سعادة عبدالله سامي من الدروي، قضاء عكا

ف:  نتعرف على اسمك؟

س: سعادة عبدالله سامي

ف: من اي مواليد؟

س: مواليد 67

ف: من اي بلد؟

س: من الدروي، قضاء عكا

ف: شو بتعرفي عن فلسطين؟ شو خبروكي اهلك؟

س: بتشتهر بالصابون  وبالزيتون بلدنا بعدا متل ما هي، المستوطنين ما عملو شي فيها.

ف: ليش سموها هيك؟

س: على اسم صابون تعون الدروي، دروية الصابوت الزيت

ف: اديه كان عمرك بس نخطبتي؟

س: 16 سنة

ف: واديه كان عمرو هو؟

س: كان عمرو 21 سنة

ف: كنت تعرفيه من قبل؟

س: اه كنت اعرفو، وامو بنت عمي وابو ابن عمتي

ف: من نفس العيلة؟

س: اه من نفس العيلة

ف: كنت تحبيه او متعرفي عليه؟

س: لا ما كنت احبو بس كنت متعرفي عليه

ف: كان ساكن بنفس المخيم؟

س: لا كان هو ساكن بالبداوي واحنا كنا ساكنين بالمينا

ف: دغري وافقتي عليه؟

س: لا ما دغري، اجا وحكو قبل ما يسافر، قال لامو روحي اخطبيلي، قالتلو كيف بدي اخطبلك وانت ما مأمن حالك، قلها ما عليكي، روحي اخطبيلي، قام اجت امو حكت مع ابوي، قالها بعد شهرين بردلك خبر، كان ابوي بس يجي حدا يتقدملي، كان يستشير كل اخواته وكل العيلة وبعدين يرد خبر ما كان يعطي بلا ما يستشير.

ف: اهلك استشاروكي واخدو رأيك؟

س: اه كانو يستشيروني.

ف: واذا واحد من افراد العيلة رفض كان ابوكي يرفض؟

س: اه كان يرفض وما يعطي مجرد ما حدا يرفض، هو يرفض كمان.

ف: مين اجا وجاهة بس اجو يخطبوكي؟

س: اول شي اجوا ابوه وامه وبعدين بس اجو يحددوا المهر، اجوا شي 200 شخص اجوا كتير، اجو الرجال اكتر من النسوان

ف: اجا حدا شخصية مهمة او مشهورة بالبلد؟

س: لا ما كان عنا هيك، يمكن قبل 27 كان في هيك بس احنا اجا جدي الكبير، خالي الكبير وعمي الكبير هيك يعني.

ف: كان في خلاف على المهر؟

س: لا ما كان في اي خلاف.

ف: اديه كان المهر؟

س: 10 تلاف مقدم و10 مأخر وكتبن ابوي واصل التنين، قال ابوي انت جهز البيت وانا بجهز العروس، كانو الرجال يتفاهموا مع بعض، انت ما قدرتك انا بجيب مش بنطروا العريس.

ف: كيف كان وضعكوا الاقتصادي؟

س: عادي، لا انو غني ولا انو فقير عادي، كان وضعو منيح.

ف: كانوا اهلو يساعدوا؟

س: اه ساعدو. انا متلا بدي شرشف قبل العرس مثلا تيجي مرت خالي شو بدك بقولها بدي ريحة بتقلي ما تجيبي انا بجيب، مثلا تيجي خالتي بقولها ناقصني شي بتقلي ما تجيبي انا بجيب، خالي بعتلي حرام هيك، كانو يسألوا بعض شو بتحتاج انا بجبلها.

ف: مين اعترض على الزواج؟

س: امي اعترضت لانو كان بالجبهة الشعبية انو بضل ما دام بالجبهة ما راح يجي على البيت

ف: شو خلاها توافق؟

س: لما لقيت الكل موافق وافقت، بس هو كان عندو على انو هي ما بدا.

ف: شو كان موقفو بس عرف؟

س: قالها ليش مش موافقة، قالتلو عشان ما رح تيجي كتير على البيت بس عشان هيك. بس انا لقيت العيشة صعبة لانو تنقلت من المدينة للمخيم، كنت بنت مدينة صرت بنت مخيم, كنت اذا البس القطعة وامشي تلاقيهن هيك اهل المخيم، استحي من حالي، شوي شوي تعودت وتعودوا

ف: بالنسبة للمهر والدهب؟

س: كانو يجيبو كلمة الله ويطوقوها بالدهب ومحبس وسنسال وخاتم وساعة.

ف: مين راح معكو؟

س: راحت امي وامو وانا وهو. كان من عادات الخطبة انو ما اعد معو بس اقعد معو امي تعصب كتير, بس انو اقعد بس يكونو كلهن موجودين مش انو يحط ايدو على ايدي او شي وما كنت اضهر معو اذا بدنا نروح على مشوار مع اهلي واهلو.

ف: بيوم الخطبة بما انو انت بنت مدينة كان في اي اختلاف؟

س: اول شي لما اجو قرأوا الفاتحة، ما كان العريس، هي اجت امو لبستني المحبس، لما اجو الوجاهة كلها، وكان ابي يشتغل عند اغا كبير عندو بستان تفاح، بيوم الخطبة بعتلو مكنتين عصير تفاح وصناديق تفاح وهني اهلو كانو عاملين سورار كانو يحطوا الحلو بمحارم مزخرفي بالطول ويحطوا عليها ورد

ف: شو جبتي للخطبة؟

س: امو اشترتلي فستان وسكربيني وجوزدات ومحبس

ف: لما اجو يلبسوكي ما جابولك شنطة؟

س: لا، جابوها وقت كتب الكتاب. انا عملت 3 حفلات، كان هي اول حفلة، عملتا بالبيت، كان بيتنا كبير، غرفة كبيرة للنسوان وغرفة للشباب, انا خيطت فستان زهر للسهرة. وفت كتب الكتاب خيطت فستان ازرق، وقت كتب الكتاب جابو الشنطة.

ف: شو كان فيها الشنطة؟

س: كان فيها تياب داخلية وفستان ومناشف وحرامات، كان كتب  الكتاب بالبيت، اجا الشيخ وكتب الكتاب، اجا خوالي وعموميتي واهلي

ف: اديه كانت فترة الخطبة؟

س: 9 تشهر نخطبنا ب 22 آب سنة 85 وكتبت الكتاب ب 27 آب وتجوزت ب 3 آب 86 وانا خلقت ب 18 آب وجوزي خلق ب 15 آب. كلو كان بشهر آب.

ف: لما كنتي تجيبي جهازك للعرس مين كان يروح معكي؟

س: كانت امي ومرت خالي ولما جبت الطقم الابيض راحت معي امي، هادا الطقم الابيض غير البدلة لما تطلعي 3 يوم تلبس الطقم الابيض، بعد 3 ايام من العرس نلبسو ونطلع بسموها ليلة السرقة وقبل ما نروح كنا نروح على الكوافير نعمل شعرنا، هي بالمدينة كان اسمها ليلة السرقة هاي غير ردة الاجر، ردة الاجر بعد 7 تيام من الصبح، ليلة السرقة بعد 3 تيام ونطلع بالليل.

ف: شو طلعتي جهاز؟

س: اول ما كتبنا الكتاب اتقف ابي كل جهاز العروس عليه والعريس بس يجهز البيت، كان اهلي وضعن منيح، كان ابي كل اسبوع يعطيني مصاري اشتري شي، هادا الاسبوع اشتري مناشف، هادا الاسبوع اشتري غيارات هيك يعني، بس اهم شي كان يطلعوا طقم احمر، طقم اسود، طقم ابيض سكربينة كعب عالي، كانت امي ومرت خالي يجهزوا معي، كان ابي ما يقبل اخد من العريس مصاري.

ف: مين حدد وقت العرس؟

س: بعد ما خلصنا كل شي، بيت عمي حددوا اجو قالو بعد اسبوعين يوم العرس اجا ابوي راح عند اخواتو كلن قلن يوم الخميس يوم العرس بتحبوا تأجلوها ولا نضل على هل الموعد، عاد استشارن وقلن وقالوا اه ما في مشكلة.

ف: بعد كتب الكتاب ما كنتو تضهروا مع بعض؟

س: لا ما كان يخلينا ابوي. كان مرة مسكلي ايدي كسرتلو اصبعو الصغير

ف: اديه كانت ايام الاحتفالات بالنسبة للمدينة؟

س: كأهل المدينة ما كنا نحتفل كتير، كانت امي تعمل غدا ويجو رفقاتي واهلي ياكلو، اذا العريس بدو يجي الساعة سبعة، العروس من ساعة واحدة بتلبس وتنبرز، انا لبست فساتيني كلن، كنت مخيطة كذا فستان، احمر وزهر وبطيخي واسود

ف: ما عملتو سهرة؟

س: كنا بالبيت ما عملنا سهرة بس اهلو بالبداوي عملو سهرة قبل بيومين وعملو حفلة حلاقة للعريس.

ف: شو كان الاكل؟

س: كبة مشوي، وملوخية عجاج ورز ومناسف والحلو كانو يجيبو شوكولاتة وملبس

ف: مين اجا طلعلك من بيت اهلك؟

س: اجا ابوه واخوالو وعموميتوا اجوا اخدوني بالسيارات كانو 20 سيارة، اجوا برموا برمة العروس على المينا، كانت برمة العروس لا بد منها، اجوا طلعو عند بيت جدي وبعدين راحو

ف: خبرينا على الحفلة؟

س: اجو الاهل والجيران وكان العرس حلو كتير، احنا منبرز من الصبح وبتلبس كل بدلاتها، الساعة سبعة بتلبس البدلة البيضا وبيجو سعيتها اهلو وبنرجع منكفي الحفلة عند اهلو وبعد البرمة عملو حفلة عند اهلو وكمان هني كانو عاملين حفلة، كانو يدقوا ويغنوا على الدربكة وكان مخطلط، رجال ونسوان.

ف: كيف عزمتي ليوم العرس؟

س: كانت العزومة شفهي كان قبل بأسبوع بتروح امي وابي بيعزموا خالتها وعماتها وخوالها والاصدقاء والقرايب وتعزم النسوان الكبيرة يضلو شي اربع تيام ليخلصوا عزيمة. حتى تصوير فيديو ما كان في على ايامي وما كان في اغاني كانو على الدربكة وما كان يطلع الصوت عالي كتير وكان اذا مات حدا كانو بعد سنة ليرجعوا يعملوا عرس، يأجلوها سنة. وما كانت ترقص العروس، كانت ترقص مرة وحدة وخلص وكان يهليلوا ويغنوا بس انا ما حافظة شي

ف: يوم العرس كان في تقديم هدايا؟

س: قبل بأسبوع كانو يسألوا شو ناقصط يجيبوا او بعد بيوم واحد يحملو الغرض وبيجوا ونقطوا مصاري. كانت العروس ينقطها اخواتها وعماتها وجدودها واخدن هو المصاري، كان عليه شوية دين وسدهن. والعريس ما قبل ما يلبس البدلة، لبس قميص وبنطلون.

ف: وين سكنتي؟

س: سكنت بالبداوي، نقلت من المدينة للمخيمن لقيتها كتير صعبة، استأجرت بيت لحالي ما سكنت مع حدا، لقيت كل شي غير بالعادات والتقاليد، كنت ضل اطلع مطقَمي وسكربينة وقصير ويضلن ينقدوني وما يعجبن، شوي شوي تعودت.

ف: كانت علاقتك مع بيت عمك منيحة؟

س: كانت كتير منيحة الي 25 سنة ولا يوم تخانقنا.

ف: اديه عندك ولاد؟

س: 3 بنات وصبي، جبت توم بنات بس خلفت توم بالمستشفى اجت وحدة بتقول لمرت عمي الله يعينكوا، قامت اجت لتعلق فيها وما هان عليها. لما خلفت التوم اجت مرت مي ربت بنت وانا ربيت بنت

ف: شكرا لالك، في شي سؤال ما حبتيه او بدك تحكيلنا شي بعد؟

س: لا شكرا الك كمان.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: