خولى أحمد محمد

 

ح: شو إسمك؟
خ: خولى أحمد محمد
ح: أديه عمرك؟
خ: 64
ح: من أي بلد؟
خ: من نحف, قضاء عكا.
ح: شو بتشتغلي؟
خ: موظفة في جمعية المرأة الخيرية.
ح: أديه كان عمرك بس خطبتي؟
خ: 14
ح: كنتي تعرفيه من قبل؟
خ: لا ما كتير.
ح: هو كيف عرفك؟
خ: كنت أروح على المدرسة و يشوفني و أنا شفتو, لاقيتو حلوة بس ضحكلي, قلت هادا هوي
ح: لما إجى يخطبك,بعت اهلو قبل او  إجا لحالو أو جاب معو حدا؟ مين إجا؟
خ: لأ بعت اهلو
ح: مين إجا؟
خ: عمو و مرت عمو و إمو و مرت خالو و خالو
ح: كنتي متفقة معوحكيتو مع بعض قبل؟
خ: لا عزا, ليش كان حدا يسترجي.
ح: لما إجى يطلبك حدا عارض؟
خ: آه أبوي بدوش.
ح: ليش؟
خ: قال من عيلة ما بتناسبنا
ح: شو عملتوا لحلتوها؟
خ: حكينا مع عموميتي و قرايبنا و هيك رجع وافق بس كانت صعبة  زمان.
ح: أديه ضليتو لحلتوها اخدت وقت؟
خ: آه عزا ضل سنة ضل بعدين وافق.
ح: ضليتي ناطريتو سنة؟
خ: عزا آه, بنطرو 3 سنين.
ح: و بعدين رجع إجا مرة تاني بعد سنة؟
خ: عزا آه إجا ورجعو اجو اهلو و خطبنا.
ح: لما إجا يخطبك مين إجا معو وجاهة للخطبة؟
خ: أول إشي بتيجي النسوان بعدين الرجال.
ح: مين إجا من الرجال؟
خ: مختار البلد, مختار أبو فايز بقولولو كعوش.
ح: هو من أي بلد كان؟
خ: ميرون من قضاء صفد
ح: و مين إجا معو كمان؟
خ: العيلة كلها و المختار بكون جوز خالتو
ح: و النسوان؟
خ: إمو و قرايبينو
ح: إختلفوا شي على حد الفيد؟
خ: لاء كان حد الفيد ولا شي
ح: شو كان أول فيد إلك؟
خ: و الله ما بعرف, ما بتذكر
ح: بهداك الوقت شو كان الفيد؟
خ: ليرة ذهب.
ح: أديه كان المؤخر؟
خ: و لا شي يمكن خمس ليرات لبناني مش ذهب
ح: بتتذكري أية سنة نخطبتي؟
خ: 1968و سنة 1969كان حيدر على ايدي
ح: شو جابولك يوم الخطبة؟
خ: محبس و خاتم و مبرومتين وسلسال ذهب,بقولولو ليرات,و تياب, شنطة ملاني,شراشف و مناشف وقمصان نوم
ح: جابوهن على الخطبة, وقت تلبيس المحبس؟
خ: لاءقبل,بعد ما حكو فيي ووافقنا جابوهن معن الجماعة, جابو الشنطة
ح: كيف كانت الخطبة؟ إنو عملتو حفلة؟
خ: ما عملنا لا حفلو و لا شحار لا عزا لشو؟ بس ساوينا حفلة أهلية بمحلية, بالساحة عندن بالمية و مية.
ح: شو كان لون فستان الخطبة؟
خ: كان فستانى كشكش ولونو  زهرو إلو جبو
ح: أديه قعدتي مخطوبة؟
خ: شهر يا روحي
ح: كان ييجي يقعد معك؟
خ: عزا لاء, اعوذ بالله اذا بدنا نروح عالسينما تقعد امي يالنص
ح: كتبتو الكتاب بعد أديه؟
خ: بعد أسبوع من الخطبة
ح: مين إجا على كتب الكتاب؟
خ: عمي و أبوي و خالو أبو سميح كعوش و سميح كعوش و هو
ح: وين كتبتو الكتاب بالبيت او بالمحكمة؟
خ: بالمحكمة بصيدا
ح: أديه قعدتي تحضري للعرس؟
خ: البنات كانت الإم تجهزن, من هي و عمرا 10 سنين, كانت إما تجهز كل شي.وتعبيهن بالشنطة,يا حبيبتي كنت مجهزة خالصة
ح: أديه أعدتو بالإحتفالات للعرس,كانت بس يوم العرس او قبل؟
خ: سبع أيام
ح: شو كنتو تعملو كل ليلةا؟
خ: يغنو و يهللو أغاني فلسطينية
ح: كنتي تغيري فستان كل ليلة بالسهرة؟
خ: لاء
ح: جبت فستان لسهرة قبل العرس؟
خ: ما جبت فستان للسهرة,لبست فستان الخطبة.
ح:شو عملتو يم العرس؟ وين كانت الحفلة؟
خ:عملنا الحفلة  بالمية و المية
ح: إجا على بيتك؟ مين إجا معو؟
خ: أنا كنت هون بالبرج, إجا أخدوني من هون لهناك وعملو العرس,اجو اهليتو  بالبوسطات و اخدوني.كان الراكب ب 10 قروش, و كانو يدفعوا للكل.
ح: كانو يدفعولن لكل الرايحين او كل واحد كان يدفع عن حالو.
ح: ما اجا العريس معن؟
خ:لأ العريس ضل هناك وكانو عم بزفًو,حاطين تيابو على الصدر,و عملو حنة
ح: حنيتي لعرسك؟قبل اكم يوم من عرسك؟
خ: آه حنيت قبل 3 او 4 ايام,عملو حفلة حنة.
ح:احكيلي عنا
خ: بحطو الحنة بالصدر و بصيرو يحطوهن عالإيدين والصبايا ياللي بعمرك كمان بحنو ايديهن والنسوان الكبار بمنكرو اظافر اجريهن.
ح: وبتتذكرو شو كانو يغنو وقت الحنة؟
خ: حنيت  ايدي وما حنيت ,و شو بعرفني,نسيت
ح: شو صار بالعرس؟اجا حدا على عرسك من مخيم البرج,راحو عالمية و مية؟
خ: ما كنا ساكنين بالمخيم,كنا ساكنين بالبنايات.
ح: كان عنكو جيران لبنانية وهاي الجيران اجو على عرسك؟
خ: لأ  ما منعرف كل الجيران بس جارتين اجو عالعرس,بس من المية ومية كل اهل المخيم كانو بالعرس ,عيلة كعوش كتير كبيرة ,لحالا هي العيلة بتكفي لتعمل عرس.
ح: شو عملتو بالسهرة و بالعرس؟
خ: دبحو خواريف و عملو مناسف أكل.ستك لطيفة ذبحت الخروف(عم بتقوا لإبنا)كان خير الله كتير زمان مش زي هلق.
ح: مين كمان اجا عالعرس؟كان في من عيل تانية؟
خ:لا, كل المخيم اجو,عيلة كعوش معروفة و كبيرة
ح: لما تجوزتي قعدتي مع مرت عمك أو في بيت لحالك؟
خ: آه مع مرت عمي,
ح:ببيت واحد قعدتو؟
خ:لا هيي بغرفة و انا بغرفة.
ح: كيف كانت علاقتك بحماتك؟
خ: كانت اذا استفرغت تستفرغ,اذا بدي اصبغ شعري تسبغ شعرا,اذا اقول لجوزي جبلي جنارك عشان كنت اتوحم,تقول لإبنا قديه إلي امك جبتلي جنارك شي؟وحياة اللهواذا يجبلي كعكة زعتر يصير بدها كعكة زعتر,زمان الحموات كانو اصعبوحماتي سقتني السم من كواعي
ح: أديه ضليتي معها؟
خ: سنة بس كانت كتير لئيمة,تطبخ هيي,بس اكون موجودة تطبخ برغل و بندورة و شوربة عدس,عدس و رز,شومر,لوف, و انا ما باكل هادا الاكل, و بس اروح عند إمي تعملن كبة وتصير تنجد المخدات و اللحف عشان تقول للناس إنو كنتا ما شاطرة؟
ح: ليش طلعتي من عندا؟
خ: قلتلك ما هي زي السحلية.
ح: وين سكنتي؟
خ: ضليت بالبيت, بس صرت اطبخ لحالي,سافر هو ع ليبيا بعدين بعتلي و لحقتو,قعدت شهر بليبيا ما قدرت اضل هناك,لإن زمان على إيام السنوسي مش القذافي,بدك تضلك قاعدة مزروبة بالبيت و اذا بدك تطلعي لازم تغطي وجهك,وجوزي يقولي بدي اخدك عالساحة الخضرا,اقولو من شان الله ورجيني الساحة الخضرا,وهني كانو يعطلو يوم الجمعة,ف اخدني,طلعت ساحة كبيرة وفيها شجرو مقاعد و بالنص فيها بركة,بس شفتا قلتلو هاي هيي الساحة الخضراورجعني على لبنان.
ح:وبعدين؟
خ:نقلو على الكويت,
ح: لما رجعت وين قعدت؟
خ:رجعت قعدت مع حماتي,زمان ماكان فيه تلفونات,كانو يبعتو مكاتيب و برقيات,بعتلو برقية خدني عندك,اخدني على الكويت على منطقة اسمها الاحمدية,شارع ابن خلدون,كمان ما قعدت شهر ,صرت ابكي بدي امي بدي اروَح.
ح:كان عمرك شي 16سنة لما رحت عالكويت؟
خ:كنت 15سنة,ب سنة وحدة رحنا هون و هون,كل 6 شهور بيعطو الشركة اجازة شهر و بنقلو على مكان تاني,ما قدرت اعيش بالغربة,رجعت لهون وكان ياسر لى ايدي,حيدر خلق بالشهر السادس من حملي,حطينا بالكوفاز 3شهور,بسنة وحدة خلفت ولدين اول السنة و آخرالسنة
ح: خلفتي أكم ولد؟
خ: 3 صبيان و بنت.
ح:اكم سنة بقيت مع جوزك الاول؟
خ: بقيت معو شي 6 سنين بعدين مرض ومات
ح: كيف تعرفتي على جوزك التاني؟
خ: ما تعرفت عليه, بس مات جوزي ضليت مع دار عمي,قال المختار لازم آخد سلفي,وسلفي كان خاطب ووصارت خطيبتو تغار مني,فقلت للمختار ما هادا اخو جوزي كيف بدي اتجوزو؟ما قبلت,بعدين اجا سلفي وقاللي حسني بدو يتجوزك,قلتيلو ما بدي,رفضتو كتير,بعدين هددني سلفي اذا ما تجوزو رح يوخد ولادي مني,فقبلت اتجوز مرة تانية,و أخو جوزي عرفني على جوزي التاني و جوزني ياه.
ح: كنت تعرفيه ل حسني؟
خ: لأ سلفتي بتعرفو و قنعت سلفي وخلتو يجوزني ياه
ح: إجا طلبك عادي,جاب اهلو؟
خ: طلبني من سلفي,ما اجو اهلو لانوهني بسوريا عايشين
ح:يعني هو سوري؟ مين إجا يطلبك؟
خ: إجت إمو وحكو مع سلفي,ما حكو معي.
ح: اعطوك مهر او عشان ارملة ما اخدت مهر؟
خ:طبعا اخدت ليه شو ناقصني  صفين ولادي حدي و عملت عرس.
ح: ليه عملت عرس؟
خ: طبعا ب حي البعلبكية, وزقفولي
ح: أديه إنخطبتي؟
خ: ما نخطبت دغري تجوزت
ح: جبلك جهاز ؟
خ: لأ ما مجهزة خالصة.
ح:جبلك ذهب؟
خ:آ ه جبلي,اسوارة فيا قطع وسلسال ومحبس.
ح:وين سكنت؟
خ:ب حي البعلبكية
ح: خلفتي من جوزك التاني؟
خ: آه , صبي و بنت خلفت عبير وعلي,قعدنا مع بعض 11سنة,بس خلفت منو صار يكره ولادي,كان قبل يحبن,صارو ولادي ينقهرو كيف يعامل ولادو و كيف يعاملن هني,صار كل يوم يقولي يا انا يا ولادك,قولتلو ولادي,والله و علي معك,و تركتو.
ح:بقيو ولادك كلن معك؟
خ: آه بقيو معي
ح: شو عملتي بس تركتي؟
خ: شتغلت بالصمود على شان عيّش ولادي الستة,الاولاد اشتغلو باسوبرماركت و اشتغلنا
ح: رجعتي تجوزتي من بعدو ؟
خ: آه
ح: كيف تعرفتي عليه؟
خ: شفتو و شافني حد شغلي, حبيتو و حبني و تجوزنا
ح: مين إجا طلبك؟
خ: إم نزيه سلاّم. بعد سبع سنين عرفت مرتو
ح: لما إجا طلبك, ولادك ما كان عندن إعتراض؟
خ: لاء كانو صغار,ما عرفو ولادي,طلبني من امي الله يرحما
ح: جبلك مهر؟
خ: لاء
ح:  وين كتبتو الكتاب؟
خ: بالمحكمة
ح: أديه كان المتأخر؟
خ:17 ألف متاخر و المقدم ليرة ذهب
ح: سويتي حفلة خطبة؟
خ: لاء بالسر,لإن خفت اذا عرف ابوهن يوخد مني الاولاد,بعد 7 سنين اعلنا عن زواجنا,و ابوهن عرف بعد15 سنة و بهالوقت كبرو الاولاد
ح: لما إجت إم نزيه خطبتك مين جابت معها؟جابت وجاهة؟
خ: و لا حدا إجت لحالها.رحت انا وياها ونزيه عالمحكمة وكتبنا الكتاب,وامي وعمي من عيلتي,ابوي مات,راح عالحاج و مات هناك
ح:  حسيتي بفرق بهل 3 جيزات بالعادات والتقاليد ؟
خ: آه أكيد, بس لظروف هي الي بتحكم, العالم تقدمت , صاروا يختصروا  كل شي مش زي الأول 7 ايام بلياليهن,دق وغناني و فرح,صار يوم واحد بس,
ح: وين سكنتي بس تجوزتي؟
خ:بقيت ببيتي عند ولادي وهو عند ولادو؟
ح: كيفك انت و حماتك؟
خ: كتير مناح,كتير كتير,بحبا و بتحبني.
ح: بتيجي عندك؟بتزوريها انت؟
خ: آه وبس امرض بتضل حدي.بس هلق مريضة,اجريها بيجعوها.
ح: شكرا لإلك .
خ: اهلا و سهلا

 

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: