فاطمة شمالي

 

س : حجة قوليلي إسمك و عمرك و من وين إنت؟

 

ف : إسمي فاطمة شمالي من العلمانية.

 

س : اديش عمرك يا حجة؟

 

ف : عمري أنا شي 90 سنة

 

س: العمر كله يا حجة. إنت خلقت بفلسطين؟

 

ف : إيه خلقت و تزوجت هناك كمان

 

س : أديش كان عمرك لما تجوزت بفلسطين؟

 

ف : يعني شي 17 أو 18 سنة

 

س : إنتي كنت موافقة على الزواج أو أهلك جبروكي تتزوجي؟

 

ف : لا ما جبروني.

 

س : يعني أخدوا رأيك و إنت وافقت و مشي الحال. طب إذا كنت ما موافقة, كانو أهلك جبروكي عليه؟

 

ف: لأ لأ ما كانوا جبروني. أصلا ما كان حدا يجبر حدا على الزواج يعني بدك تقولي  في جبر و ما في جبر. في حب و ما في حب بهداك الوقت و ناس متعصبين و في ناس مش متعصبين. أنا أهلي ما كانوا متعصبين

 

س : لمّا كنت صبية هل حبيت؟ أو تعرفت على حدا يعني البنت بعمر صباها هيك بتتعرف على حدا؟

 

ف : إيه في ناس بتتعرف و بصير في حب و عشق مش شي ما بيسوى, لقيتك عبطتك, لقيتك بوستك.. إيه هادا ما كان في منو كان. في حب شرف, في حب انو يطول سنين, 8 سنين, 9 سنين, 4 سنين, هدا الحب يعني الحب الاولاني.

 

س : يعني حبيتي إنتي شي حدا حجة؟

 

ف : أنا لا لا

 

س : كم ولد جبتي لمّا كنت في فلسطين؟

 

ف : جبت ولدين

 

س : كم ولد عندك؟

 

ف : أنا جبت 7 ولاد, راحو ثلاثة منهم و ظل أربعة

 

س : عملتي خطبة قبل الزواج؟

 

ف : إلاّ أكيد خطبة و زواج و كل إشي.

 

س : حكيلي شو صار بالخطبة و شو لبستي؟

 

ف : بالخطبة ما كان في ذهب الأساور, كانت فضة و الخواتم كمان فضة, بس الذهب 25 ليرة ذهب يلبسوها للعروس بقولولا ” عرجة” عرجة ذهب و كمان يلبسوها جوخ, فستان طويل و يكون حرير و عصبة من فوق ( على راسها) يعني حطّة, كلها قصبة مقصبة. هادا هيك كان العرس الفلسطيني و كمان يعطوها قمصان, قبل العرس يكون في سهرة ثلاثة أو أربع أيام دبكة و رقص يعني لا كان في حروب و لا كان في شي, كان العرس هو السعادة, و كانت هالناس تلبس لباس عادي. إيه هيك كان العرس. قبل العرس بثلاثة أيام يبلشوا يحضروا للعرس و يعملوا حفلة كل يوم و يوم العرس يكون مش في خلايا و غيره ( صالة للأعراس) يكون في مكان فيّو وسعة و ما كان في متل هيك مخيمات. كل واحد بمنطقته لحالو إلو بيتو كمان لحالو يعني مقسم لمناطق كيف لبنان هيك, هيك كنّا يعني نسوي دبكة برّا في الساحة, ندبح ذبايح شي 25 ذبيحة, تنعزم كل البلاد حوالي ست أو سبع بلاد يكونوا معزومين على العرس. هيك كان العرس الفلسطيني بالأول يعني.

 

س : إخوات العر,وس شو كانو يلبسوا؟

 

ف : إخوات العروس كمان كان إلهن لبس غير, مش قصير و ضيق زي هلق لأ… كانوا يلبسوا مرتب يعني لبس عرس

 

س : و إم العروس شو كانت تلبس؟

 

ف: و إم العروس نفس الشي, تلبس لبس مرتب. لبس عرس

 

س: شو هي الالوان إلي كنتوا تلبسوها؟

 

ف : كانوا يلبسوا حرير, جوخ و كان في جميع الألوان, في زهر, في أزرق, في أخضر. يعني ما تفكري إنو كان في شي غجري, لأ كان كلّو مرتب, كل شي مرتب, يعني ببلدك إنت كيف بدك تكوني عايشة. على خاطرك يعني, ما كان في خوف و لا إرهاب بس بعدين لما طلعوا الإسرائيلين طلع الخوف, و هربنا و جينا على لبنان. في لبنان اللبس بيختلف عنّا, لبسهم غير لبسنا.

 

س : طب كيف جهزتوا للعرس. كيف شافك و كيف خطبتوا؟

 

ف: يا ستي بتيجي الإم و بعدين بتطلع العروس بتشوفا اذا حلوي, عيونا حلوين, شعرها اذا طويل تكون كدا, يعني مواصفات. تنقد العروس, و بعدين تروح تقول لإبنها إنوا أنا شفت بنت فلان نقدتها حلوة و منيحة و كل شي. يجي العريس يرغبها, و بعدين يجي تشوفوا و يشوفها, يعني هيك كانت عادتنا إحنا. و كمان ممكن يكون كان في حب أربع سنين, خمس سنين, ست سنين, يعني في هيك و في هيك. الحب عنّا ما مانش محرّم, الحب الشريف مش محرّم, ما كان عنا هالدعارة و الخطيفة, فلان حبت فلان, فلان قربت على فلان. يعني بلدنا ما كان فيها هالشي. كان كل شي مرتب. الشرف كان كتير بفلسطين, ما حدا كان يقدر يتخلى عن شرفه لا البنت و لا الشاب. ما كان في زعرنة, ما كان في شي. يعني العالم متل ما بقولوا فلسطين جنة الدول في الحضارة أول و سوريا ثانيا. كان الحضارة أكثر شي بفلسطين. كان هاللبس المرتب, المزارعين, أراضي, هيك كانت العالم.

 

س : حكيلي شوية عن عادات العرس. شو تعملوا؟ و شو كنتوا تحضروا للعرس؟ ( للعروس و العريس)

 

ف : كانوا للعرسان أكل مخصص, يعني كان في العرس يكون العروس و العريس مع بعض. و العروس كانوا قبل يحنوها و يشقرولها شعرها, يحنو إيديها و يحنوا رجليها, شو تطلع العروس متل الذهب

 

س : شو كان لون فستان العروس؟

 

ف : يعني في ناس كانت تلبس أبيض, ناس تلبس حرير. ما كانت متل هالإيامات بدلة بيضة و بس. أحكيلك عن بلدنا. ما كنا نتحكم بالبدلة البيضة لأ لأ أقلك كان في الجوخ يلبسون و الشاب يحطولو حجر أحمر و تحت كمان حجر أحمر ( عند الرجلين) و الباقي كلو جوخ و العروس فستان حرير أحمر مكسّر كمان طويل. و لمّا تطلع العروس يكون إلها بهجة غير شكل. بلدنا هيك كانت مش متل هون نص كم و ما بعرف إيش.

 

س : ما هي فترة الخطبة؟

 

ف : أنا نخطبت سنتين.

 

س : كانت فترة الخطبة طويلة عادة؟

 

ف : كانت في خطبة سنتين و ثلاث سنوات. كمان كانوا يراعو العريس و قدرته.  كانوا يراعو ظروف العريس

 

س : في فترة الخطبة, هل كنت تجلسين و تتكلمين مع خطيبك ؟

 

ف: طبعا كنّا نقعد بس كانت الجلسة تكون شريفة و نسهر كلنا مع بعضنا البعض, مش مقابلات اليوم, في معزة و في مقابلة ممكن تروح عالميّ يروح يحكي معاها, ممكن تروح تشتري غرض يروح يحكيها. أحكيلك هالبلد عاملة كيف يعني. هلق أنا تزوجت زغيري كنت بنت 16 سنة,  و تزوجت لواحد عمرو شي أربعين سنة, يعني ما شفت الحياة بس أنا بحكيلك البلد كيف كانت, هيك كانت البلد يعني, في واحدة بتتزوج على هالطريقة و كمان في حب و في عشق هي و رايحة على العين يلقاها, و هي و عم تجمع الحطب يلقاها. يا تكون رايحة تحصد, يلتقوا مع بعض, يلتقوا مع بعضهم البعض, بس يكونوا مخطوبين و يصير حب. و بعد الخطبة يكتب الكتاب, بس إنوا خطيبها و تعا أمسكلا إيدا و أمشي لا هادا ما كان في منّو.

 

س  :  يعني لمّا كان يجي العريس عالبيت ما كنتوا تجلسوا لوحدكم؟

 

ف : إيه كنّا نجلس مع العائلة. أحكيلك عن حالي أنا لأ ما كنت أجلس معو لوحدي بس ممكن في ناس كانوا يقعدوا مع بعضهم لوحدهم. بس أنا لأ. يعني ما فيكي تحطي كل البلد, في هيك و في هيك. كل بيت إلو قوانينو.

 

س : لما تجوزت كان إلك بيت لوحدك أو سكنت مع بيت عمك؟

 

ف : لأ كان إلي بيت لوحدي, عمي الله يرحموا, أصلا جوزي كان متزوج ثلاثة غيري.

 

س : كنت إنت الرابعة

 

ف : لأ لما تزوجتوا كنت لحالي, هدولاكي كانوا رايحين شي موت و شي طلاق.

 

س : كم ولد جبت؟

 

ف : دبت 7 ولاد.

 

س : كم صبي و كم بنت؟

 

ف : خمس بنات و صبين

 

س : أول مولود أنجبتيه كان صبي أو بنت؟

 

ف : كان صبي.

 

س : كيف كانت ردة فعل زوجك لمّا جبت صبي؟

 

ف : كان عادي, ما كان في فرق بين الصبي و البنت. ما كنتش هالفرحة الكبيرة عشان إجا صبي, لا عادي طبيعي. يعني لو كان اول مولود بنت كانت فرحتو حتكون نفس الشي. ما في فرق بين البنت و الولد. لا عادي ما في فرق

 

س : شو الأسباب التي كنتوا تختلفوا عليها, و ما هي أسباب المشاكل التي كانت تصير معك؟

 

ف : إحنا ما كنّا نتشاجر. كنّا متفاهمين على كل شي. أنا كنت بنت 16 سنة و هو كان بالأربعين.بس هو كان رجّال بمعنى الكلمة و كان يدلعني. كان زلمي متفاهم و يعرف يتعامل معي. ما بقول عنّو غير إنوا كان رجّال منيح. و كمان هو رجّال إبن الأربعين مرّ عليه كتير و قليل بس أنا سبحان الله كنت بالفهم أراوزه ( أساويه) صح هو كبير و أنا صغيرة بس أنا كمان كنت أعرف أتصرف. هاي بتيجي هيك من الله يعني كان هو أكبر مني بس بالفهم ما كان يسبقني و بالنظافة كمان ما كنش يسبقني.

 

س : إنت دخلتي عالمدرسة و تعلمتي؟

 

ف : لأ أنا ما تعلمت.

 

س : طب علمت ولادك؟

 

ف : ولادي إيه دخلوا المدارس, كلهم بنات و صبيان ربيتهم و علمتهم كلهم, بحياتي ما قلت لحد فيهم كلمة ما بتسوى. بحياتهم ما شعروا بإني أم ظالمة. كنت أعاملهم كأم, كجارة, يعني بحياتي ما تشاجرت أنا و إبني, بحياتو إبني ما مديت إيدي عليه. أو مد إيدو عليّ و هيك كمان ربو ولادي ولادهم و كمان ولاد ولادهم.

 

س : شو كان زوجك يعمل؟

 

ف : عامل فلاحي.

 

س : كانت أحوالكم المادية منيحة؟

 

ف : لأ ما كانتش هالقد منيحة. أهلي كانوا أغنياء بس أهلو كانوا فقراء بس أنا أهلي من بلد و أهلو من بلد تانية.

 

س : بتحبي تزيدي شي يا حجة عن حياتك. عن عرسك, حسيتي إنك راضية بحياتك؟

 

ف : إيه هو الواحد لما يلاقي وحدة يرتاح هو وياها بعيشوا مرتاحين و راضيين, هو يطوّل بالو و هي كمان تطول بالها شوي. أنا أفهم و هو يفهم فكنّا نعرف كيف نعيش. راوزنا بعضنا بالفهم و ما كان في مشاكل يعني ما كنش في هاي حاربني و حاربتو لا. ضلينا عايشين هالعيشو عادي و ربينا هالولاد هيك ربناهم أحلى ترباي. و ما شاء الله إبني أخد الشهادة. و لما طلعوا من فلسطين طلعوا أذكياء بيفهموا و هيك ربيت ولاد ولادي كمان, بناتي كمان ربيت ولادهم هيك, و طلعت العائلة كلها صالحة الحمدالله. عندي بنت ما فلحت بالمدرسة بس طلعت بالقرآن فالحة, حفظت القراآن كله. إلي بيشوفها و هي بتقرأ القرآن يقلك هاي زمان قاعدة بالمدرسة و متعلمة. و هادا كله من رب العالمين, يعني لمّا ربنا يعطيكي الرضا كل العالم بتحبك, بتحبك مش عجمالك, الجمال ما هو شي العالم بتحبك على عقلك و جمال فكرك.

 

س: شكرا إلك يا حجة عزبتك و أخدت من وقتك شكرا إلك و إن شاء الله منرجع ع فلسطين…

 

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: