اميرة كامل تلج من مدينة عكا

حجة بس قولينا شو اسمك بالكامل؟

أ: اسم اهلي او اسم جوزي؟

إ: لا اسم اهلك؟

أ: اميرة كامل تلج

إ: من وين يا حجة؟

أ: انا من عكا

إ: من عكا عكا، ولا قضاء عكا

أ: اه انا من مدينة عكا

إ: خلقتني بفلسطين او هون؟

أ: لا هون

إ: مواليد اي سنة يا حجة؟

أ: انا مواليد 13-1-1959

إ: حكيلنا يا حجة شو بتعرفي عن فلسطين ايام زمان

أ: كانو هني يقولو انو كانو مبسطوين

إ: ما كانو يقولو شو كانو يشتغلوا؟

أ: لا يشتغلو ولا يتنيلو، قرى ومدن ما هني

إ: ابوكي شو كان يشتغل؟

أ: ابوي كان يشتغل نجار عربي بعكا

إ: بتتذكري اديه كان عمرك لما انخطبتي

أ: كان عمري 21 وتزوجت عمري 22 سنة

إ: كيف تعرفني عليه؟

أ: لا بعرفوا ولا بعرفني، قاعدين هيك الصبح فجأة اجت امو وجارتا هني هيك حماتي، كان ابوي وجوزها بشتغلوا مع بعض بالدهان واجت بدا تستعار فرشاية دهان وقالت لجارتا عم ندور على عروس واجو هني بحبو يجو الصبح هيك حتى يشوفوا العروس على حقيقتها كيف بتكون من دون شعر ومكياج، اجو من الساعة 7 ونص صبح عنا، قاعدين عم نحيّك صوف قعدو يتحدثو هاي تقول شو عندك بنات، صارت مرت عمي تعددلا بناتا وامي تعد شو عندا بنات، قالت مين سميرة ومين اميرة ومين انعام، قالت امي هاي سميرة وهاي اميرة وهاي انعام، قالت هاي شفتها بالسيارة وسألتها عندك اخوات اكبر منك يعني انااختي كانت كتير حلوة يعني على جمال اختي مرت عمي اجت لعنا، المهم سألت طب اديه عمرها اميرة وسميرة، شربت فنجان قهوة وفلت، انا قلت لامي شو مبين جاي بدا ترجع تسأل على اساس جاي تسأل على فرشاية دهان، قالت امي والله ما بعرف متلي متلكوا ، انا ابوي كان ياخد رأي حماتو بكل شي، كل شي بدو يستشير او يعمل شي اي حركة ياخدو رأي ستي، ام امي، رجعو تاني يوم بدن يجو يخطبوا البنت، انا قلت لاختي يلا انت انفقي.

إ: طيب ما اخدو رأيك؟

أ: ما اخدو شي، قالولنا بدك تشوفي العريس من فسحة الباب هههههه هاي بال 81، فا اجا بيت حماي والجيران وستي ( جدتي) قالت اول واحد بوجك بكون العريس يعني خلص بس كان يجي العريس يعني خلص، اجو اخدو قياس المحبس هاي عاداتنا. وبس اجيت البس الفسستان طلع ضيق، رحت اخدوني اخواتي جبت واحد تاني ولبستو بس فستانن ما لبستو و انصمدت، لا كان في صالات ولا شي، اجو العالم بالبيت، اجت خالتوا هي لبستني كانو يحترمو الكبير هني، انو خالتو هي تحكي وتلبس وبس اجا العريس ما كنت بعرفوا انا لما اجا يلبس المحبس وقعد عرفتو

إ: مننفس المنطقة كنتو؟

أ: كنا ساكنين بنفس المخيم بس كل واحد بمنطقة، يعني لا بعرفوا ولا بعرفني

إ: اذا كان العريس مثلا من مخيم تاني كانو اهلك يوافقوا؟

أ: شو بعرفني اذا رأي ما اخدوا رأي، احنا كنا يجيلنا ناس من مخيم تاني بس ابوي كان يقول لا لانو ابن عمن بدو ياها، انا كنت كتير صحبة مع ابوي قلتلوا يابا ولاد عمي صغار ليش هيك حكيت وقتها قالي: بس اقول هيك يعني ما بدي العريس.

إ: كانو يسألوا اذا انت موافقة او لا؟

أ: لا لا ما كان عنا هالفكر بدك ياه راضي في، لا في تاخدي رأي البنت ولا شي خلص هاد عريسك يعني خلص

إ: كان مسموح يجي عندكن تضهروا؟

أ: لا مثلا اول 3 اشهر خطوبة كتب الكتاب دغري كان

إ: مين اجا طلبك، اجو نسوان؟

أ:  لا ولا مرة بس رجال، ما في نسوان تيجي، الرجال بتفقوا مع بعض جاين نطلب البنت. اجا ابوه واخوه وابن خالتو.

إ: كان في حدا معارض؟

أ: كان عندي اخوي الكبير، ما هو كان مسافر بس انا بعتلو انخطبت لفلان كان بعرفوا، كان بصفه، قال وقتا بدي قولك شي، كل شي منيح بس عصبي اذا بتتحملي عصبيتو منيح كتير

إ: شو كان يشتغل؟

أ: كان يشتغل بالعمار

إ: كان وضعه منيح؟

أ: خير الامور اوسطها، لا عدم ولا انو، عايشين مستورين الحمدالله

إ: اهلك اذا اجاكي حدا فقير كانو يقبلوا؟

أ: والله ما بعرف

إ: اديه كان مهرك؟

أ: 4000 الاف ليرة

إ: مين حدد المهر؟

أ: اهل العريس حددوا، اهلي ما فاصلو ولا شي ابدا

إ: شو جابولك دهب؟

أ: جابتلي هاي الاسوارة صنوبرة وردة متل البلاك وليرة الملك فهد، كان جايبها عمي من السعودية والمحبس.

إ: رحت معن بس جابوا الدهب؟

أ: لا لا ما رحت

إ:  كيف جهزتي؟

أ: انا خالي كان بياع قماش وخالتي كانت خياطة، وبس خطبنا لاخوي الكبير من سوريا اخدت مصاري من مهري وجبت من هناك ومن عند خالي بس رعاني بالسعر.

إ: شو كانت العادات يوم الخطبة؟

أ: ولا شي بعد الظهر رحنا عملنا شعرنا وجينا انبرزنا

إ: ايام فلسطين كانوا من الصبح يعملو، نفس الشي انتو؟

أ: انا سلفتي كانت لبنانية عملت عرسها غير شكل، كل وحدة غير التاني، انا سلفتي على الكتالوغ عملت عرسها، حماتي جهزتا بعدين مهرها كان 10 الاف غير انا

إ: كان في رقص واغاني؟

أ: اه، اه كان في

إ: وين عملتو العرس؟

أ: في قبال بيت اهلي كان جيرانا عندن ساحة كبيرة هيك قعدنا فيها، ما كان في صالات ولا حدا كان يعمل بصالات ما كان في.

إ:وين كتبت الكتاب؟

أ: بالبيت، اجا الشيخ على البيت جابولي ورقة وبس امضي.

إ: اديه بقيتي مخطوبة؟

أ: 9 اشهر حتى خلص البيت.

إ: طيب اذا البيت اخد اكتر من سنة اهلك كان يقبلوا؟

أ: لا لا ما في اكتر من سنة، ممنوع حتى روحات وجيّات ممنوع، نروح عند خالتو او قرايبو ممنوع، يوم الاحد بتيجي عند امو ببتقضي نهار وبتيجي على البيت، كان يجي يقعد عنا ساعة، ساعة وشوي ويفل.

إ: كنتو تقعدو لحالكو؟

أ: اه كنا في وقت نقعد لحالنا، حتى مرت عمي كانت تحب انو نقعد مع بعض

إ: مين حدد موعد العرس؟

أ: اهل العريس

إ: شو لبستي؟

أ: انا لبست بدلة مرت اخوي، كان صرلا شهر مجوزي بدلتا هي لبستا انا.

إ: مين عزمتو على العرس؟

أ: الاهل بس، انا حماتي لبنانية كانت، بس هي راحت على يافا، انا اختي عزمت الجيران والرجال هني بعزموا الرجال.

إ: كان في كرت دعوة؟

أ: لا ما كان في كروتي.

إ: عزمتوا اهل المنطقة؟

أ: عزمنا كل الجيران.

إ: عملتي سهرة؟

أ: لا سهرة ولا شي

إ: عملتو غدا؟

أ: احنا منعمل غدا لاهل البيت بس بيجو خوالي وعمامي وحماتي عملت لاهل بيتها يعني كل واحد عند اهلو.

إ: بتتذكري شو الغدا؟

أ: اه ابوي عمل مناسف وعملنا محمر

إ: وين سكنتو؟

أ: في بيت لحالي غرفتين ومطبخ وحمام

إ: كيف كانت علاقتك في بيت عمك؟

أ: والله لحد هلأ بحمودا في، اذا كان بصير خلاف مع زوجي والله حماتي ما في متلها، كانت بتيجي معي على طول، انا حماتي هي حياتي عمري ، عشت معها 29 سنة ما في متلا بالحنية وبالعاطفة وبكل شي.

إ: كيف كانت عادات الهدايا والنقوط؟

أ: حسب القرايب، كانو يسألو حماتي شو ناقصوا ابنك وبجيبو القرايب والعادي بجيب قميص نوم مثلا

إ: ما كان في نقوط مصاري؟

أ: لا لا ما في هالعادات ما عندن هالعادة

إ: شو عندك ولاد؟

أ: 3، صبيين وبنت، الصبي الكبير مجوز وهاد الصغير عندي والبنت مجوزة

إ: احنا تقريبا خلصنا يا حجة، بدي اسألك بتحبي تزيدي شي؟

أ: والله احنا اهالينا ما كانو يحكولنا عن فلسطين مثلا انا هلأ بس اشوف صالات بصير اقول يا ريت على ايامنا كان في هيك مثلا هلأ العروس هي بتروح وبتجهز على زوقها

إ: كيف كانت علاقتك مع جوزك؟

أ: عادي عادي، جوزي انا كان ما معاشر حدا، مثلا اخواتو متفتحين اكتر منو، انا جوزي ما كان يحضر لا عزا ولا فرح، ما عاشر حدا.

إ: طيب اذا رجع الزمان فيكي، كنت قبلت بجوزك لو كان الخيار الك؟

أ: الله اعلم، الله أعلم، لو بصير انا اختار على زوقي كنت اه بعارض .انا بس خطبت لابني قلتلها لكنتي روحي شو ما بدك خدي على راحتك على زوقك يعني الي انحرمت منه انا حطيتو لابني، قلتلها: هاي حياتك انتي بدك تعيشيها، بدك تعيشي عمرك الي بدك ياها ونفسك فيها.

إ: احنا خلصنا حجة، ان شاء الله ما يكون في شي زعجك؟

أ: لا لا بالعكس ماشين هل الزمن تغير، كل واحد بمشي على كيفون انا مثلا ابني الصغير عمره 17 سنة ما بمشي على كيفي، بضل يقولك ان شاء الله بدك تمشيني على القديم هههههه شكرا الكن

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: