رسمية مسعود أسعد غنيم من فرادّة قضا صفد،

احنا من مخيم برج البراجنة

ر: البركة

س: عم نعمل متل بحث عن ايام فلسطين، عن العرس الفلسطيني كيف كان، لانو بتعرفي الشباب دايما بتضل تفوت على الانترنت وتشوفها، احنا فتنا على النت وشفنا انو اسرائيل عم تكتب تراثنا وتنسخوا الها وتقول انو نحنا م عنا تراث، انو كل شي النا عم تاخدو الها، واحنا قررنا انو لازم ننزل بحملة ضدهم، ونفرجي العالم انو لا، احنا النا بلد، النا عاداتنا والنا تقاليدن وبعدنا لهلق محتفظين فيها، وبعدنا منقول انو احنا عنا دولة اسمها فلسطين. بس حجة شو اسمك بالكامل

ر: ع إسم الجوز او الابو

س: على اسم الابو

ر: اسمي رسمية مسعود أسعد غنيم

س: بتتذكري أديه عمرك يا حجة؟

ر: والله ما بعرف، طلعت كنت واعية ما بعرف، شي 7، 8 سنين

س: طلعتي من فلسطين كان عمرك 8 سنين؟

ر: نعم

س: شو بتتذكري بفلسطين، يعني شو هيك بعد عندك ذكريات عالقة براسك من ايام ما كنت بفلسطين؟

ر: والله يا حبيبتي اول شي، احنا من فرادّة قضا صفد،

س: واحنا كمان من قضاء صفد

ر: بتذكر كان عنا حكورة ” العقبة” اسمها، مسمينها، بتنزل على طبريا، وهي وطالعة بتطلع على صفد، بتمرق بتوقف عراس النبع وبتذكر كنت أحمل السلة أعبيها تين وأبيعها بصحون للركاب. عنا تين شليوي، عنا تين بقراطي، عنا تين نورشي، عنا تين هيك متل حبة هيك متل العسل يبقى، تين عسلي.

س: هادا كان عندكو بالضيعة؟

ر: بالحكورة، نعم. هاي حكورتنا، منقول حكورة نحنا، هون بقولوها بساتين. وتمرق هل بوسطا وتطلع توقف عراس النبع، نبع فرادّة. أبيع سلة التين وأرجع على البيت

س: يعني كانت ضيعتكو مشهورة أكتر شي بالتين ؟

ر: التين واللهم صلي على سيدنا على محمد، نزرع بالبساتين، يزرعو بصل، في أفورة هيك، منقولن أفورة إحنا، من هاي الي بشتغلوها بالقش، يشتغلو طباق، يشتغلو أفورات، هاي الافورة ما كان في متلا هون بهاي البلاد، اللجنة متل هون وهناك يكلحو علينا كلاحة وأخر شي طلعنا. هناك بستان، النسوان تعزم مثلا امي، حياة امي، تقول للجيران، يجوا يساعدوا، بصل وبعدين اللهم صلي على النبين خضرة وباذنجان وبندورة هاي يعني ما كنّا نورد يعني، هيك للبيت.

س: تتذكري شي مرة حضرتي عرس بفلسطين يا حجة؟

ر: بتذكر.

س: شو كان يصير، شو كانت العادات بفلسطين يا حجة؟

ر: العادات كان يعزموا، بقولو للعالم نقولها تعليلة، السهرة يعني، بدنا نعلل، بعزموا على الجيران واهل البلد ويصيروا يغنوا، يا بنات العم هليليلا ويعلم الله الليلة فرحتنا. ويعدّوا عليها، يوم العرس ماراح، ما ضل في عقل، يدبحو ويغنو ويعدّوا عليها, والله يا خالتي كنت حافظة كل شي بس امراضي واوجاعي تغلبت علي.

س: الحمدالله

ر: الحمدالله رب العالمين

س: حجة بتتذكري اديه كان عمرك بس نخطبتي؟

ر: لا والله

س: تقريبا، بعد ما طلعتو من فلسطين بأديه؟

ر: والله لو كان ابني هون، ابني بفتح اسا

س: كنت كبيرة او صغيرة؟

ر: لا منيحة

س: يعني بحدود 14، 15 سنة، او اكتر؟

ر: اكتر

س: يعني بدك تقولي شي 18 سنة؟

ر: ايه، تقريبا شي 18 سنة

س: كيف خطبتي؟ إحكيلي عن خطبتك؟

ر: خطبني ابن خالتي، اخت امي، وكمان ابن عمي.

س: اه وكمان الاهل آخدين من بعض، الاختين والاخين

ر: نعم

س: شو صار؟ يعني كيف اجو وطلبوكي؟

ر: عادي

س: انو مين اجا؟

ر: اجا عمي وخالتي والي يعزموا، يعني جاهة، الكبار وتذكرتلك يقولوا عن بنات العم بس عقلاتي

س: مش مشكلة

ر: يا شوال الرز جلبناها وللشيوخ الي عزمناها ويرجعوا يقولوا، يا شوال القهوة جلبناها وللشباب الي عزمناها، يا بنات العم هليلي ويعلم الله الليلة فرحتنا. الحمدالله. بلادنا ثمينة، أطلع اجيب الدبق وأرصفوا على التين وعلى العصافير الي تعلق. ابوي وحداني وكان مدللني، امي خلفت 10 بنات، الله يرحمها ويرحم امواتكم. ما ضل غير انا واختي، اختي ببرج البراجنة وانا هون. كلو راح عند ربنا.

س: الحمدالله

ر: الحمدالله رب العالمين. ايه شو بدي اقولك يا حبيبتي,

س: هو كمان كان من نفس القرية، يعني لما طلعتو كان معاكي طالع او كان طالع قبل؟

ر: لا طلعنا كلنا مع بعض خالتي. وأضينا كتير. طلعنا على عموري، ومن عموري على عين الاسد، ومن عين الاسد عبيت جنة، ومن بيت جنة على حرفيش وبعدين وصلنا على بنت جبيل، نقرب على البحر بقولوا إرجعوا، جلجئتوهان قضينا كتير، حياة امي تقولي يمّا ينيمو الولاد وتحت الزتون لا غطا ولا شي غير الله، يحوشوا زيتون اخضر ويشوا على لوحة لحتى يسكتوا الاولاد والي يتصاوب مفيش نقطة مي يسقوا

س: بتتذكري اديه هو كان عمرو؟

ر: مين؟

س: جوزك؟ لما خطبتو، بعمرك او أكبر منك بكتير؟

ر: لا، يمّا جيبي هوية ابوكي، خلقاني سنة 1935. من بنت جبيل، حابونا على صور وحطونا بهل الشوادر ويفرقوا للولد نصف رغيف، خبز جيشي، وللكبير رغيف، عيشة صعبة كانت

س: كفي يا حجة؟

ر: رحنا على صور كنت هيك قوية، ما قوي الا الله، كنت عفريتة اسم الله. أروح، كان في واحد اسمو أبو طاقة، يقول هاد الولد ما وصلنا على بنت جبيل يا تقبريني من البلد، كنت انا وخواتي حاضنيتن، اجا علينا واحد يهودي بحكورة إسمها أحمد الصالح،كنا احنا وياهن شراكة. أحمد الصالح كانت ام خالد العاصي، اسا هي بالسويد، الله يسعد صباحك وصباحها، كنت رفيقة انا وياها, كمان من بلدنا، كنا نقعد انا وياها بهل البساتين ,انا اكبر شي بخواتي وهادا في هون ام محمود بالمخيم تحت كانت الها بنت معنا، نزلت امها على فلسطين وجابتها، ضلينا انا وخواتي وكيف، كان الي ست بالطاحونة، ام امي، رحت لعندا، قالتلي خدي يا ستي، أعطتني عدس وبرغل وزيت وبصل، الطاحونة كانت لبيت عمي، قالتلي يا ستي روحي اطبخي لخواتك، احسن إجو اهلك، حيجن أبوكي او إمك منشان يلاقوكو احسن ما يعقدوا يدوروا عليكو. فاتو هل اليهود على البلد، ساقوهن، كيف بسوقوا الغنم والسلاح وراهم، ما كانت الناس مسلحة، اخو أختو الي عندو جفت، كان أبوي عندو جفت, وكان في واحد إسمو أبو ليلى، أوّسوا على راس النبع، الله يرحم ترابو، زلمة وزلمة، أوّسوا ولاد الحرام، مين ما بعرف،

س: هوي خلقان جوزك ب 38، يعني هوي أكبر منك ب 3 سنين، كفّي يا حجة.

ر: من بنت جبيل كفينا على صور، حكيتلك، أروح أجيب على القاروط الأزعر، شو يقولوا على حياة امي ( في كلمة صعبة ما بدي احكيلك ياها، بعدين بعد التسجيل بقلك هي. أكفيلك، طلعت عند ستي على الطاحونة، حملتني عدس وسميدة وبصل وقالتلي روح اطبخي لاخوتك شوية رز، كنا نحوشو، يحوشو أهلي ويجو يطحنو على المعصرة والزيت الي يحبو قلبك. ابوي وحداني، يبعتولوا بدن يطحنو على البيدر، القمحات يودولوا، يضل هو وأبو دية الله يرحمو، يضل هو وياه يتصيدوا، حجل وامي تعمل الكبة، طيب الحجل، ومدللني، لما خطبت ذبحلي هيك ذبيحة، المصاري بصدري شكّلّي إياها متل عقد الليرات.

س: بدي أسئلك حجة، لما خطبتي، اجو اهلك سألوكي؟

ر: لا طبعا، بسألوا العادي

س: ووافقتي؟

ر: ايه طبعا وافقتن انو ابن خالتي وابن عمي.

س: يعني وافقتي لانو ابن عمك؟

ر: ابن عمي وابن خالتي، يعني بالنهاية كل بنت بدا تتجوز

س: تتذكري مين هني الوجاهة الي اجو طلبوكي؟

ر: لا والله، هل الكبار

س: الكبار تعون المنطقة، كنتو ساكنين مع بعض؟ او كبار من منظقة تانية؟

ر: لا من المخيم هون

س: في حدا كان معارض على الزواج؟ ما بدو ياكي لهل الشاب؟

ر: لا ابن عمي، لا

س:  شو كان يشتغل جوزك؟

ر: فاعل، والله انقطع قلبنا بهل البلد ومرض كمان، اجا من هداك المرض وأعطاكي عمرو

س: ما كان يشتغل شغلة محددة، كل يوم شغلة؟

ر: بالسهل، بالزراعة، إشتغل بزحلة واشتغل هون، هون كانو يعطوا ليرة، ليرة وربع

س: كان يجيب مصاري كتير او عادي؟

ر:  لا، أفحل زلمة يعطو ليرة، ليرة وربع، كانو ينزلو على السهل مشي، ويجوا من الصبح للمغرب

س: واهلك كانوا موافقين على الشغل؟

ر: ايه

س: اديه كان المهر؟ بتذذكري؟

ر: والله يا خالتي انا مهري كان 800 ليرة، اليوم ما بجيبوا حمار ولا كرّ.

س: المقدم والمأخر كان 800؟

ر: كانوا يجيبوا للخال وللأم وللأبو، انا ما طالبي اشي.

س: شو اشتريتي ذهب وقت الخطبة؟

ر: اشتريت يا 10 او 12 ليرة على بقلاتي حطيتن، ومتل هيك خاتمين وحلق واشتريت صندوق ما كان في خزاين متل هلاء.

س: مين كان معاكي لما رحتي اشتريتي الذهب؟

ر: والله ما عدت ذاكري. وطلّعت فرشة ولحاف ومخدتين وكل سنة وانت سالمة. قعدت جمعة عروس وبعدين صرت أشتغل بالبستان مع زلمتي.

س: شو كان جهازك، شو جهزتي؟

ر: كنّا نخيّط خياطة، بدلة بيضا، نجية اليوسف كانت إم خالد مشهورة عندا بنت إسمها بهيرة، فكل شي كان خياطة.

س: كنتو تجيبو قماش؟

ر: اه، شرطات وشلحات وفساتين.

س: شو كانت العادات والتقاليد يوم الخطبة؟ يعني شو كان يصير؟

ر: يجو العالم يقعدو ويجيبو قهوة وحلو، على قد قدرتو الانسان. إجاني يا خالتي… انا عندي خمس بنات و5 صبيان راحتلي بنت وراحتلي بنت تانية ببنت جبيل، عمرا 16 سنة، وراحلي ولد شهيد ب سنة 82،

س: ان شاء الله كلنا نروح شهداء.

ر: ابني عمرو 17 سنة، جابولي ياه عريس، وكل الشعب حيّاني، يمّا فدا الشعب، يمّا فدا فلسطين، يمّا فدا الوطن، وما خليت والعالم انهبلت فيني.. ورحنا على بيروت لحتى نشوف اذا عليه دين، راح مع ابن عمو، طلع مع 10 شباب مع رفقاتو، قعد 3 اشهر، وبالمدرسة كان، وأخذ البكالوريا، دار براسو رفقاتو ونزل مع الديمقراطية رحنا أنا وأبوه تنشوف اذا عليه دين، عملولنا حفلة وحيّونا واعطوني سلاحو، واعطوني العلم واعطوني صندوقة تيابو كاتب عليها أبو الغضب، وحياة من أخذ روحو بعدا الصندوقة عندي، كاتب إسمو على السلاح وكاتب على التخت الي كان نايم عليه، وما لقينا الاّ كل خير وما كان متدين قرش من واحد. هنونا وعملولنا حفلة وسلمونا غراضو، الله يرحم عيونو، ويرحم امواتكم ويرحم كل شهيد. فات على الارض المحتلة

س: عملتي حفلة وقت خطبتك أو بس هيك قراءة فاتحة؟

ر: سهرة عادي، ما كان في صالات ولا إشي.

س: وين عملتيها للخطبة؟

ر: والله منّي دايري بالي.

س: عندكو بالبيت أو عندن؟

ر: لا بنات لحال.

س: كان مسموح وقت الخطبة تطلعي انتي وخطيبك مشوار؟

ر: لا ممنوع. رحنا لنكتب الكتاب، كان عمي الله يرحم روحو، صار بدو يوصل البنك وأنا … طلعوا معي. ما كان اول هيك.

س: أديه ضليتك مخطوبة؟

ر: هاي مش دايري بالي الاّ

س: كتير بقيتي مخطوبة؟

ر: لا مش كتير.

س: يعني شي شهر شهرين؟

ر: يعني هيك تقريبا.

س: كتبتي كتابك وقت الخطبة أو بعدين؟

ر: لا بعدين. بالاول خطبة بعدين رحنا كتبنا الكتاب.

س: طب وقت الخطبة، كنتي تقعدي تحكي معو أو كان ممنوع؟

ر: هيك وهيك

س: كنتو تقعدوا انت وياه لحالكوا تحكوا؟

ر: لا ممنوعة كانت. كانو متعصبين بالاول.

س: كان يقعد مع العيلة كلها يعني؟

ر: أه

س: مين حدد موعد العرس؟

ر: طبعا هني اهل العريس.

س: شو عملتي انتي لما قالولك إنو عرسك بهل النهار؟ شو بلشتي تحضري؟ الجهاز كنتي مجهزيتو من قبل؟

ر: اه كلو كان جاهز

س: مين عزمتو على العرس؟

ر: هل الصبايا والاهلية.

س: عزمتوهن هيك، رحتو انتو حكيتوهن أو؟

ر: البنات اه.

س: يعني مثلا انا عرسي، باجي بقلك والله تعي تفضلي أو بكرت؟

ر: لا ما كان في كروتة، عزيمة عادة.

س: عملتي شي سهرة او شي بشبه العرس الفلسطيني؟

ر: لا عادي.

س: يعني كيف، شو صار معك؟

ر: البنات بالسهرة يغنو.

س: تتذكري شو عملتوا أكل وقت العرس؟

ر: بطبخوا الطبخ العادي، فاصوليا ورز ولبن ورز.

س: مين طبخ الاكل؟

ر: الاهلية طبعا

س: مين ساعدهم؟

ر: هني بساعدوا بعض، والجيران

س: وين سكنتي لما تزوجتي؟

ر: هون بالمخيم، بغرفة تابعة للمدرسة.

س: مش مع بيت عمك؟

ر: لا بعدين رحنا

س: اه، اول شي كنتو لحالكو بغرفة، بعدين رحتي عند دار عمك؟

ر: اه, قعدنا هون شي جمعة وبعدين رحنا عند دار عمي، هني كانو ساكنين بزحلة

س: كيف كانت علاقتك مع بيت عمك؟

ر: عادي، أنا بغرفة تحت منن، وهني بغرفة تانية. إنو كانت خالتي، أخت امي, كيف بدا تكون يعني؟

س: إنو في ناس بتحسيها لئيمة شوية أو قاسية؟

ر: لا عادي.

س: كان في شي، إنو يصير مشاكل بينك وبين جوزك؟

ر: لا والله كان مهنيني. كنا نشتغل، بالنهار نشتغل، نيجي على البيت، والله العظيم آجي على الغدا، أنخل هل الطحين بهل اللجن، شترتلي اياه خالتي الله يرحمها، تقولي يمّا هادا للولد وولد الولد. قولتلو هيك لزلمتي، شوف هل اللجن، لجن نحاس، هني اشتروا واحد وسيع هيك، كعبو رقيق، أنا الي شريتوا طلع غميق، يعني بتربّع الزلمة فيه، وبعدو لحد الان، متل ما قالتلي خدي يمّا والله. إسا أنا يعني جوّزت الكبير، عندو بنت وولد، بس يا حرام طلعو معاقيين الاولاد. وجوّزت الكبير بالآخر وجوّزت ابن ابني، والثاني جوّزنا بنت رياض كلزون بنت ابنها، اسمه سامي، هوي أبو احمد بيشتغل بالوكالة، محترم وأهلو مناح. إسا مرتو حبلى الّي جوزناها أحمد، معها عريس, وكمان بدنا نسمي أمير, وجوزنا بنتب على ألمانيا، أخذت ابن خالها، والولد أخذ بنت خالو منير عبيد، وهديك بنتو لنعيم عبيد خوالها. بنت منير أخذناها لابن عمتها.

س: حجة احكيلي شو حسيتي في إختلاف بين عرسك والعرس الفلسطيني؟

ر: فرق كبير

س: متل شو؟

ر: فرق كبير، نعلل 7 أيام والعرس كمان إلو يلبقلوا

س: ما في حنّا وعالخيل؟

ر: اه حنّا وعالخيل وشو بدي أحكيلك

س: هاي المبارزة بالزجل، كانو يعملوها؟

ر: ايه يا حلالي ويا مالي، ويا حلالي ويا مالي, الحدى يقول والباقي يرد، ” يا رب روددوا علي، يا رب روددوا علي”. والله جينا لهون وكانو يعملوا هل الشغلات، اه ويعملو سهرات ويطبخوا. شو نروح نهلل، أنا بجيب حليب أعاشة، أخذ كيلة أو طنجرة، كانوا يسلمونا حليب ناشف، يحلّو ويحطوا هل الطناجر هيك من جوا ويكيلو للواحد، أديش أنا عندي نفار ويعطوكي، يجيبو الحلل أو الطناجر قبل بيوم، ما كان في حليب مشترى أو شي. أنا أستلم وأدرلك ياهن وانتي هيك وبنتك هيك، ويروّبوا هل اللبن يمّا وتاني يوم يطبخو فيه. يطبخوا فقاعية، أو بقولولها لبن إمو.

س: كان في نقوط عندك بالارض يعني نقطوكي؟

ر: الاهل اه  ينقطو. شو بدن ينقطوكي يعني، مبرومة ولا خميسة ولا مخمسة ولا شو.

س: شو كانو يقولوا لما بدن ينقطوا حدا؟

ر: خلف الله عليكي، ويسموها، هاد النقوط منك  للعروس محبة براس أبوكي وبراس أخوكي والنبي ومين صلى عليه، وللعريس نفس الشي.

س: بس قوليلي حجة إرجعي كم ولد جبتي؟

ر: 5 بنات، اتنين ماتوا، وضل 3، هاي بعدا عزابية ووحدة بالجنوب مجوزيتها ووحدة أخذت ابن عمها، أخو أبوها. أخوي وحداني لله، وخلف 6 صبيان، إسا هو بغزة

س: وكم صبي جبتي؟

ر: في الّي استشهد، وجبت وجيه بالاول وبعدين كايد و بعدين خالد وبعدين رفعت.

س: حجة أنا خلصت أسئلة، اذا عندك شي حابي تقولي؟

ر: منتمنى النصر من الله، وبتمنى كل شباب فلسطين يطلعوا بخير وسلامة والله ينصرن على أعدائهم وعلى أعداء الدين

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: