلة حنة؟

ق: اه عملت حفلة عند بيت اهلها وطلعوها من بيت اهلها

ف: شو كان النقوط

ق: انا والله بالدبكة، بيجي ابوي بعطيني ليرتين، بجو بقولو خلف الله عليك يا ابو فلان، كل العيلي كانت تنقط، وياللي بنقطك بدك تنقطو يعني عطيتني صحن بردلك الصحن

ف: شو كانو ينقطو غير المصاري؟

ق: هدايا مثلا كانت صفت حلو، علبة بنجوس….

ف: كان في عادة الجيران بتجيب رز واكل؟

ق: لا لا احنا كنا ببعضنا الاهل، ما كان في هاي العادة. كل هادا جديد، ما كان في هيك قبل.

ف: شو كان ابرز شي بالحلو؟

ق: الشوكولا وراحة والبسكوت

ف: كان في عادة الصباحية عملوها شي؟

ق: اه اجو صبحية تاني يوم، امي وامها كانو اخوات، اجو عندنا وقعدوا وعملت ابريق شاي.

ف: ما كان في فطور او حلو بجيبو معن؟

ق: لا ما فيش منها كان، وبعد سبع تيام رحنا عند اهلها ردة الإجر، عملو غدا  وجابو كليين لحمة وطبخوا مع برغل، كان الواحد يكول بإيدو، ما كان الواحد يشبع غير ما يكول بإيدو.

ف: كان في مشاكل بين اهلك ومرتك؟

ق: مرة وحدة بالزمنات.

ف: مين حل المشكلة؟

ق: صاحبي

ف: احكيلي شو صار؟

ق: كنت انا بالدبكة، اجا صاحبي قالي شو مسكر البيت، قلتلو انا اه، قلي هات المفتاح وراح جابها واجا حطها بالبيت.

ف: ليه صار المشكلة؟

ق: يعني اول على اخر الواحد بتخانق مع مرتو وبترضى.

ف: ما دخلتو حدا من العيلة؟

ق: لا، صاحبي يلي حلها وما دخل حدا من عيلتي. احنا على دور فلسطين كانت العالم شبعاني، يلي ماكان عندو ارض يشبع من يلي عندو، احنا ما كان عنا ارض، كان عنا بقر، يروح عند فلان يجبلهن عشب ويروح عند هداك يجيب تبن وشبشولي ما كنا نجوع شيلي شيلي.     

ف: انت مع تعدد الزوجات؟

ق: لا الحمدالله.

ف: كان الواحد بس تموت مرتو دغري يتجوز عليها؟

ق: لا ما دغري بعد بفترة. في عندك ناس اذا كان متزوج، اذا هي بتقبل بتجوز عليها، وفي ناس بمرمروها ويعذبوها ليتجوز عليها.

ف: بتآمن بالنصيب؟

ق: طبعا بآمن بالقسمة والنصيب والتراضي بعدين.

ف: كان في بوقتك اجبار على الزواج؟

ق: اه كان في ناس يجبروها، بدك تتزوجي.

ف: ضد هل الشي؟

ق: اه طبعا، ضد، هل الشي حرام اذا هي ملاش خاطر.

ف: بتحب تحكي شي بعد؟

ق:  انت ذكرتيني بكتير اشيا من الماضي. كان الدين اكتر من هل الايام، من يوم طلع هل التلفون خرّب الدنيا. زمان كانت البنت بس ابوها يطلع فيها البنت بتنضب لجوا، هلأ ما بدرو البنت شو بتعمل.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: