سوسن عيسى رحيل من قضاء صفد من المنصورة

سوسن عيسى رحيل

س:حجي بدنا نسجل سكري الشباك بس كرمال الصوت   شكرا

رح اشرحلك  اكتر ما شرحته خلود احنا مجموعة شباب من مخيم  برج البراجنة عم نشتغل مع دكتورة بالجامعة الاميريكية عن التاريخ الفلسطيني ،عم نعمل مقابلات مع العالم من كل جيل شخص ,عم نختارهم ونجري المقابلات معن طبعا كل شي عن فلسطين وكل هاي المقابلات اللي عم نعملها عم نطبعها ونعطي نسخة ل اللي عم نعمل معو المقابلة وهيدي النسخة نفسها منزلها على الانترنت  طبعا اذا في أي اعتراض او أي شي صاحب المقابلة يقول شيلو هيدي المقطع او مش حابب نزلوا على الانترنت فعلى راحته احنا بهمنا راحة اللي عم نحكي معه اكتر من راحتنا, حلو هيك الواحد يحسن صورة عن منطقته عن حاله, عن بلده تقريبا احنا صرلنا 3سنين عم نشتغل على هذا الموضوع ,كل سنة كنا نختار موضوع نحكي عليه هيدي السنة قررنا نطلع بره المخيم ,قبل كنا عم نعمل ضمن مخيمنا برج البراجنة هاي السنة لأ ,رحنا شمال رحنا جنوب رحنا البقاع اخذنا المخيمات واشتغلنا على المشروع اخذنا ناس من اجيال معينة شي خلق بفلسطين وتزوج هنا وشي خلق وتزوج بفلسطين طبعا هول كانوا كتير قلال ,والجيل الثالث اللي تزوج هنا وخلق هنا  هلأ انت من الجيل اللي تزوج هنا وخلق هنا

 

 

س:انا خلقت هون بس ماتجوزت هون

س:بس ماتجوزت بفلسطين

س:ايه ب لبنان

س:بس مش ضروري بس انه ماتجوزت بفلسطين عرفت كيف

 

 

كيف انك ما خلقت بفلسطين وعرسك ما كان بفلسطين

س: لا

س:بالرغم من انك مواطنة فلسطينية منك لبنانية او شي ,اني بس حابة اسأل شو اسمك بالكامل

س: سوسن عيسى رحيل

س:من وين من فلسطين

س:احنا من قضاء صفد من المنصورة

س:اديش عمرك بالضبط

س:انا عمري من مواليد ال 71 بدك تقولي 42سنة

س:خبريني شو بتعرفي معلومات عن فلسطين يعني اذا حدا سألك شو فلسطين شو ممكن تجاوبي

س:قصدك عن الأرض عن التراث

س:ايه كل شي معلومات بتعرفيا

س:يعني احنا بيحكولنا جدودنا فلسطين ارض خضرة مزروعات بتجنن يعني انه الأرض بفلسطين خصبة كتير, يعني شو ما يزرعوا بيطلع الفواكه الزيتون   سبحان الله ارض مافي منا مقدسة

س:ايه شو بتعرفي عن العادات والتقاليد ؟

س: عندي مرت عمي بضل تحكيلنا عن عادتنا وتقاليدنا , عن الأعراس الفلسطينية وانه المرة (المرأة)الفلسطينية كانت جانب الرجل بالزراعة بالحصيد وترعى الغنم والمرة الفلسطينية بسيطة كتير يعني مش متل النسوان اللي بالبلاد التانية بضل بجنب الرجل,  اعراس الفلسطينية كانت على حسب ما سمعت حلوي كتير

س:شو كنت تسمعي عن الاعراس ؟

س:انه الاعراس بتبقى 7 ايام ,وانه العروس بتطلع لبسها مش لبس الغرب بتطلع بلبس ابيض وهيك  احنا هلأ عم نقلد الغرب باللبس الابيض بينما هي بيكون عندها عباي مطرزة مرصعة بشغل الايد بيكون فيه دامر بتلبسو العروس وهوي موجود عند مرت عمي خلاخيل والعرجة هيدي اللي بيلبسوها على الراس

وها التاني اللي بتلبسها العروس متل المنديل بقولوله الشمبر بتكون الالوان ملفتة وكتير مميزة كتير,   اعراسن بجيبو العروس على الهودج (الجمل يعني ) ايه يعني العريس كمان بيلبس هالعباي مطرزة (العقال ) وبضلن يطبخوا واحنا لحد اليوم الطبخ مميز, انه يعني بالعرس بيطبخوا شوربة اللبن مع اللحمة والمناسف والبرغل معروف يعني والاكل مش بالمعالق بإيديهن والدبكات واحد بيدق على القصبة يعني مافي طبل ودربكة وهالقصص عرفت اعراس كتير حلوة وبسيطة

س:اديش كان عمرك لما خطبت ؟

س:كان عمري 18سنة

س:خطبت لحدا من قرايبك او من شخص ما بتعرفيه ؟

س:لا ,حدا من قرايبي

س:شو كان يقربك؟

س:من العيلة كان امه وابوه يقربو جدي

س:من العيلة طيب كنت تعرفيه قبل ؟ او شفتيه من قبل ؟

س:لا انا تعرفت عليه انه مسافرة.

س: يعني تعرفت عليه بمحض الصدفة ؟

س:ايه

س:كان فيه محكى بينك وبينه كنتو تتحدثو بيما انكن قرايب؟

س: لا شي بسيط

س:يعني عادي مش متل ما احنا قاعدين و عم نتحدث؟

وين كنت ساكنة  انت  وين هو كان ساكن اول ماخطبتوا؟

س: انا كنت مسافرة يعني ب ليبيا تهجروا اهالينا من فلسطين على لبنان ومن لبنان على ليبيا قعدت من عمري 6سنيت ل 18 سنة  حتى خطبت  هوي راح قبل ما كان عمري 17 سنة راح يشتغل ب ليبيا فتعرفنا على بعض مش حب او شي بس قصة انه قرايبنا وابن العم لبنت العم هيدي تقاليد. ايامنا كان البنت مابتطلع لبرا الا ليخدها ابن العم

س: هوي وين كان ساكن هون بالمخيم ؟

س: ايه هون بمخيم برج الشمالي

س: طب مثل هوي بيقربك ولو ما كان بيقربك هل كانت العيلة رح توافق انك تاخدي واحد مش من العيلة ؟

س:لا ابوي كان من النوع اللي شوي متعصب بيعطي من فلسطين حتى لو كان مش من عيلتنا بس انه واحد فلسطيني

س:يعني حتى ولو كان مش من العيلة وفلسطيني بيقدر يعطي اما اذا كان من غير جنسية ما بيقبل ؟

س: انه كتير اجو ناس من برا  من غير جنسيات ورفض

س:طيب ليش بس انه فلسطيني ؟

س:بقولك اذا رجعنا على بلادنا يعني حاطين الأمل اذا رجعنا على بلادنا مش بس احنا بس  نرجع .فلسطيني بس من سكان سوريا وانا فلسطينية من سكان لبنان بقولك اذا رجعنا على بلدنا منلتقي احنا واهلنا هناكو المهم انه نلتقي

س:اها يعني لم شمل العيلة مش اكتر؟

هل سألوكي يعني انت عمرك 18سنة بعمر واعي , منك بعمر 14 سنة يعني عمر ولد سألوكي مثلا بتوافقي عليه او فرضوه عليكي؟

س:لا اهلي شاوروني وسألوني اذا بدك ياه هالشخص أو لأ ,بس ما تفكري تخدي واحد من غير جنسية عرفت كيف, وانا لاقيتو انسان مناسب واكبر مني مش بكتير ب 12 سنة ,بس انه بيفهمني بس احنا المحكمة اللي ب ليبيا ما قبلت انه نكتب كتابنا لاني عمري 18 سنة انه تحت السن هني من 25 سنة ومافوق بيكتبو الكتاب بقولو انك انت بعدك مش راشدة

س:اها حاولت شي نهار او فكرت بعلاقتك بهذا الانسان انه ممكن يكون ما بناسبك او خلص من الاول اقتنعت انه هذا الشخص من الاول بدك ياه ؟

س:كل انسان إله عقل عرفت كيف مافي تنين عقلين بكونوا مطابقين بس لاقيتو انسان فهمني وانا فهمتو كتير

س:كنتو قبل في محكى بيناتكن وبعدين طلبك ؟

س:احنا ضلينا سنة ونص مخطوبين

يعني محكى مش عادي يعني احنا العادات مافيكي تقعدي معه او تحكيه مش مثل هالجيل

س:مين اجا اول ما اجو يطلبوكي مين اجا شافك من اهله؟

س:هوي اهله ما كانوا  موجودين كان فيه خالو ب ليبيا يعني كان خالو مطرح ابوه ومرت خالو مطرح أمه

س: يعني هو كان اهله ب لبنان بس خاله ب ليبيا

س:هوي اتصل باهله وقالن انا بدي هالبنت ,بنت فلان وهني بيعرفوا اهلي بس ما بيعرفوني انا لاني كنت صغيرة كتير فوافقوا اهله انه على سمعة اهلي

س:كمان كان ياخدوا بعين الاعتبار سمعة الاهل مش بس سمعة البنت ؟!

س:انه ايه اذا الاهل سمعتن منيحا يعني اكيد مربين بنتن ترباي منيحة

س: لما اجو يطلبوا ايدك رسمي مين اجا من الوجاهة ؟

س: اجا خالو اجا ولاد خاله اللي كانوا موجودين يعني .عمي اخو ابوي ماكان فيه حدا من العيلة كتير موجودين ب ليبيا

س: كان فيه حدا شي معارض فكرة الخطبة والزواج او كل كان موافق؟

س: عندي كان ابوي معارض الفكرة بالأول لانه كان بدو يعطيني لابن عمي اللزم  وكان في بيناتنا سنة وانا كان بدي واحد اكبر مني يكون بيفهم اكثر مني عقلية غير

س:شو اللي صار شو حكيتو مع الاب حتى رجع وافق بالنهاية ؟

س:قالي هاي حياتك يعني انت هاد قرارك  بالنهاية هاد مصيرك

س:شو كان يشتغل هوي خطيبك لما اجا خطبك ؟

س:هوي كان متعلم تجارة ومحاسبة بس الحظ ما حالفه ومتعلم انكليزي سنة اولى جامعة ,فهوي راح يشتغل ب ليبيا ما لاقا  رجع  تعلم شغل الباطون وحرام كتير عاد الانروا بس الحظ ما حالفه حتى لو بشركة تانية يعني عالفاضي هياتو حامل هالشهادات عالفاضي

س: كان وضعه منيح  لما سافر على ليبيا وخطبك ؟

س: لا ما كان وضعو منيح ,انه واحد عم يتعلم جديد الشغل عالباطون كيف بدو يكون وضعوا مع انه عرضوا عليه ب ليبيا انه يتعلم دكتور صحة وهناك ببلاش التعليم  فرفض وقال بدي اتجوز وهالبنت عجبتني  وبدي اتجوزها وخلص بدي اشتغل وتان شي ماكان عنده ب لبنان بيت يعني بلش معي من الصفر

س:اهلك قبلو لرغم انه امكانياته محدودة ما عارضوا انه ماعنده مصاري ماعنده بيت ؟!!!

س:لا لانه قرابتي انه الواحد ما تواخذيني شو قرابتو غريب لو انه غريب ايه كان ما قبلوه حتى انن بالمهر ساعدوه بتكاليف العرس  تنازلوا عن اشياء كتير

س: اديش كان المهر ؟

س:هني بيكتبوا بالعقد ربع دينار بس هوي كان طقم ذهب والف جنيه ليبي والمأخر 3000جنيه

س:كان فيه خلاف عالمهر حدا بده ياه اكتر حدا بده ياه اقل ؟

س: لا عادي وزيادة.                                                                                      

س: اشتريتي ذهب وقت خطبتك ؟

س: ايه جبت

س: شو جبتي ؟

س: جبت طقم ايطالي ومحبس وخاتم وحلق

س:انت ومين  رحت جبتيهن ؟

س: انا ومرت خاله, امه مش موجودة وامي .

س: نقيتي عذوقك قلت بدي هاد او هني اختارولك ؟

س: لا انا نقيت بس انه في طقم اغلى شوي قالولي لا حسب المصاري اللي معنا

س: احكيلي عن جهازك شو جهزت شو جبتي ؟

س: متل أي بنت هلأ الشنطة هيدي بجيب العريس فيها قميص نوم  روب  طقم لضهرا  كندرا  مكياج  تياب داخلية

س:مين كان يروح معك بس تشتري جهازك ؟

س: امي ومرت خاله هوي

س: بتتذكري  مثلا اديش  دفعولك لتجهزي

س: بحدود 4000 جنيه

س: احكيلي عن نهار خطبتك  من لما فقتي الصبح لصارت الخطبة ؟ بالتفصيل

س: انا بخطبتي ماعملنا شي ولا حفلة وفرنا احسن ما يجيبلي فستان خطبة وحفلة ويدفع تكاليف بعدها بنفسي اعملها للحفلة , بس هوي انه حرام بلش من الصفر وجاي يشتغل ووضعه المالي مش زيادي فقلي بابا خلص هاي الخطبة بلاها ويوم العرس بلبسك الفستان ,عملنا كتب كتاب وجبلي طقم سهرة وعملنا حفلة عائلية

س: خطبتك وكتب كتابك كان بنهار واحد ؟

س: ايه اول شي قرأنا الفاتحة ما كان في شي وكتب الكتاب  كان بعد شهر

س: كيف كتبت كتابك ؟ قلتيلي كان في مشكلة ب ليبيا ما كان يكتبوا ؟

س: ميت واسطة وواسطة لحتى مشي الحال  قلنالن احنا فلسطينية مش ليبين يعني  بتتجوز البنت عنا من عمر 14 سنة, هني لا ما عندن هيك حتى انن صاروا يحققوا معي اذا اهلي او حدا غصبك او شي اخدوني بنات من المحكمة بغرفة وقالولي اذا ابوك غصبك عليه للشاب قولي احنا منحكي معه وانا قلتلن لا انا برضاي  وقالولي ما تخافي اذا فيه شي احنا حنكون معك زي المرشدة الاجتماعية اللي حكيوني . بعد هيك عملنا واسطة مع القاضي وانو احنا الاجانب (بعتبرونا) منتجوز بكير وبعدها وافق انو احنا تقاليدنا غير وهني تقاليدن غير

س: بالنهاية انتو اجانب عن البلد ,وين عملتو قراية الفاتحة ؟

س: بالبيت .

س: كان عنكن شي ساحة تعملوا فيها اعراس ؟

س: البيت اللي ساكنين فيه كبير كتير وفيه جنينة كتير كبيرة .

س: اديش فترة الخطبة , سنة ونصف قلتيلي ؟

س: ايه سنة ونص

س: كان عادي الواحد يخطب فترة طويلة او لانه قرايبك ؟

س: لا حسب امكانيته في ناس بضلها سنتين وناس 3 سنين وناس اشهر, فهوي حسب امكانيته , واخر شي عملنا العرس بصالة , ضب حقا والمهر كان معه حق الشنطة والاغراض والمأخر كان مش مدفوع .

س: كان مسموح تقعدي انت وياه لحالكن ولا كيف ؟

س: بعد كتب الكتاب وبميت واسطة وواسطة

س: هل كان يقبل ابوك ؟ تروحي لحالكن ؟

س: لا كان تروح معنا اختي الصغيرة عمرها 14 سنة وكان يطلب العريس قبل بوقت كان متل تصريح.

س:يعني قبل كتب كتابك ممنوعة هاي ابدا .

س: ايه نعم

س: وبعد كتب الكتاب بدك موافقة ؟ !!!

س: ايه

س: طب اذا اختك ما قدرت تروح كان في حدا محلها ؟

س: لا كانت بالقوة بدها تروح

س: غصبن عنا مش بإرادتها يعني

س: مين حدد موعد عرسك ؟

س: هوي جوزي , قال انه خلص صرت جاهز بدي اتجوز .

س: يعني كتبتو كتابكن اجا الشيخ عالبيت ولا كيف ؟

س: اجا الشيخ عالبيت.

س: شو عملتي شو حضرتي لعرسك يعني اجا جوزك قلك بهادا النهار حيكون العرس , شو عملتي شو جهزت شو سويتي ؟

س: اول شي ما كان في هناك  فساتين للايجار كان كله هناك مشترى كرمال وضعه المادي ,احنا حاولنا كمان نساعده, فيه مرت ابن خاله عندها فستان جايبيته لبسته بس يوم عرسها لبسة وحدة ,فأخذناه منها استعارة ةحجزت عند الكوافيرة , حجزنا الصالة , بس كان نقدم بالصالة البيبسي التنك والكاتو وسندويشتين وحدة بلحمة ووحدة بجبنة شرائح , والعالم هي قاعدي , وكروتي طبعناها , وصورنا فيديو بعده عندي كل ما ولادي يحضروه بصيروا يضحكوا ويقولوا ايام زمان ايام زمان.

س: بتحسي اكيد في فرق مابين عرسك والعرس الفلسطيني , وين بتحسي الاختلاف اللي كان ايام زمان وكنتي حابي انه يصير بعرسك ؟

س: الحنة بتعجبني , فيه هلأ عادات ب ليبيا الحنة زي عادات فلسطين انه اسبوع الاعراس , وهناك نفس اعراس فلسطين , بحنو العروس , طبخ , كل شي , بضل 7 ايام بلياليهن , فأنا كنت حابي عرسي يكون متل اعراس الليبي ومتل العرس الفلسطيني.

س: مين عزمتو على العرس؟

س: معارفنا وقرايبنا.

س: مين من الوجاهة اللي كانوا بالعرس ؟

س: قرايبنا مثلا خالي وخاله ولاد خاله , خالها لأمي , قرايبنا اصحابنا الفلسطينية , كلهم فلسطينية اكتريتها وبعض الليبيين , وفلسطينين من جميع الدول  اردن غزة لبنان

س: قلتيلي انكن طبعتوا الكروتي ؟ كيف عزمتوا اللي من خارج ليبيا اللي اجو من الاردن؟ 

س: لا مافي حدا من برات ليبيا , كانوا مثلا اجا فلسطيني لبناني ,وفلسطيني اردني هيك يعني ساكنين ب ليبيا , وحتى جوزي كمان وصى واحد صاحبو يجبلوا البدلة من سوريا لانه هون مافي بدل مرتبة .

س: عملتي شي سهرة قبل العرس ؟

س: عملنا سهرة بس انه سهرة عائلية.

س: يعني ما كان فيها المعازيم وهيك؟

س: لا لا

س: قلتيلي انت جبتي بدلة بيضة والعريس شو لبس ؟

س: بدلة رمادية جابها من سوريا .

س: وين كانت الحفلة؟

س: عملناها بمنطقة ب ليبيا وهي متل سينما , بمسرح

س: هي صالة مخصصة للاعراس ؟

س: ايه

س: شباب لحال ونسوان لحال ؟

س: لا كله مختلط

س: عملتو شي اكل بنهار العرس ؟

س: قلتلك بس انه بالصالة كاتو وسندويشتين لكل شخص وبيبسي

س: وين سكنتي بس تجوزت ؟

س: مع اهلي سكنت .

س: بما انك سكنت مع اهلك كيف كانت علاقة جوزك بأهلك ؟

س: هي صعبة, العريس انه يسكن مع بيت عمه , احنا قعدنا خمس ايام عند بيت خاله فضالنا البيت , وبعدين رجعت اخذت عند اهلي غرفة معزولي عن الغرف وحمام فيها ومطبخ صغير .

س: كان فيه مشاكل بينه وبين اهلك ؟

س: يعني الا ليكون فيه شوي .

س: لما كان يصير سوء التفاهم كيف كان ينحل ؟

س: شو كنتو تتصرفوا مين كان يحكي مين كان يحل المشاكل ؟

س: عندي امي كانت تحل المشاكل

س: هي كانت الوسيطة مابين جوزك وابوك

س: ايه مظبوط

س: طب اذا صار مشكل بينك وبين جوزك ؟

س: قولي الفترة اللي قاعدت فيها ب ليبيا سنتين ونص ماصار مشاكل

س: عم بحكي بحياتك ؟

س: لما اجيت لهون ما حسيت انه هالمشاكل عم تصير بيني وبين جوزي

س: اذا صار مثلا ؟

س: بيكون واحد كبير فهمان كل القصة .

س: يعني اذا صار مشكل بدخله حدا كبير من عيلتكن ؟

س: ايه مندخل

س: كيف كانت علاقتك ببيت عمك ؟

س: يعني لما جيتي على لبنان تعرفتي عليهن , كيف كانت العلاقة بيناتكن ؟

س: اول شي هني كانوا ناس مابعرفن صح قرايبي بس مابعرفن , قعدت كمان معن بفرفة لانه ماعندو بيت  بتعرفي انه الوحدة كانت عند اهلها شكل واجت عند بيت عمها شكل تاني مثلا  هاي الاكلة انا ما بحبها هني بحبوها وبالعكس او مثلا هني بفيقوا بكير وانا بفيق مأخرة هيك يعني بتصير مناقرات .

س: يعني كيف كانت العلاقة ؟

س: بالعكس هني كتير حبوني .

س: كم ولد عندك؟

س: 3 ولاد , ولدين وبنت , وعندي البنت مخطوبة كمان

س: بدي اسألك عن النقوط , نقطوا العريس او لا؟

س: ايه نقطوا العريس .

س: كيف نقطوه ؟ شو كانوا يقولوله ؟

س: انه هيدي نقوط من فلان لفلان وهيك

س: اهله ما حضروا العرس ؟

س: ايه كتير تضايقوا انه اول شب عندن .

س: لما رجعتو لهون ما كان صار حفلة صغيرة 

س: لا , كان عندي الولد عمره سنة ونص , ماكان بدن يعملولو حفلة والله مش حلوي عندي ولد صار عمره سنة ونص

س: انا تقريبا هيك بكون خلصت , شكرا الك كتير واخذنا من وقتك واذا حابي تقولي شي  او تحكي شي ما سألتك عنه الك الحلرية تحكي اللي بدك ياه

س: لا انا بتمنى انه تكون الاعراس كتير تقليدية مثل العرس الفلسطيني القديم , انا عندي هلأ بنت مخطوبة حاسيتها صعبة ومكلفة العريس والله يعينو , فأنا بقول انه حرام كل ام لازم تساعد صهرها , وانا الحمد الله كتير بساعد صهري واشياء كتير بقوله انت ما تعملها او مش لازمة كرمال هالجيل يتجوز , يعني  اذا الواحد بدو اربع غرف وبدنا صالة وبدنا حفلة وزفة ومش عارفة شو .

 

س: يعني ما رجعت اخدت بيت لحالك هون ؟

س: يعني احنا والله قاسمنا احنا وبيت عمي , وصرلي 3 سنين معمرليتي  الانروا . انه خلص كل واحد عقليته شكل , فقطعنا وعملت مطبخ صغير إلي والطبخ اللي بدي ياه لحالي .

س: بتحبي تقولي بعد شي

س: لا خلص

س:  بتشكرك كتير على وقتك .

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: