فاطمة زيد من الضاهرية قضاء صفد

ف: عرفينا عن اسمك حاجة؟

ف: اسمي فاطمة زيد 

ف: على اسم جوزك ولا على اسم عيلتك؟

ف: عيلة جوزي وعلى عيلتي نفس الشي

ف: من اي مواليد؟

ف: مواليد الستينات، يعني لأ، بالثمانية واربعين، بالاربع واربعين، ما بعرف انا ما معي الاوراق ولا شي يمكن بالاربع واربعين

ف: من اي بلد؟

ف: من الضاهرية قضاء صفد

ف: احكيلنا شوي عن طفولتك؟

ف: طفولتي هي احنا وعينا على طفولي او على شحار، طلعنا من فلسطين كان عمري سنتين ونصف، تهجرنا وجابونا على المية والمية اعدوا بشوادر شو طفولتي، لا كان في جنينة ولا كان في ملاعب ولا كان في شي، كان في تعتير اعدين تحت هل الخيمة مثلنا مثل اي طفل لاجئ فلسطيني، شو طفولي يعني بس انا كانت طفولتي عند اهلي حلوة، كانوا اهلي يحبونا ما في اي اشكال بطفولتي كانت

ف: بأي عمر تجوزتي؟

ف: بنت 15 سنة

ف: قبل ما تتجوزي كان يتأدملك حدا؟

ف: كان يتأدملي عرسان كتير بس النصيب عند ابن هل الحلال عند احمد زيد، نفس العيلي يعني

ف: شو بقربك؟

ف: ابوي وابوه ولاد العم

ف: من نفس البلد؟

ف: اه من نفس البلد

ف: بتعرفي من اي مواليد؟

ف: هو اكبر مني بخمس سنين تقريبان انا عمري صار شي ستين سنة تقريبا هو يعني 65 صار عمرو

ف: حكيلي كيف اجا تقدملك؟ اخذ رأيك بالموضوع؟ انو احكيلي شو صار, احكيلي القصة

ف: والله هو احنا من سكان مخيم برج البراجنة، هو من سكان نهر البارد، ابوه على اثر من تهجرو من فلسطين كان عمرو 30 سنة، ابوه هني وصغار كان عمرو شي خمس سنين وهو ابوه رايح على الشغل دهكتو سيارة المهم مات ابوه وهو صغير، لما مات ابوه شو ربيو ايتام هو واخوته صغار، امو كانت مرا كبيرة ( يعينا كريم) ما كانت تقدر تشتغل كانوا يشتغلوا بالبساتين مع تعتيل البطاطا وهيك اشيا يعني fسهل عكار، قام يا حرام بدو يكفي علمو بدو يشتري كتاب ما كان معو، معنش كان حق الكتاب، اه وفي النا قرابي قالو منروح في الك قرابي ابن العم بمخيم برج البراجنة بتروح لهناك اذا كنت حابب تنزل على بيروت وتشتغل كان عمرو 15 سنة تقريبا هو ما كذب خبر ترك اهلو وترك المدرسة كان بصف البريفيه، اجا لهون على بنا يكفي علمو يعني، يشتغل ويكفي علمو، اه عاد اشتغل هو فترة اجا لعنا، لما لقاني انا بالبيت، انا بالاول لما فات عنا على البيت كنت انا عند اختي بطرابلس ما كان عارف عمو عندو بنت، عاد لما انا اعدت شي جمعة بطرابلس وما كنت بعرف انو اجا عنا على البرج، انا ما بعرفن يعني بالمرة، اه اجيت انا لما شافني هو ما حب يعني dدايق حرام، قالوا انت عندك بنت حبيبي وانا ما بقعد، سحب حالو اتفق هو وسالم يعقوب وفي شباب تنين يعني من بيت قردي من الصفصاف، طلعوا استأجروا برا واعدو المهم صار يجيني خطاب، انا بنت 14 سنة هو بس يجي لعنا، اه بقلولوا اجو حكوا بفاطمة لفتلَو نظروا انا، قام راح لعند امو وقلن انا بدي بنت عمي، عم بيجيها خطاب, واهلو وافقوا وحكا مع ابوي وصار النصيب يا بنت الحلال، واعدنا سنة مخطوبين، يشتغل منهن يا حرام يعطيني هني اصمدلوا اياهن، منو كان يبعت لامو واخواتو ومنو الباقي اصمدلو اياهن.

ف: وين اعدتي لما تجوزتي؟

ف: لما تجوزت اعدت استأجرت بيت دار راجح اخدت غرفتين، استأجرتهن وظبتهن واعدت فيهن، اخدوني عروس على طرابلس بزفة وبتعرفي كيف.

ف: اه احكيلي اهم شي هي؟

ف: كان يجو فردات من بلد لبلد، اه بنهار لما بدنا نتجوز السبت بدن يجوا يخدوني، اجو بوصطات من طرابلس وعملوني عروس واخدوني نهارها وتجوزنا وهناك عملو طبل وزمر وسحجي.

ف: شو كان جهازك؟

ف: جهازي، هو ابضني 800 ليرة، جيبت منن غرفة نوم وصالون والمطبخ وتياب لالي، بس هي البنت بتكون مجهزة، كانت البنت من زمان تجهز مش انو كلياتو من الفيد، انا كنت مطلعا كل شي وكان كلو رخيص وكانت الحياة حلوة بالاول، صح تهجير بس كانت الحياة حلوة

ف: عملتي بدلة للعرس، اكم بدلة عملتي؟

ف: عملت 3 بدلات سهرة وحدة زهر وسودة وزرقة واستأجرت بدلة بيضا

ف: عملتي سهرة عند اهلك؟

ف: عملت سهرة عند اهلي من قريبو لانو ما كان في مجال

ف: بتتذكري اديه حددو الفيد والمهر؟

ف: 100 ليرة

ف: مين يلي حدد؟

ف: يلي حدد ابوي

ف: ابوكي كان مسؤول عنك وعنو؟

ف: لا ابوي عني بس هو عمو كان المسؤول

ف: ارجعي حكيلي شو عملتو بالسهرة؟

ف: يوم ما بدن يخدوني كانو يعملو اكل للي بدن ييجو يخدوني، اعملنا اكل من جميعوا واستقبلنا العالم

ف: شو كان الاكل؟

ف: عملنا فاصوليا، كبة، وبتنجان محشي ورز ومنسف وخيرات الله

ف: طيب بتتذكري شو كان جهاز العريس؟

ف: هو جاب تياب لالو، بنطلون وطقومي هادا جهازو، ما هي العروس كمان بطلعوا حفاي وبجامة وروب ومن جميعوا

ف: احكيلي بعد؟

ف: اتجوزت اخدوني عروس على نهر البارد، اعدت جمعة بنهر البارد، اه هو بدو يجي على شغلو اجيت انا معو.

ف: طيب هو ما حكموا عليه اهلو انو تسكنو بنهر البارد؟

ف: لا هو كان مثقف هو واياهن، ما حدا الو معي انا محل ما بدي بقعد.

ف: هو كان الكبير؟

ف: لا في اكبر منو بس هو كان لانو عايش لحالو ترك اهلو وعاش لحالو، كان مستقل يعني وبتفهم طبعا، شغلو هون مجبور يجي لهون ما بترك مرتو بمحل وهو بمحل.

ف: ما كان في اعتراض من اي طرف بالعيلة؟.

ف: لا، لا ما كان حدا معترض بس كانت حياة امي ما كان الها خاطر لانو جاي بدو يتعلم عرفتي شو، امي فرضت قلتلوا انا بدفعلك حق الكتب بس هو ما قبل يفرض حالو عليها انو هي تعلموا او شي قلها خلص ما الي نصيب اتعلم، انا بدي اشتغل واتجوز واستقر يعني.

ف: هلأ كيف اجا ابوكي فاتحك بالموضوع؟

ف: هو الحديث صار قدامي كان في عريس تاني اختلفوا العريسين، انا طلعت لجارنا حياة ابو موسى وردة الله يرحموا، قلتلوا بتنزل بتفصل بين الجهتين وبتكرتن التنين ويلي بدو ياني بجيب المحبس وبيجي، نزل ابو موسى كرتن التنين.

ف: العريس التاني كيف كان متقدملك؟ بعرفك من قبل؟

ف: كان صحبي هو وجوزي، كانو صحبي هو واحمد كان صحبي متل الاخوي, انا عجبت هداك وعجبت هداك. المهم نزل ابو موسى قلنا يا الله كل واحد يحمل كلاكيشو وينقلع من هون ويلي بدو ياها بجيب المحبس وبيجي كان هادا سعيد الحظ صادق راح اشترى بالليل المحبس واجا، كان هاداك رايح لاهلو يجيبهن منشان يحكو فيني عرفتي كيف، اشترى المحبس وطلع لعند ابو موسى قلو انا بدي بنت عمي انزل احكيلي مع ابوها، اجا هو وابو موسى حكو مع ابوي وانا نايمة بالفرشة لبسني المحبس.

ف: ما كان عندك اي اعتراض انو قلتي لأ او ما بدك؟

ف: لا، لانو الشاب كان كويس طموح ما كان عندي اعتراض رغم اجاني الافضل بس انا بديتو عن الكل يعني التصيب يا بنتي.

ف: بش عشتو هون شو شتغل؟

ف: اشتغل شغلات كتير ما كان عند شغلي مستقرة ما خلا شغلة بالبرج، بساحة البرج عند المسيحية عند الدروز وين ما كان اي شغلي تصحلو يشتغل ما يتعيب بشي.

ف: بفترة الخطبة ما صار في خلاف بيناتكو؟

ف: لا لا ما صار في اشكال ولا صار اي اشكال يعني يلي الو ما كان حدا يقرب عليه وغراضو محفوظين، مصرياتو محفوظين ما كات في اي اشكال، كنا كتير متفاهمين الحمدالله

ف: احكيلي بعد شو بتعرفي عن العادات وتقاليد فلسطين؟

ف: كان العريس سبع تيام وسبع ليالي كانت العراس هناك غير، يعني هون لا بلدنا ولا ارضنا وما في مجال تعمل ويلي بدو يعمل سبع تيام وسبع ليالي ما كانو يدبحو دبايح يعني احنا منعمل على قدنا يعني بقول المتل على قد فراشك مد اجريك. صح احنا رحنا على نهر البارد ودبحو ما قصرو الجماعة بس متل ما بكون بأرضو وبلدو ومصرياتو، بفلسطين كان يجي حدايّ رغم انو اجا على نهر البارد الحدّاي، يجو يحدّو وسيف الدين والحجمين ويزفوا بالعريس والعروس بركبوها على الجمل وعلى الحصان ويحطو عليها عباي يلحنوها ويطلعوها من بيت اهلها.

ف: ما كان في شي مميز بالعرس على ايامكو؟

ف: كل العراس متل بعضها بس يلي معو كتير مصاري بطلع احلى.

ف: كان في حنّا؟

ف: كان في بس، انا ما حنيت، ما حبيت الحنا ما حنيت، انا رحت عند كوافير على السوق الطويلة روحت على المزرعة عند كوافير، عملت شعري والبدلة جبتها من شارع الحمرا تحت سوق الطويلة انا ورفقاتي.

ف: مين كانت شبينتك؟

ف: الشباين كانو نزها بنت ابو سامر، كانت خديجة وزينب الناصر وكتار كانوا راحو معي عند الكوافير عملنا شعرنا وضلو معي طول الوقت

ف: كان الها لبس معين؟

ف: كانت تلبس احلى ما عندا، تصير تلف حوالي وتغني. ” تمخطري يا حلوة يا زينة يا وردة من جوا الجنينة”

ف: وامك ما كان الها لبس معين؟

ف: امي الله يسعدها كانت ملتهية بشغلها، وما كانت تتعاطى بشي، كانت عارفة شو عندا ومسلمي الامور لبنتها. اني عروس بتقعد وبتصون الاكل وبتظبت، انا والله شو بدي اعمل حضرت الاكل قبل بيوم، جهزت كل شي وبس اجوا تاني يوم عملو الاكل عشان يطعموا اهل طرابلس.

ف: احكيلي عن يوم الصبحية؟

ف: يوم الصبحية كان عند اهل العريس، هناك كانت عندي غرفتي قاعدي فيها صبحية تاني يوم جابو الحلو والقص، كان الاكل مناسف وخرفان ودبحو واربولنا هني على الصدور النا, اربولنا الا القص حشولنا اياه وجبوه على غرفتي.

ف: اكم ولد جبتي؟

ف: اسا عندي 6 ورحلي 2. عندي 5 صبيان راحو 2 بقي 3 و 3 بنات

ف: بتحبي تقولي شي بعد؟

ف: العرس مان احلى شي والبنت كانت تنطره مناطرة

ف: انت ما تعلمتي؟

ف: لصف الخامس وتعلمت خياطة بالاونروا وعطوني شهادة

ف: فتحتي مصلحة؟

ف: ما كان في مجال كنت انا ويلي ببيتي ويلي بيت اهلي، ما صحلي مجال. وحياة المهجر ويلي ما عندو حدا، كنا نركض ورا لقمة الاكل، نشتغل لنكول وهاي حياتنا، حياة لاجىء مشحر فلسطيني.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: