دينا الجمل

ن: مساء الخير
د: مساء النور
ن: كيفك؟
د: منيحة
ن: بتعرفينا عن حالك لو سمحتي
د: دينا الجمل, فلسطينية من البصة
ن: حضرتك مجوزة ما هيك
د: ايه نعم, عمري 30 سنة و عندي 3 ولاد. جوزي فلسطيني من صفد بس نحنا من سكان لبنان, أنا من سكان صور ( الجنوب) و هو من مخيم الرشيدية.
ن: مواليد شو حضرتك؟
د: انا مواليد ال 1980 و جوزي مواليد 1972
ن: طيب كيف تعرفتو على بعض؟
د: من خلال أهلو
ن: يعني كان زواج تقليدي
د: ايه كان زواج تقليدي, طبعا بما إنو بأيام الحب فاشل فتزوجنا زواج تقليدي, ما تجوزنا دغري… أهلو تعرفوا عأهلي و بعدين تعرفنا نحنا على بعض عالتلفون و بعدين نزل هو علبنان قعدنا مع بعض شهرين و بعدين صار ال الاوكي و ثم الموضوع. خطبة أول, بعيدن قعدنا شي سنة خطبة و بعدين تجوزنا.
ن: شو كان يشتغل زوجك؟
د: عندو كاراج سيارات
ن: إنت كنتي تشتغلي قبل ما تتجوزي؟
د: إيه كنت أشتغل سكرتيرة عند محامي
ن: دارسي حضرتك شي؟
د: ايه, تجارة و محاسبة و إدارة أعمال
ن: و هو دارس؟
د: لأ, م مكمل دراستو بس معو شهايد صيانة سيارات
ن: طب لو بتقوليلنا تفاصيل أكتر, يعني حدا, ناس دلّوا عليكي أو شي
د: أختو متجوزي إبن عمتي و نحنا و خيو صحاب من زمان, فخيو حب يتشرف أكتر بهالعيلة إيه و هيك يعني و هو كان بدو يتجوز و دلّو علينا… إيه و هو قبل الموضوع و أنا تقبلت الموضوع بوجوده يعني. و بس نزل تعرفنا عبعض و قعدنا فترةو مع بعض لقيت إنو كل شي اوكي و أنا مناسبيتو و هو مناسبني و تم النصيب و نحنا كتير مبسوطين يعني.
ن: الحمدالله, أية سنة نخطبتو؟
د: نخطبت بال 2000
ن: طب إحكيلنا كيف صارت الخطبة؟ يعني العادات بالخطبة كيف بتصير؟
د: من أية ناحية؟
ن: مثلا مين بيجي بيطلبك أو عمو …. كذا و شو الاشيا اللي بتصير و التفاصيل يعني من العادات الي بتصير عند كل العالم.
د: أول شي إجت أختو الكبيرة و خيو الكبير و إمو… بعدين إجا تاني مرة
ن:  إجو شافوكي يعني؟
د: إجو حكو بالموضوع فأنا ما تقبلتو كوني ما بعرفو, بعدين لما إجا خيو الكبير مرة تاني و أختو و بيو و فرجوني صورة بس, أنا ما قبلت أشوف الصورة لانو ما ركبت عراسي الفكرة. إيه… فحكينا مع بعض عالتليفون, صارت أهون شوي.
ن: إيه إنو بتعرفي أكتر لانو الصورة ما بيعني شي
د: و بعد شي أسبوعين, ثلاثة, لما حكو أهلو معو بالموضوع هو شافني رجع على شريط الخطبة الي للأختو و كتير نبسط يعني. حس إنو ها هو الي بدو ياه فقرر إنو ينزل
ن: أديه حكيتو مع بعض عالتليفون؟
د: قعدنا شي شهرين, ثلاثة نحكي عالتليفون
ن: و أنت أهلك تقبلو الموضوع يعني كانو متقبلين إنك تحكي عالتليفون
د: لأ.. أول شي لأ… بعدين بعد ما قنعتن لاقوا الفكرة منيحة
ن: لما إجا و تعرفتي عليه و عجبك و عجبتيه مين إجا؟ بدنا المراسيم تبع الخطبة كيف بتصير؟
د: أول شي لما إجا هو اول مرة من السفر, إجا هو و خيو الكبير و خيو التاني و إجت أختو و بيو ( أبوه) و أمو و قعدو حكو بالموضوع, فا بييّ ( أبوها) قلن القرار لإلها بالنهاية و سمحلي بييّ إنو نقعد كذا مرة مع بعض و تحدثنا و فتنا بتفاصيل المجتمع و حياتنا الخاصة فلاقى إني كتير مناسبيتو و أنا لقيت إنو شاب محترم و عندو شغل و عندو بيت و أهم شي عندو دين و أخلاق فقلنا إنو منحدد فترة الخطبة و طبعا بهاي الفترة رح نكتشف أشيا جديدة بحياتنا يمكن تناسبنا و يمكن ما تناسبنا… بس لا الحمدالله يعني كفينا فترة شي سنة و شهر تقريبا أو شي سنة و شهرين. كان كل شي اوكي فقررنا نعمل مراسيم الزواج.
ن: طب كونك من الجيل الجديد, تقبلتي فكرة الزواج التقليدي؟
د: إيه طبعا, لإنو كذا مرة يعني وقعت… حاولت فوت بقصة غرام فكانت إنا كتير صعبة بالنسبة لجيلنا أكتريتو ما عندو شغل, ما عندو بيت, ما بتحمل مسؤولية كاملة فبدك كان إنسان واعي عشان تقدري تكملي معو و أنا لقيت إنو هالانسان إنو كان أكبر مني ب 8 سنين
ن: وين عملتو الخطبة؟
د: عملنا الخطبة بصالة
ن: و قبل لما بيجو و بيطلبوكي و خلص إنو بدو يصير في قراية فاتحة أكيد, مثلا مين بيحكي, شو بيعملو؟ شو بيقولو؟ كيف بيعطو؟
د: طبعا بييجو الكبار الأكثر من الذكور و الإناث و الحكي يكون لحد كبير من العيلة لجهة عيلتو
ن: من جهة عيلتك إنتي و عيلتو و لا بس عيلتو؟
د: من جهو عيلتي و عيلتو.
ن: مين الي حكا من جهة عيلتو هوي؟
د: خيو الكبير… و بكون العمام و هيك بس الأولوية للخييّ ( اخوه) الكبير, إذا كان البي ( أبوه)  ما عندو قدرة عالكلام و عالحركة. و بيو كان شوي تعبان فخيو الكبير هوي الي كان الوكيل بها الاشياء.
ن: و إنت أكيد بدو يكون وكيلك بيك؟
د: إيه بيي وكيلي.
ن: و مين حضرا  و شو بيقولو؟
د: هلق خيو هوي الي بلش بالموضوع, إنو إحنا جايين نطلب بنتكو على سنة الله و رسوله و ملاقين إنو هالشاب و هالصبية متفاهمين مع بعض فإذا هالشي مناسب لهالعيلة مثل ما مناسب لعيلتنا فخلينا نتمم عالزواج عخير و بحددوا المهر و المقدم و المؤخر.
ن: أديه كان مقدمك و مأخرك؟
د: ليرة ذهب و 25 مليون مأخر
ن: هوي المقدم هو المهر؟
د: المقدم ليرة ذهب إنو هوي المسؤول عن كل شي, عن المصروف و عن البيت و الذهب و هوي كل شي مسؤول عنو. و المأخر حبر عورق يعني إلاّ لا سمح الله صار في شي بعدين لقدّام.
ن: و بعدين طبعا بتقروا الفاتحة
د: و بعدين يعني بس إذا هالفكرة بالنسبة للمأخر و المقدم بتناسب الطرف الثاني اللي هيّ طرف العريس, لإنو العروس هي الي بتطلب و العريس هو الي بوافق أو ما بوافق فهني كانو مرحبين كتير بعالفكرة, ما عندن أي مانع.
ن: بتلاقي هالشي مشترك بين أغلب الناس اللي بتتزوج؟ إنو المقدم هيك و المأخر هيك؟
د: إيه طبعا في ناس كتير بتقبل هيك, في ناس اكثر بكثير و في ناس أقل بكتير, هي بالنهاية سترة و زواج سعيد إن شاء الله مش اكتر من هيك يعني
ن: بتعملوا أكل أو شي ضيافة أو هيك؟
د: طبعا… إذا تم الموضوع عخير
ن: إحكينا عن حالك
د: بالنسبة إلي تم الموضوع و وزعوا معمول و بتيفور و بقلاوة
ن: مين اللي بوزع؟ من جهة أهل العروس ولاّ العريس؟
د: الاثنين… طبعا لازم الاثنين عشان يكونوا إيد وحدي,, لازم الاثنين
ن: طب هو بالعادي مين المفروض؟
د: كيف يعني مين؟
ن: يعني في ناس بتلاقي أهل العريس بيتوكلوا كل شي
د: بالنسبة لغيري أنا ما بعرف, بالنسبة إلي الطرفين, حلو إنو الاثنين يشاركوا بهالشي مش إنو كل واحد يتطلع بالتاني إنو مين أحسن, حلو الاثنين يشاركوا بهالفرحة مع بعض.
ن: كان عندك قراية فاتحة بغير يوم خطبتك أو نفس اليوم؟
د: لأ, قراية الفاتحة كانت لوحدا مع كتب الكتاب, لأ عفوا, قراية الفاتحة كانت لوحدا و بعدين تمت الخطبة, كان في شوية إشكالات بالوراق بالنسبة لفحوصات الدم و هيك, فبعد شي يومين كتبنا الكتاب و خلص مشي الحال.
ن: شو جهزتي لعرسك؟ إنو إنتي عروس بدك تروحي عالدنمرك, شو جهزتي شو عملتي؟ كيف بتبلشي تحضري إنو إنتي بدك تتزوجي؟
د: أول شي الاشياء المفقودة هونيك و بقدر أحملا من هون كنت أحملا بس الاشياء… يعي أكتر شي الثياب, ثياب العروس, ثياب للعريس, ثياب النوم, ثياب ضهرة… هيك بس بالنسبة للبيت و الفرش هو كان كلهن هونيك ما أخدت شي من هون إلاّ البرادي طبعا, برادي, و بشاكير
ن: أي سنة تزوجتو؟ عرسك وينتا كان؟
د: 13-8-2001
ن: وين عملتي؟
د: عملتو بصالة أبو ديب
ن: بتحكيلنا عن العرس تفاصيل و هيك؟
د: إيه طبعا, تحضيرات العرس كتير بدا وقت و صعبة, بدك تدوري عالصالة, لقينا الصالة المناسبة و السعر المناسب و الفستان و الكوافير و هوي كمان بدلتو, تيابو و الأوتيل و السيارة و الورد و ال دي جي ( الموسيقى) إذا ما كان من عند الصالة يعني…
ن: كنتي راضية عن عرسك؟
د: إيه كتير
ن: كيف كان شعورك إنت؟ إنو هلق انت عروس و طلعتي من بيت أهلك و فتي بدنيا جديدة
د: ما كنت مصدقة, كنت حاسة حالي عم مثل شي فيلم. فبس لقيت حالي عالصمدة صحيت من هالشي إني أنا بدي فارق أهلي و هيك  فكانت ردة فعل كتير قوية بكا و بتعرفي شوي إنهيار بالأعصاب.
ن: صار في أشيا مميزة بعرسك, بتلاقيها مميزة ما شفتيها بغير أعراس؟
د: إيه كان في وقتا عيد ميلاد زوجي و عرسنا بنفس الوقت و كان بتذكر نجاح طلاب و الانتفاضة. إيه كانو كلن بوقت واحد, إيه كان عرسي كتير حلو… بنص العرس أعلنو عن هالشي, عن عيد ميلادو و عن الانتفاضة و قالوا للناجحين يتفضلوا ينزلوا يرقصوا فكانت هالشغلة كتير مميزة و كانت أختي من بيناتهن للناجحين فكانت كتير حلوة و رقصنا كتير و نبسطنا كتير.
ن: لما إنت تزوجتي و سافرتي أكيد لا قعدتي مع أهلك و لا بيت عمك, دغري سافرتي بعد العرس؟
د: بعد العرس بتقريبا شي شهر سافرنا.
ن: أخذتو أوتيل هون أو قعدتو مع بيت عمك؟
د: إيه قعدنا أول شي, شي أسبوع بالأوتيل و بعدين أسبوع عند أهلي و أسبوع عند أهلو و كزدرنا و بعدين سافرنا.
ن: كيف كانت علاقتك مع أهلو أو علاقتو مع أهلك؟ شو كان دور العم للطرفين؟
د: بالنسبة الى عمي كتير بحبو لانو وقت الخطبة, خطيبي ما كان بالبلد و أنا كنت قضي وقت كتير معن عند عمي و مرت عمي و كان في عندن بعد بالبيت صبية قدّي فكنا كتير مبسوطين مع بعض, ننام بنفس الغرفة و نضهر و عمي كتير بحبني إسا توفى هوي
ن: الله يرحمو
د: تعيشي و مرت عمي كتير حنونة يعني لحد إسا زي أمي.
ن: ما واجهتي معن مشاكل؟ إنو بالعادة بيصير بين بيت العم و الكنة أشيا و لو تفاصيل صغيرة بتحسي إنو بتتضايقي أو هني بيتضايقوا ما صار شي مشاكل؟
د: لا أبدا ما بتذكر. بس كانو يحبو إنو قضي وقت كتير عندن ما كانت تسمحلي الظروف بس قضيت  وقت كتير معن
ن: و بالنسبة لعلاقتو هوي مع أهلك كيف كانت؟
د: كتير منيح و أهلي كتير بحبوه بس هو خجول, هيدي المشكلة الي عندو
ن: هلق بما إنو إنت سافرتي و رحتي على غربة. كيف دبرتي أمورك كونك عروس جديدة و عمرك 20 سنة صغيري بالنسبة لوحدة رايحة عغربة و رجال نوعا ما غريب لإنو ما بتعرفوا من قبل غير فترة الخطوبة . كيف كنتي تديري أمورك؟ شو المشاكل الي كانت تواجهك؟ كيف كنتي تحليها؟
د: هلق هوي من النوع الي كان يقدملي مساعدات كتير, كان يعصبني ببعض الاوقات إنو ما يساعدني, يقدملي مساعدات مخفية. مثلا لما رحت لهونيك أول أسبوع عرفني عالبلد كتير, كيف بيطلعوا بالقطار, كيف بيطلعوا بالباص, كيف بيمشوا بالشارع, العناوين بعدين. صار يقلي خلص روحي لحالك, ما تتصلي عليي, إنتي بتعرفي تحكي إنكليزي خلص و معك تليفون و معك العنوان فدبري حالك عشان أتعلم يعني مش إنو لقمنة أو شي.
ن: إيه أكيد إنو هوي كان بدو ياكي تقوي بالبلد.
د: و شجعني أكتر إنو كان إلي شهرين بالبلد قلي فوتي مدرسة, طبعا هونيك البلدية بتقدم مساعدات للتعليم عشان الواحد بدو يقدر يتأقلم مع مجتمعن بالبلد. فدخلت مدرسة و بعدين وقفت بعد شي 8 أشهر لأنو حبلت و صار وقت الولادة و هونيك بعطوا سنة أمومة. صرت بس كون الوقت سامحلي روح عالمدرسة, طبعا بعد سنة الأمومة روح عالمدرسة بس إذا كان عندي شي ما روح و صرت أعرف أحكي و أعرف أطلع ما بتكل على زوجي بشي.
ن: و أمور بيتك هون, إنت لما كنتي عزابية, كنتي تطبخي, تنظفي البيت و هاي الامور الي ست البيت بالعادة بتعملا, لقيتي فيها صعوبة هوناك, أولا ما ختلف عليكي الوضع , يعني متل هون متل هوناك؟
د: لأ طبعا إختلف الوضع بس يعني أسهل هونيك أسهل الشغل أسهل, كل الاشياء متوفرة خصوصا الكهربا و كل شي عكهربا, فما بتلاقي أي صعوبة إلاّ الغربة يعني بتضلك حاسة شي ناقصك. أول 5 سنين كانو صعبين لوحدي ما في حدا يساعدني, ما بعرف كتير أصحاب, بعدين شوي شوي صرت أتعرّف. في أهليتو كمان هونيك بساعدوني.
ن: كم ولد جبتو؟
د: إسا إلنا مجوزين تقريبا 10 سنين. صار عنا 3 أولاد. أول ولد خلفتو بعد سنة من الجواز سميتو إياد و كان عمرو 6 أشهر حبلت بالتاني, إجت بنت لما ولدتا كان عمرو الاولاني سنة و 3 أشهر, بس كانت كتير مهمة صعبة بس حلوة لإنو ما في شي يسليني و يعبي وقتي كلو, يعني جوزي تقريبا نص النهار أو كل النهار مش بالبيت.
ن: التاني بنت؟
د: إيه الاول صبي و التاني بنت
ن: و الثالث؟
د: و بعد شي…. لما خلفت المولود الثالث كان صار عمر التاني 3 سنين
ن: يعني في فترة منيحة؟
د: إيه في فترة منيحة. طبعا كنت صرت أعرف كل شي فما كان في شي صعب عليي.
ن: كونك ولدتي الاول صبي و نحنا بمجتمع شرقي و الصبي هو شي كتير مهم إنو جابت أول شي صبي و كذا, بينبسطو, شو كانت ردة فعل بين أهلك و و إنتو و أهلو. بيت العم بينبسطو أكتر إنوا إجا وريث العيلة
د: هلق جوزي مش أول واحد بتجوز بالعيلة هو قبل الاخير و عندن كتير أحفاد و هيك بس طبعا بما إنو هوي كان متأخر بالزواج فكانت الفرحة كتير كبيرة و أنا بالنسبة لأهلي كانت الفرحة أكبر لإنو أنا أول وحدة بتتزوج بإخواتي و جبت صبي بس جوزي بميل للبنات أكتر, فقلي إنو خلص أول واحد صبي بعدين إن شاء الله ييجو كلن بنات بما إنوا ضمنا الصبي و لما حبلت تاني مرة كان كتير كتير مبسوط أكتر من أول مرة , لما حبلت تالت مرة قلي يا ريت تطلع بنت بس ما زبطت, طلع ولد.
ن: طبعا فوّتي ولادك مدارس و هيك. بتلاقي صعوبة مع ولادك؟
د: إيه طبعا, هلق الولد الي بيخلق هونيك بتكون لهجتن أزبط بكتير من الي بييجي عالبلد و بيتعلما فأنا صرت إنو أجي عحالي و كفي فيها أكتر و فوت فيها أكتر و أتعامل مع المجتمع عشان أمشي مع ولادي بهل الطريق, شو بيحضروا عالتلفزيون أفهم شو بيحكو مع بعض, إذا بيحكوا كلام مش موزون كون أنا مراقبيتن كل الوقت من هيك يعني أوقات بلاقي صعوبة بتدايق إذا شغلة ما فهمتا بس بضلني نكّش وراها.
ن: وضعكوا المعيشي كيف؟
د: ميسور الحمدالله, لا فوق و لا تحت, منيحة. أوقات بكون في شغل كتير, أوقات ما بكون بس هونيك بتلاقي حالك دايما مدبرة حالك إنو اكتر شي الحكمة ببلاش, مريحة حتى إنو … يمكن مش شاطرين كتير هني بس نظافة زيادة عن اللزوم و الخدمة يعني ما في تفرقة بين أهل البلد و الغربية.
ن: شو إختلف بين دينا قبل الزواج و دينا بعد الزواج؟ يعني شو إتعلمت دينا و شو تطور بدينا؟
د: إييه 180 درجة, تحملت مسؤولية كبيرة, هلق أنا بعرف حالي صبورة بس ما كنت بعرف حالي صبورة هالقد بس الحمدالله بعدا روح المرح فيني. هيدي أهم شي بس شوفي لاخواتي البنات, أكتر بكتير من أي شي و دايما بضل ببالي مشغول عأهلي, هلق, زمان لما كنت أتناقر أنا و إمي أو أنا و بيي ( أبوي)  كنت قول إن شاء الله أطلع و إن شاء الله حل عنكن و هيك, بس بعدين لا, لقيت حالي عم بندم على كل كلمة طبعا لإنو فش زي الام و البيي و الاخوة ملمومين ببيت واحد و اخواتي الشباب بتحسي إنو بدك حدا خاصة إذا صار شي هيك مشاكل بين المرا و الزلمة بتحسي إنو بدك حدا يحميكي بس الحمدالله زوجي حنون و صبور و موزون بأفكارو و هيك.
ن: يعني المشاكل الي عم بتواجهكو كانت نوعا ما إنتب كنتي تقدري تتدبري حالك فيها, يعني ولا مرة وصلت معك لمرحلة سكرت معك و قلتي خلص أنا شو جابني عا هل البلد و بدي أرجع عند أهلي؟
د: لأ, ما وصلت ولا مرة لهالدرجة يعني أنا من النوع الي بحب ساعد ما بحب إنو جوزي يكون عندو مشكلة و أتركو و أفل, لأ, لازم وقف حدّو و حل هالمشكلة, و بعدين إذا لقيت هالشي هو بدو يا ف شي تاني, بس لأ دايما عم منحل أمورنا بتفاهم و مهما وصلت ما بتوصل لمرحلة كبيرة إنو مرحلة يأس أو شي لأ.
ن: شو بتحبي تضيفي, شو بتحبي تحكي عن حياتك الزوجية زيادة عن الاسئلة الي أنا سألتها
د: ما في شي زيادة, زواجنا زي أي تنين متزوجين بس المهم يكون في تفاهم و شوية صبر و شوية روح المرح و التعاون أهم شي التعاون رغم إنو بالفترة الاخيرة قد ما أنا صرت أتكل عا نفسي, قل التعاون بس أنا يعني بقدر وضع جوزي, شغلو صعب بيطلع من الصبح, من الساعة 8 بيرجع تقريبا 8 بالليل 9 أوقات أكتر و الدنيا هونيك ثلج كتير و إذا كانت شوب الشمس واطي فما بحب أزعجوا أنا بهيك اسيا فبقدّر وضعو و هوي كمان بقدر وضعي و الحمدالله متفاهمين.
ن: الحمدالله… شكرا لإلك دينا و إن شاء الله بتكمل حياتكو كلاّ هيك فرح و مرح. ناوي تجيبي ولاد بعد أو خلص إكتفيتي؟
د: حابين, بس بعد واحد بما إنو عنا ولدين و بنت فإن شاء الله بنت, إن الله راد و إن كان صبي كمان أهلا و سهلا في و بس ما في شي زيادة و الحمدالله دائما نزور أهلي و أهلو أو إمو بتطلع لعندي و أهلي بيطلعو لعنا فيعني حتى هو من النوع الكريم و يقدر الشوق للأهل فدايما بتلاقيني بس بدي سافر ما بقول لأ حتى لو بدو ييجي عحالو بالوضع المادي أو إنو أتركو لوحدو أو حتى مرات إذا كان جاي هو ما بحب كتير ييجي علبنان لإنوا خلص تعود هونيك, صرلو 23 سنة فقلت معارفو هون, معارفو هونيك اكتر بس لما نيجي كتير بينبسط يعني. إيه هاي هي الحياة.
ن: شكرا إلك

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: