فردوس شحادة

 

ن: مساء الخير

ف: مساء النور

ن: كيفك؟

ف: الحمدالله

ن: بتعرفينا عن حالك لو سمحت

ف: أنا فردوس شحادة

ن: مواليد شو و من أي بلد؟

ف: مواليد 1970 من كويكات, جوزي من الكابري

ن: مواليد شو جوزك؟

ف: مواليد 1966 و أنا ب 1970

ن: طيب مدام فردوس إحنا بدنا نعمل معك مقابلة عن العادات و التقاليد الي بتصير بالزواج. يعني بدك تحكيلنا كيف تزوجتي و كيف تعرفتي على زوجك؟ إنت أخذت جوزك عن حب و لا عادي, زواج تقليدي؟

ف: زواج تقليدي

ن: طيب قوليلنا كيف تعرفتي عليه؟

ف: كانت معرفة عائلية, طبعا إجينا, كانوا جيران أختي, كنت أشوف إمّو تعرفنا عليها طبعا يعني فترة بيسطة, مش من زمان. فشافتني يمكن مرة أو مرتين مش أكتر و كان عندا ولد مسافر, إجا من السفر و حابي تخطبلو, عرضت عليه كذا وحدة ما مشي الحال فكنت بالصدفة أنا جاي عند أختي شافني, عجبتو كشكل و بحكي الواحد الصراحة يعني أول شي بيلفت نظر الانسان هو شكلو, فقلها إنو هاي البنت عجبتني, و هني بيعرفوا أهلي طبعا, إحنا من عيلة معروفة. طبعا كانوا الناس بيجو عالصيت يعني إنو بنت فلان, يعني إنو أهلها مناح البنت أكيد بدها تكون منيحة و تربايتا منيحة ف على هذا الاساس كانوا ييجو يتقدمو بسرعة يعني إنو مافيش داعي إنن يسألوا لانن بيعرفوا هالعيلة أنا عيلة منيحة فنزلت إمو و عرضت الموضوع يعني كان موضوع عادي شكلا عادي. يعني إنو فينا نيجي لعنكو نتقدم لهالبنت أهلا و سهلا زيّن يعني وي أيا ناس تانين… ” تفضلو” فلما سمحتلن الفرصة نزلو لعنّا و قعدوا الجماعة و عرضوا الموضوع علينا  إنوا إحنا حابين هالبنت و إبني شافها و أعجب فيها, أوكي مبدئيا كمان إحنا منعرف الأهل إنو الام محترمة, الابو محترم… الاخوة يعني ما في عائق بالنسبة لها لعيلة فما في غلط إني أتعرف عهالشب… لما فش… يعني العيلتين متساويين, تعرفت عليه كويس.. الشاب ما إشبو شي.. مش متعلم صح بس إنو صريح كان يعني إنو إمكانياتو,, عرض إمكانياتو و إحنا الحمدالله ما منطلّع عالمادة (المصاري), منطلّع عالشخص نفسو, قعدت معو شو طموحك؟ شو بدك تعمل؟ شو بدك تساوي؟ قلنا الشاب شو مقدرتو؟ قلنالو أوكي, يعني الشب صريح. ما عندو أيّأ تلاعب و إنو ناوي عالخير يعني بييجيكي من الباب إنو أنا ناوي أتزوج مش طريق تاني و كل شي بالامكانيات المحدودة الي هوى عرضها علينا أنا قبلت فيها. كان ناوي يستأجر بيت قال انو أنا بقدر أستأجر بيت قال انو  انا بقدر أستأجر ما بقدر اخذ بيت مشترى بعدو عمرو 24 سنة و أنا عمري 20 سنة يعني بعدا الطريق قدامنا طويلة, ما في غلط إنو الشب منيح و أخلاقه منيحة, آه والله قدموا الجماعة زيادة عن ما كنا إحنا نتصور, إشتروا بيت, قدكوا شبكة منيحة هي عبارة عن طقم ذهب قدموا هدايا

ن: شبكة العريس؟

ف: هاي هدية العريس لعروستو يعني العلامة زي ما بقولوا

ن: إحكيلنا كيف بعد ما صارت الموافقة المبدئية, كيف هني نزلوا طلبوكي؟

ف: إسا هني إجو تعرفنا عليهن أول شي و بعدين حددنا موعد قراية الفاتحة يعني إحنا عنا قراية الفاتحة, رجال العيلتين بيلتقوا عند أهل العروس و بيقروا الفاتحة و بعدين بتصير الخطبة, يعني إذا بدك تعملي حفلة بتعملي حفلة, بدكيش بتصير بقولولا التلبيسة, بتلبس العروس المحبس و الهدية يعني شو بيقدر يجبلها بجبلها, إحنا عملنا حفلة عالضيق يعني الظروف كانت الظروف شوية, صارت ظروف إنو نما عملنا خطبة, عملنا قعدة عائلية و جهزنا, بلشنا نجهز أخذ البيت و فرشنا و بس خلصنا عملنا الفرح بعد شي سنة و 6 أشهر.

ن: أي سنة نخطبتي؟

ف: نخطبت بال 94

ن: تجوزتي بال 95 – 96

ف: 95, يعني شي سنة و 6 أشهر أخدت تقريبا الخطبة, يعني سنة 94 لسنة 95

ن: خلال فترة خطوبتك كنتي تشوفيه؟

ف: آه, طبعا كان ييجي لعنا وقت خطبنا

ن: كم مرة بالاسبوع

ف: بيجي مرة أو مرتين لانو هوي كان بعيد بس أنا كنت آجي عند أختي, لانو هني كانو جيران مع أختي, كنت آجي أقعد يومين, ييجي هوي أيام العطلة لما أكون أنا ببيروت كان ييجي. مرة يوم أحد أو يوم أحد و جمعة حسب ظروفو يعني.

ن: كنتو تضهرو؟

ف: إيه, كنا نضهر بس يعني مش كتير طبعا يعني إحنا ما عنا  كان إنفتاح كتير بالعيلة يعني مشوار خفيف يعني عالكرنيش عندن, عنا يعني مشاوير بسيطة ما توخد وقت طول النهار أو شي لأ ما عنا منو ها, كنا نضهر ضمن الشي المحدود مش زي إسا بروحو بيضهرو كل النهار, إحنا عنا لأ, كان إذا إجا لعنا وقعد, كانت العيلة كلا محيطة يعني المحيط يكلو يكون موجود ضمن عيلة يعني بقعد ضمن العيلة ما في قعدات خاصة.

ن: كيف لكان بدك تتعرفي عليه أكتر؟

ف: طبعا ما هو عم ييجي, الانسان بينعرف أول شي هادا الشي بتحسيه, يعني الاحساس بيغلب, يعني مثلا بيجي يقعد قعدة عادي, هوي ما ملاقي جو غريب لأنو أصلا هوي تربايتو نفس تربايتنا يعني مثلا كان ييجي يقعد عادي زيو زي أيا واحد بالبيت, ما يلاقي الجو غريب, يعني لأ أنا بدي أخذها و أطلع فيها و أقعد أنا وياها لأ, عادي أنا بدي أعاشرو بعيلة ما آخذيتوا أنا شخص لحالو و أنا آجي عندن, نقعد عندن بالبيت, إخواتو.. إمو… أبوه يعني عادي إحنا هذا جونا لقيت ما فيو أيّا إستغراب يعني بتيجي عند أهلو… أهلو موجودين, ما فيك تقوليلن و الله عن إذنكو بدي أقعد أنا و اياه لحالنا يعني بعدين ما هوي عم يتحدث معك قاعد معك, عم يحكي معك مش إنو غازلك بنفس الوقت يكون فيو إهتمام خاص لإلك حتى لو في أهلو أو أهلي أو كذا بس هوي يكون عندو إهتمام خاص لهالشخص يعني مش معقول مثلا لو أخلاقي مش منيحة أو مثلا فيي أيا شي ما رح يعجبو رح يبين و هوي نفس الشي, اذا هوي فيو أيا شي ما رح يعجبني لو حتى قاعدي أنا و ياه مع عيلتو أو مع عيلتي رح يبين هالشي.

ن: لما نزلو طلبوكي مين نزل من عيلتو؟

ف: يعني هني عيلتن إجمالا صغيرة يعني بس ضمن بيت عمي يعني عندو عم متوفي في ولاد عمو بس بعاد, يعني كان ينزل هوي, مرت عمي. عمي أكتر شي, هدول اللي كانو ينزلو معو مبدئيا بعدين صار ينزل لحالو يعني أول شي لنتعرف عالجو و هيك بس إنو هني  عيلتن محدودة, ما عندن عيلة كبيرة.

ن: بعدين كيف صارت تحضيرات العرس؟

ف: تحضيرات العرس عادية

ن: بتروحي بتجهزي…..

ف: آه, طبعا. أول شي جهزنا فرش البيت, أخذنا الشقة و بلشنا نجهز فرش البيت. بس خلصنا البيت طبعا إلي أنا أشيائي الخاصة إحنا عنا هوي بجهز كل إشي, لما طلبنا إحنا الفيد إنو ليرة الذهب يعني ليرة الذهب منطلبا من الناس المتأكدين منن إنو بيقدرو يقدمو لهالعروس الشي الي بيكفيها بس اذا ناس ما بتعرفيهن لأ, بتطلبي مهر أو إذا حدا مسافر بس بما إنو هني موجودين هون…

ن: المهر يعني إنت بتحددي مبلغ

ف: آه المبلغ من المال, إحنا حددنا ليرة الذهب إنو الجماعة معروفين مناح و كذا, ما حدينا فيد هاي تعتبر لا حد الفيد بس إنو شرعا لازم يكون مقدم للعروس إنو حدينا ليرة ذهب و 5000 $ مأخر. المأخر للعروس ما بتوخدن إلا إذا لا قدر الله صار في حالة إنفصال.

ن: و بعدين بس تجوزتي قعدتي ببيت لحالك مش مع بيت عمك؟

ف: لأ, بيت لحالي طبعا, في يعني حسب هيّ إدراكها للأمور. أول شي بدا تدخل عبيت بدا تعرف شخص هيّ تعاشرو لأول مرة لو كانت تعرفوا لو كانت تحبو صرلنا فترة بس يجتمعوا ببيت واحد يعني بتلاقي الشي شوي صعب عليكي و غريب.

ن: بتحسي الجو غريب عليكي؟

ف:  يعني طبيعي بس يعني بدك تسايري أمورك لتتعودي عطبعو و يتعود على طبعك, المرة الشاطرة هي اللي بتخلي الرجال… تتعود على طبعه و يتعود على طبعا يعني بدا هي شوي تتنازل و هوي شوي يتنازل للمركب يمشي بعدين خلص بصير هوي جزء منا يعني قبل ما يحكي الكلمة بتصير هيّ تفهم عليه. بس أول المرحلة طبعا صعبة, لو كانت تحبو لو كانت تعرفوا, لو كانت حتى عايشي يمكن هي و ياه من أول بداية حياتن من هني و صغار و بعرفو بعض و كل شي, بس لما يعاشروا بعض ببيت واحد يعني في إختلاف.

ن: جبتي كم ولد؟

ف: 3 أولاد

ن: أول ولد بعد أدي جبتيه؟

ف: أول شي صار في حمل أول ما تجوزت و مات الولد. رجعن بقيت شي… بدك تقولي شي سنة لحملت بعد زواجي… بدك تقولي شي سنة و 9 أشهر, سنتين بعد زواجي جبت أول ولد. أول مولود عندي كان إلي شي سنتين تقريبا مجوزي.

ن: شو كان بنت ولا صبي؟

ف: لا صبي.

ن: شو كانت ردةالفعل؟

ف: عادي… يعني أول ولد اذا كان بنت أو صبي, الحمدالله رب العالمين يعني ما إستغربت. كنت حابي بنت … آه أنا بحب إنو أول ولد بنت بس إجا صبي الحمدالله

ن: بيت عمك؟

ف: بيت عمي.. كيف يعني؟

ن: إنبسطوا إنو صبي؟

ف: طبعا, الناس أكثر شي بتنبسط عالصبي عنا إحنا, يعني إنو جابت صبي بينبسطوا بس إنو البنت كمان حلوة. إحنا من النوع الحمدالله رب العالمين إذا كان بنت ولا صبي ما عنا فرق…

ن: و بعدين… الولاد البقايا؟

ف: رجعت خلفت بعد سنتين كمان خلفت, حملت و خلفت. يعني في فرق بين إبني الكبير و التاني شي سنتين و 6 أشهر

ن: شو أسمائهن ولادك؟

ف: أول واحد سميتو طلال, ثاني واحد بلال و أصغر واحد أحمد.

ن: أدي أصغر واحد عمرو؟

ف: صار عمرو 10 سنين… طبق تقريبا 10 سنين.

ن: بتلاقي صعوبة معن؟

ف: إسّا هوي سبحان الله الحياة بتوخذي عليهن و يوخذو عليكي بس طبعا في صعوبة بالترباي يعني كل مرحلة إلها شي. يعني هنّي و صغار بدك تنتبهيلن لأكلن لشربن إنك تداريهن, ما يمرضوا… كذا… بدك تضلك عينيكي 10-10 عليهن بالنسبة ل… صحيّا يعني للطفل بس بعدين لما يكبرو و يوعو بتصيري بدك إنتي تعودي عالعادات و التقاليد… ترباي… بدك تعرفي الصح من الغلط إنو بتقوليلو لأ هذا غلط لما يرجع يكبر أكتر في شغلات كثرة مثلا بتجد مع الانسان, بدك كل مرحلة تفهمي عليها, يعني بدك تضلك تفهمي و تفهمي و تفهمي ليكبر و يوعي و بتضلك حاسيتو طفل صغير ما بتحسي إنو كبر هاي كمان شغلة إنو صعبة بالنسبة للأهل إنو يحسو إبنن كبر, يعني بتحسي مثلا صار عمرو 14, صار عمرو 15 بتحسي كانو بعدو طفل يعني هوي عم يكبر بس إنتي قدامك ما بتحسي بهالكبر بتحسي بعدو صغير فا إنتي كل مرحلة بدك تتعلمي عليها شغلات جديدة مثلا بدك تفهمي بدك توعي خاصة حياتنا أحنا هون يعني صعبة… مين يعاشر كيف إذا بدو مثلا يصاحب مين لازم يكون أصحابو… كيف لازم يكون تعاملو مع الناس… لازم يكون عندو جرأة مش لازم يستحي… لازم يكون جريْ.

ن: حياتك الاجتماعية مع عيلتوو هوي حياتو الاجتماعية مع عيلتك كيف.

ف: الحمدالله… يعني لحد إسا ما صار أيا سوء. تفاهم بين عيلتنا أو عيلتن عادي متفاهمين هوي أهلو أنا بحترمن كتير, كتير و هوي نفس الشي إنو عندو إحترام لأهلي و بعدين يعني لا هوي حاول من الأول إنو يسيء لإلنا ولا, ولا أنا حاولت إنو مثلا أسيء لإلهن, يعني بالعكس الاثنين متفاهمين جدا.

ن: و بالنسبة للزيارات؟

ف: يعني كل إنسان حسب ظروفو… مثلا بتصير منا سبات… بالأعياد… بأوقات عادية يعني ممكن حسب الظروف بروح الواحد بزور. هوي دايمن بزورهن يعني الرجال بضل دايمن يفضا أكتر من المرأة. إنو عندك مراحل ولادك… فترة الليل عندن الولاد مدارس.. نوم.. يعني نظام معين بضل الرجال لو روّح من شغلو راح عمل زيارات بضلو أخف علي منك.

ن: شو بيشتغل زوجك؟

ف: كان يشتغل أول شي حداد سيارات بعدين إنتقل للكسر و بعدين إسا صار عندو معرض سيارات.

ن: و كيف كان وضعكوا أول ما تجوزتو؟

ف: يعني… يعني أول ما تجوزت عادي جدا جدا جدا مش زيادة بس الحمدالله كنا يعني… لا أنا و لا هوي من النوع إنو مثلا يوم من الايام ما كان معنا شي و قلنا فش معنا. هاي أحسن شغلي فيو و فيني, يعني هوي لو تضايق, أنا ما بطلب و هوي قد ما فيو كنا مزبطين امورنا, مركلجين حالنا علّي إحنا في. و الحمدالله شوي شوي الانسان بتطور.

ن: طيب, شكرا إلك

ف: أهلين, الله يسلمك

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: