وفيق محمد

 

الإسم: وفيق محمد

العمر: 60 سنة

البلد: ترشيحا

إ: أديش كان عمرك لما تزوجت؟

و: أنا تزوجت 3 مرات, أول مرة كان عمري 28 سنة

إ: إحكيلي عن أول مرة, كيف تعرفت عليها؟

و: كنت مسافر بأبو ظبي و جيت على لبنان و بدي أتزوج, شفت البنت هيّ من بلدنا كانت, قلت لأبوي بدي فلانة بنت فلان, قلي أبوي أنا, متأكد بدك هاي البنت كرمال أحكي مع أهلها. قلتوآه بدي ياها. و راح أبوي عند أهلها و حكا معن, قالولو أعطينا شي أسبوع و منرد عليك خبر بس.

إ: ليش كان بدن أسبوع؟

و: هيك العادة كانت, لازم يسألو عن العريس أول شي كان لازم ياخدو رأي البنت بدا أو ما بدا حتى تكون هي موافقة و ما حدا غصبا

إ: ردوا عليك خبر؟

و: آه إجا زوج أختا و قال فيكو تتفضلوا عنا إحنا ناطرينكو يوم كذا

إ: كيف رحتو؟ مين و مين راح؟

و: رحنا و أخدنا معنا وجاهة كتير كبيرة, وجاهة يعني ناس كبار من العيلة أو ما ضروري نفس العيلة, نفس البلد ممكن, بروحوا بحكو عن أهل العريس و على الجهة التاني في كمان وجاهة من أهل العروس بحكو بإسمن.

إ: شو وظيفة الوجاهة؟

و: متل ما قلت بكونو متفقين مسبقا مع أهل الطرفين على تحديد المهر أديش.

إ: مين بحط المهر؟

و: أهل العروس بحطوا المهر و أهل العريس إذا بدن بوافقوا أو لا

إ: أديش حطوه؟

و: 5000 مقدم و 10000 آلاف مئخر

إ: إنتو قبلتو المهر؟

و: آه. قبلنا كانت حالتي منيحو

إ: كان في إعتراض من شي طرف؟

و: لا ما كان في, حكو الوجهاء و قالو بشرفنا طلب إيد كريمتكو لإبنا كذا و قرأنا الفاتحة و هيك صرنا بعهد الله مخطوبين لبعض.

إ: الخطبة. أديش كانت فترة الخطبة؟

و: قعدت بالخطبة بين 6 أشهر و سنة حتى الواحد يأسس بيتو

إ: جهزت للخطبة؟ عملت خطبة؟

و: آه بالبيت عملنا خطبة. و في كان شغلة بالوجاهة كان في هيك مطبئية كرستال إلها غطا كانو يحطوا فيها ملبس على جوز و يوزعوها للرجال ب ” قراءة الفاتحة” و للنسوان هيك سرر يعقدوها من ورق أحمر و يحطوا فيها 4, 5 حبات ملبس كمان. و كان يوزعو شراب الورد يحطوا بطنجرة و يحطوا بقلبها ثلج و يوزعوا للعالم و يقولو: قدمنا شربات زي المصاروي ههههههههه

إ: طيب بالخطبة كنت تضهر معها؟

و: لا ممنوع هيك كانت العادة, بلا كتب كتاب ممنوع أختلي فيها حتى و بالقرآن موجودة كمان و إذا بدي أضهر معها لازم يكون أخوها أو أختها معنا.

إ: يعني كنت تضهر معها و مع أخواتها؟

و: آه و مرات أنا و ياها و أخوي و خطيبتو

إ: العرس, شو جهزت للعرس؟

و: هديك الايام كانت العروس تروح هي و إمها و أختي مثلا تشتري و تجهز من مصاري المهر كل شي ناقصها.

إ: ما بتعرف شو الجهاز كان؟

و: ل, ممنوع العريس يشوف جهاز العروس بس هيّ كانت تنادي الجيران و الأرايب ( أقارب) و يشوفو الجهاز, هيك العادات مش متل هلأ و كان في عادة بس العروس بتطلع بجهازا بيجامة و مشاي للعريس.

إ: شو جبتلا ذهب؟

و: جبتلها محبس و خاتم و ساعة و طقم ذهب و كنت أشتريلها هدية من هون شغلي من هون. المهم كان تيجي العروس على بيتها و ما تلاقي ناقص شي. أنا كنت مجهزوا و ما ناقصوا شي.

إ: تزوجت وين سكنت؟

و: عملتلها فيزا و أخدتا معي على أبو ظبي, جبت منا بنت هلأ صارت صبية و تزوجت , قعدت معها 4 سنين و نفصلنا. ما صار نصيب.

إ: شو السبب؟

و: خلص ما في نصيب, كل واحد عندو عقلية مختلفة بس هيّ بعد 4 سنين بتقولي أنا ما كان بدي ياك, أنا إنغصبت عليك

إ: شو قلتها؟

و: قلت الحق عليكي, كنت قولي هيك قبل ما نتزوج, كنت قلت التوك مني يا أختي و تركنا, هلأ بس صار عنا بنت عم تحكي هيك

إ: شو عملت؟

و: صار عندي بنت و ما في حدا يهتم فيها و لازم كنت أتزوج مرة تاني كرمال البنت

إ: كيف تعرفت عليها؟

و: أنا رجعت خلصت من أبو ظبي و إشتغلت هون, أصحابي قالولي: في وحدة بتشتغل بالتعاونية شوفا إذا بدك, أنا كنت متردد شوي, كانت أصغر مني بكتير, كان عمري صار 32 سنة, رحنا شوفناها, ما من نفس البلد كانت و حكينا.

إ: نفس الوجاهة راحت؟

و: آه كل شي نفس الشي, كل هذه عاداتنا و تقاليدنا ما بتتغير بس هلأ تغيرت و زيادة.

إ: طيب, إحكيلي تاني وحدة كيف كانت معك؟ أديش كان المهر؟

و: المهر كان 10000 مقدم و 15000 مؤخر. عملنا خطبة بالبيت و العرس نفس التجهيزات أنا ما بعرفها, هي بتجهز زي ما بدا من المهر و العرس عملنا على السطح.

إ: قبلت معك؟

و: آه أنا ما كان بدي أعمل عرس كرمال نصمدت قبل بمرة, قبلت و أصلن كان زمان عنا بالمخيم كل يوم كان في عرس على السطح, أنا يوم عرسي كان جاري كمان عرسو يعني عرسين بنفس المنطقة.

إ: جبت منا ولاد؟

و: جبت منها بنتين و مشكلتي مع تاني وحدة إنها كانت صغيرة أصغر مني يعني بتحب اللبسو الضهرات, كانت عقليتا متمدني متل أهل بيروت مثلا, المشكلة إنو صار عندن بالعيلة مشاكل, صار في تفكك أسري و أنا ما عاد أحب إنها تروح تزور أهلها و هي صارت تروح من ورا ضهري و هيك مشاكل و إنفصلنا. يعني بدك تقولي, تاني وحدة محت العادات و التقاليد إلي ورثونا ياها أهلنا و جدودنا.

إ: يعني هلأ صار عندك 3 بنات و ما في حدا عم يرعاهن, شو عملت؟

و: اول شي كانت أختي تساعدني بتربيتون بس أختي تزوجت, ما راح دوم العمر كلو. قمت قلت بدي أتزوج.

إ: من وين الثالثة؟

و: ثالث وحدة, أخدني عمي على حلب, كانت بتأربني العروي, بنت عمتي بس أنا ما كان عندي رغبة أتزوج مرة ثالثة بسبب تجربتي التاني. كان في بيني و بينها 8 سنين, ما كان فرق كتير كبير, عرضو عليّ 3 بنات و كلن كانو بيأربوني بس عمي طبأني و أخدت البنت إلي صارت مرتي لأنو كان يحبها كتير.

إ: عملت خطبة مرة ثالتة؟

و: عملت بحلب, أهلية كانت بس الاقارب, عملنا خطبة

إ: كنت تشوفا؟

و: نفس الشي ما كنت أقعد معها لحالنا بس مع حدا من أهلها.

إ: عملت عرس مرة ثالثة؟

إ: عملت هي بحلب, و راحت خالتي و أختي جابوها لهون, أول شي لقت صعوبة بالتأقلم مع الجو و بعدين تعودت على الوضع و صارت تعرف أكتر مني هون. جابت معها جهاز و أنا بيتي كامل مكمل و فيو عفش بس غيرنا فرشة التخت ههههههههههههههه

إ: إحكيلي كلمة أخيرة عن كل وحدة؟

و: هههههههههههه أول وحدة كانت بهوائه و التاني كانت صغيرة و بدا و بدا هيك و هيك. أما الثالثة فكانت صبورة و مراعية مثلا, أنا عقلي عصبي, بعصب عليها بتسكت ما بتحكي شي, صابرة معي على الحلوة و المرّة. يعني آخر زواج هو الاستقرار و الراحة ههههههههههه بس.

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: